ދިވެހިރާއްޖެއާއި އިންޑިއާއާ ދެމެދު ގާއިމުކުރުމަށް މަސައްކަތްކުރާ މިނިވަން ވިޔަފާރީގެ އެއްބަސްވުން (އެފްޓީއޭ) ތަންފީޒުކުރުމާ ގުޅޭގޮތުން ދިވެހިރާއްޖޭގެ އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު، އިންޑިއާގެ ކޮމާސް މިނިސްޓަރު ޕީޔުޝް ގޯޔަލްއާ އެކު މުހިންމު މަޝްވަރާތަކެއް ބާއްވަވައިފިއެވެ.
އިންޑިއާގެ ކޮމާސް އެންޑް އިންޑަސްޓްރީ މިނިސްޓަރު ޕީޔުޝް ގޯޔަލްގެ ދައުވަތަކަށް މިހާރު އިންޑިއާއަށް ކުރައްވަމުންދާ ރަސްމީ ދަތުރުފުޅުގައި ބޭއްވި މި ބައްދަލުވުމުގައި، ދެ ގައުމުގެ ދެމެދުގައި އިގްތިސާދީ ގުޅުން ބަދަހިކުރުމާއި، ވިޔަފާރި އާއި އިންވެސްޓްމަންޓްގެ ދާއިރާއިން އެއްބާރުލުން އިތުރުކުރުމާ ގުޅޭގޮތުން ފުޅާދާއިރާއެއްގައި ވަނީ މަޝްވަރާކުރައްވާފައެވެ.
މި ބައްދަލުވުމުގައި މައިގަނޑު ތިން ދާއިރާއަކަށް އަލިއަޅުވާލައްވާފައިވާ ކަން ފާހަގަކުރައްވައި ވަޒީރު ސައީދު ވިދާޅުވީ، ރާއްޖެއާއި އިންޑިއާއާ ދެމެދު މިނިވަން ވިޔަފާރީގެ އެއްބަސްވުމެއް ގާއިމުކުރުމަށް ކުރެވެމުންދާ މަސައްކަތްތަކުގެ އިތުރުން، ދެ ގައުމުގެ ދެމެދުގައި ބައިލޭޓަރަލް އިންވެސްޓްމަންޓް ޓްރީޓީ އެއް ނިންމުމާ ގުޅޭގޮތުން ވާހަކަދެކެވުނު ކަމަށެވެ. މީގެ އިތުރުން ވިޔަފާރީގެ ދާއިރާއިން އަލަށް ފެށުމަށް ގަސްތުކުރާ މަޝްރޫއުތަކާ ގުޅޭގޮތުން ވެސް ވަނީ މަޝްވަރާކޮށްފައެވެ.
ވަޒީރު ސައީދު ފާހަގަކުރެއްވި ގޮތުގައި، މި މަސައްކަތްތަކަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި އިންޑިއާގެ ބޮޑުވަޒީރު ނަރެންދުރަ މޯދީ ދެ ގައުމުގެ ގުޅުން އިތުރަށް ބަދަހިކުރުމަށް ގެންގުޅުއްވާ ތަސައްވުރު ތަންފީޒުކުރުމަށް ކުރެވޭ މުހިންމު މަސައްކަތްތަކެކެވެ.
މި މަޝްވަރާތަކުގެ ނަތީޖާ ދެ ގައުމުގެ ރައްޔިތުންނަށް ފައިދާހުރި ގޮތެއްގައި ފެނިގެންދާނެ ކަމަށް އުންމީދު ކުރައްވާ ކަމަށް ވެސް އިގްތިސާދީ ވަޒީރު ވަނީ ވިދާޅުވެފައެވެ.
