ރައްޔިތުންގެ މަޖިލީހުގެ ނައިބު ރައީސް، އަދި ދިއްގަރު ދާއިރާގެ މެންބަރު އަޙްމަދު ނާޒިމްގެ އިތުބާރު ނެތްކަމުގެ މައްސަލަ މިއަދުގެ ޖަލްސާއަށް ތާވަލުކޮށްފައި ވަނިކޮށް، އޭނާ އެ މަޤާމުން އިސްތިއުފާ ދެއްވައިފިއެވެ.
ނާޒިމް އިސްތިއުފާ ދެއްވިކަން މަޖިލީހުގެ އިދާރާއަށް އަންގާފައިވަނީ މިއަދުގެ ޖަލްސާ ފެށުމުގެ ކުރިންނެވެ.
ވެރިކަން ކުރާ ޕީއެންސީގެ 73 މެންބަރުންގެ ސޮޔާއެކު ހުށަހެޅި މި މައްސަލާގައި ނާޒިމްގެ މައްޗަށް ތުހުމަތުކޮށްފައި ވަނީ މަޤާމުގެ ނުފޫޒު ބޭނުންކޮށްގެން މަޖިލީހުގެ ތެރޭގައި ފިތުނަ އުފެއްދުމަށް މަސައްކަތް ކުރެއްވި ކަމަށެވެ. މި މައްސަލަ މަޖިލީހަށް ހުށަހެޅުމުގެ ކުރިން، ނާޒިމް ވަނީ މަޖިލީހުގެ އެންމެ މުހިންމު ދެ ކޮމިޓީ ކަމަށްވާ ސަލާމަތީ ޚިދުމަތްތަކާ ބެހޭ ކޮމިޓީއާއި މާލިއްޔަތު ކޮމިޓީން ވެސް ވަކިކޮށްފައެވެ. މީގެ އިތުރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބަލަހައްޓަވާ ޕީއެންސީ ޕާލިމަންޓްރީ ގްރޫޕުގެ ރަސްމީ ވަޓްސްއެޕް ގްރޫޕުން ވެސް އޭނާ ވަނީ ބޭރުކޮށްފައެވެ.
މަޖިލީހުގެ އިދާރާއަށް މިއަދު ފޮނުއްވި އިސްތިއުފާގެ ސިޓީގައި ނާޒިމް ވިދާޅުވެފައި ވަނީ، މަޤާމުގެ މަސްއޫލިއްޔަތު އަދާކުރުމުގައި ޤާނޫނުއަސާސީ އާއި މަޖިލީހުގެ ޤަވާޢިދަށް އަބަދުވެސް އިޙްތިރާމް ކުރައްވާފައިވާނެ ކަމަށެވެ. ނާޒިމް އިސްތިއުފާ ދެއްވުމާ ގުޅިގެން، މަޖިލީހުގެ ރިޔާސަތުން ވަނީ އެކަން ރަސްމީކޮށް މެންބަރުންނަށް އަންގަވާފައެވެ.
މި މައްސަލައާ ގުޅޭގޮތުން ކުރީގެ ރައީސް މުޙައްމަދު ނަޝީދު ވިދާޅުވެފައި ވަނީ، ނާޒިމް މަޤާމުން ވަކިކުރުމަށް ރައީސް މުޢިއްޒު މަސައްކަތް ކުރައްވަނީ މަޖިލީހުގެ ތެރޭގައި ސަރުކާރު ބަދަލުކުރުމުގެ މަސައްކަތް ނާޒިމް ކުރައްވަފާނެތީ ކަމަށެވެ. ނަޝީދު ތުހުމަތު ކުރެއްވި ގޮތުގައި، ”މަޖިލީހުގެ 23 މެމްބަރުންނާއެކު ނާޒިމް ރޮނގު ހުރަސްކުރަން އުޅުއްވުމަކީ ސަރުކާރުން އޭނާއާ ދެކޮޅަށް ފިޔަވަޅު އެޅި މައިގަނޑު ސަބަބު“ ކަމަށެވެ. އަދި މިއީ ރައީސް މުޢިއްޒުގެ އިތުބާރު ނެތްކަމުގެ ވޯޓެއް މަޖިލީހުގެ ތެރެއިން ނަގައިފާނެ ކަމުގެ ބިރަށް، އެކަން ހުއްޓުވުމުގެ ގޮތުން ކުރެއްވި ކަމެއް ކަމަށް ވެސް ނަޝީދު ވިދާޅުވިއެވެ.
ނާޒިމްގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށްޓަކައި މަޖިލީހުގެ މި ދައުރު މޭ މަހުގެ ނިޔަލަށް އޮތީ އިތުރުކޮށްފައެވެ. މަޖިލީހުގެ އާންމު ކޮމިޓީން ނިންމާފައި އޮތީ މި މައްސަލާގައި ނާޒިމަށް ޖަވާބުދާރީވުމަށް 10 މިނެޓުގެ ފުރުޞަތެއް ދިނުމަށާއި، މުޅި ބަހުސަށް އެއް ގަޑިއިރު ކަނޑައެޅުމަށެވެ. ނަމަވެސް ބަހުސް ފެށުމުގެ ކުރިން އޭނާ އިސްތިއުފާ ދެއްވުމާ ގުޅިގެން މިހާރު ވަނީ އެ މައްސަލަ ނިމުމަކަށް އައިސްފައެވެ.
