އުރީދޫ މޯލްޑިވްސް އާއި މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް ގުޅިގެން ބާއްވާ ފޯރިގަދަ ”އުރީދޫ މަސްރޭސް 2026“ މި ހުކުރު ދުވަހު ކ. މާފުށީގައި ބޭއްވުމަށް ހަމަޖެހިއްޖެއެވެ.
މި އަހަރުގެ މަސްރޭހުގައި ވާދަކުރުމަށް މުޅިއެކު 16 ޓީމަކުން ވަނީ ބައިވެރިވެފައެވެ. ވަރަށް ފޯރިއާއެކު ކުރިއަށްދާނެ ކަމަށް ބެލެވޭ މި މުބާރާތުގައި ޖުމްލަ 43،000 ރުފިޔާގެ ފައިސާގެ އިނާމު ދިނުމަށް ވަނީ ކަނޑައަޅާފައެވެ.
މިގޮތުން ދިނުމަށް ހަމަޖެހިފައިވާ އިނާމުތަކުގެ ތަފްސީލަކީ:
• ޗެމްޕިއަން ޓީމް: 25،000 ރުފިޔާ
• ދެވަނަ ޓީމް: 10،000 ރުފިޔާ
• ތިންވަނަ ޓީމް: 5،000 ރުފިޔާ
މީގެ އިތުރުން ވަކިވަކި ފަރުދުންގެ ކާމިޔާބީތައް ފާހަގަކުރުމުގެ ގޮތުން، އެންމެ މޮޅު ފިރިހެން މަސްވެރިޔާ އަދި އެންމެ މޮޅު އަންހެން މަސްވެރިޔާގެ އިތުރުން އެންމެ ބަރު މަސް ބާނާ ފަރާތަށް ވެސް ކޮންމެ ކެޓަގަރީއަކުން 1،000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ.
އުރީދޫ މަސްރޭހަކީ ދިވެހިންގެ މެދުގައި ޒަމާނުއްސުރެ އޮންނަ ސަގާފީ މަސްވެރިކަމުގެ ހުނަރުތައް ދިރުވައި އާލާކުރުމަށާއި، މި ދާއިރާއަށް އޮންނަ ލޯބި ދެމެހެއްޓުމުގެ މަތިވެރި މަގުސަދުގައި ބާއްވަމުން އަންނަ ހަރަކާތެކެވެ. މިއީ ރާއްޖޭގެ އެކި ހިސާބުތަކުން ގިނަ އަދަދެއްގެ އާންމުން އަބަދުވެސް ވަރަށް ބޮޑު ތަރުހީބަކާއި ފޯރިއަކާއެކު ބައިވެރިވަމުން އަންނަ މުހިންމު އިޖުތިމާއީ ހަރަކާތެކެވެ.
