ދިވެހިރާއްޖޭގެ ވ. އަތޮޅުގެ ފުން ހޮހަޅައެއްގެ ތެރޭގައި ފީނަނިކޮށް މަރުވި އިޓަލީގެ ފަސް ފަތުރުވެރިންގެ ހަށިގަނޑު މިހާރު ވަނީ އެ ޤައުމަށް ގެންގޮސް، އޮޓޯޕްސީ ނުވަތަ ޕޯސްޓްމޯޓަމް ހެދުމުގެ މަސައްކަތް ފަށާފައެވެ.
އިޓަލީގެ ލޮމްބާޑީ ރީޖަންގެ ގަލަރާޓޭ ހޮސްޕިޓަލުގައި މި މަހުގެ 25 އާއި 26 ވަނަ ދުވަހު ކުރިއަށް ގެންދިޔަ މި ތަޙުޤީޤީ ދިރާސާތަކުން މަރުވި މީހުންގެ ހަށިގަނޑާ ބެހޭ މުހިންމު މަޢުލޫމާތުތަކެއް ވަނީ ތިލަވެފައެވެ.
މި ހާދިސާގައި މަރުވެފައިވަނީ މަޝްހޫރު އިކޮލޮޖީ ޕްރޮފެސަރެއް ކަމަށްވާ މޮނިކާ މޮންޓެފަލްކޯން އާއި އޭނާގެ ދަރިފުޅު ޖޯޖިއާ ސޮމަކަލްގެ އިތުރުން އިތުރު ތިން މީހެކެވެ.
ޕޯސްޓްމޯޓަމްގެ ވަގުތީ ނަތީޖާތަކުން ދައްކާ ގޮތުގައި، މި ފަސް މީހުންގެ ހަށިގަނޑުން ބޭރުފުށުން އެއްވެސް ކަހަލަ ބޮޑު އަނިޔާއެއް ނުވަތަ އާދަޔާ ޚިލާފު ކަމެއް ފެންނާކަށް ނެތެވެ.
މިހާތަނަށް ބެލި ބެލުމުން މި މީހުން މަރުވުމަށް މެދުވެރިވި އެންމެ ބޮޑު ސަބަބަކީ ފެނުގެ އަޑީގައި ނޭވާ ހާސްވުން ނުވަތަ ގެނބުން ކަމަށް ތަޙުޤީޤީ މާހިރުން ވަނީ ލަފާކޮށްފައެވެ. މި ޙާދިސާ ހިނގާފައިވަނީ ގާތްގަނޑަކަށް 165 ފޫޓު ފުން ހޮހަޅައެއްގެ ތެރޭގައި ކަމަށްވާއިރު، މަރުވި މީހުންގެ ތެރެއިން ހަތަރު މީހެއްގެ ހަށިގަނޑު ފެނިފައިވަނީ ހޮހަޅައިގެ ތިންވަނަ ބައިގެ ދޮރުމަތިންނެވެ.
މަރުވުމަށް މެދުވެރިވި ސީދާ ސަބަބާއި، ހާދިސާ ހިނގިއިރު ހަށިގަނޑަށް އައިސްފައިވާ ބަދަލުތައް އިތުރަށް ޔަޤީންކުރުމަށްޓަކައި ޓޮކްސިކޮލޮޖީ ރިޕޯޓްތައް ހެދުމުގެ މަސައްކަތް މިހާރު ދަނީ ކުރިއަށެވެ. ކުރިއަށް އޮތް ހަފުތާތަކުގެ ތެރޭގައި ލިބޭނެ ކަމަށް ބެލެވޭ މި ރިޕޯޓްތަކުން، ނައިޓްރޯޖަން ނާކޯސިސް ނުވަތަ ބޭނުންކުރި ގޭސް މިކްސްޗަރގައި މައްސަލައެއް އުޅޭތޯ އާއި، ފީނަން ބޭނުންކުރި ސާމާނުގައި އެއްވެސް މައްސަލައެއް ހުރިތޯ ސާފުވެގެންދާނެއެވެ.
އިޓަލީގެ ޕްރޮސެކިއުޓަރުން މިހާރު ވަނީ މި ހާދިސާއަކީ އިހުމާލުން ހިނގާފައިވާ މަރުގެ މައްސަލައެއްގެ ގޮތުގައި ބަލައި ޖިނާޢީ ތަޙުޤީގެއް ވެސް ފަށާފައެވެ.
