ކޯވިޑް19އަށް ޝައްކުކުރެވޭ އަލާމާތްތައް ހުރެގެން އދ.ވިލަމަންދޫ ރިސޯޓު އައިލަންޑުން ސާމްޕަލް ނަގާ ޓެސްޓްކުރި މީހާ ކޮރޯނާ ވައޮރަސްއަށް ނެގެޓިވްވުމާއި ގުޅިގެން ރިސޯޓަށް އަރާ ފޭބުމުގައި އެއްވެސް ހުރަހެއް ނެތް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން މިއަދު ކުރި ޓުވިޓެއްގައި ބުނެފައި ވަނީ ޓެސްޓްގެ ނަތީޖާއާއި ވިދިގެން އަދި ”ކޮންޓެކްޓް ޓްރޭސިންގ“ ނިމުމާއި ގުޅިގެން ވިލަމަންދޫއަށް އަރާ ފޭބުމުގެ އެއްވެސް ހުރަހެއް ނެތް ކަމަށެވެ.
ކޮރޯނާ ވައޮރަސްއަށް މިހާތަނަށް ދިވެހިރާއްޖެއިން ހަ މީހަކު ޕޮޒިޓިވްވެފައިވާއިރު ހަތަރު ރިސޯޓަކަށް އަރައި ފޭބުން މިހާރު ވަނީ މަނާކޮށްފައެވެ. އެއީ ވަންޑް އެންޑް އޮންލީ ރީތިރަށް ރިސޯޓާއި، ކުރެއްދޫ އައިލެންޑް ރިސޯޓް (ޅ. އަތޮޅު)، ސޭންޑީޒް ބަތަލާ އައިލެންޑް އަދި ކުރަމަތި މޯލްޑިވްސް (އއ. އަތޮޅު) އެވެ.
