20،000 ރުފިޔާގެ މުސާރައެއް ލިބޭ ގޮތަށް، ފަޅުރަށެއްގެ ގޮތުގައި ކަނޑައެޅި ހދ. ހިރިމަރަދޫއަށް ޕޮލިޓިކަލް ޑިރެކްޓަރުން އައްޔަނުކޮށްފިއެވެ.
2025 ޑިސެމްބަރު 30ގައި ރައީސުލްޖުމްހޫރިއްޔާގެ ގަރާރަކުން ހިރިމަރަދޫއަކީ ފަޅުރަށެއްގެ ގޮތުގައި ކަނޑައަޅައި އެރަށް ބެލެހެއްޓުން ހަވާލުކުރީ އެ އަތޮޅުގެ ހަނިމާދޫއާއެވެ. ނަމަވެސް، އެ ރަށުގައި ތިބެގެން މަސައްކަތްކުރާ ގޮތަށް ދެ ޕޮލިޓިކަލް ޑިރެކްޓަރުން ސަރުކާރުން މިހާރު ވަނީ އައްޔަންކޮށްފައެވެ.
ޔޫތު މިނިސްޓްރީގެ ޕޮލިޓިކަލް ޑިރެކްޓަރުންގެ މަގާމަށް އައްޔަންކުރީ އެ ރަށު ޕީއެންސީގެ ހަރަކާތްތެރިންގެ ގޮތުގައި މަސައްކަތްކުރަމުންދާ ދެ މީހެކެވެ. އެއީ އައިޝަތު ޖުވައިރިޔާ އަދި ޖުވައިރިޔާ އުސްމާންއެވެ.
އެ ދެ މީހުންނަށް މަގާމު ހަވާލުކޮށްފައިވާ ލިޔުމުގައިވާ ގޮތުން ކޮންމެ ޑިރެކްޓަރަކަށް މުސާރައަށް 11،000ރ. އަދި ލިވިން އެލަވަންސަށް 9،000ރ. އާއެކު ކޮންމެ މަހަކު ޖުމުލަ 20،000ރ ލިބޭނެއެވެ. އައިޝަތު ޖުވައިރިޔާ މަގާމަށް އައްޔަންކުރީ 6 ސެޕްޓެމްބަރުގައެވެ. އަދި ޖުވައިރިޔާ އުސްމާން އައްޔަންކުރީ 27 އޮގަސްޓްގައެވެ.
ހދ. ހިރިމަރަދޫގެ ރައްޔިތުން އެ އަތޮޅު ހަނިމާދޫއަށް ބަދަލުކުރުމަށްޓަކައި ގެދޮރު އިމާރާތްކުރުމުގެ މަސައްކަތް 18 މަސްދުވަހުގެ ތެރޭގައި ނިންމަވާނެކަމަށް ރައީސް ޑރ. މުޙައްމަދު މުއިއްޒު ވިދާޅުވީ 24 އޯގަސްޓް 2025 ގައެވެ. އެ ފަހުން މިހާރު އެއް އަހަރާއި އެއް މަހެއް ހޭދަވެފައިވާއިރު، އެ މަޝްރޫއު ކުރިއަށް ނުދާތީ އާންމުން ދަނީ ކަންބޮޑުވުން ފާޅުކުރަމުންނެވެ.
އާބާދީއާއި ތަރައްގީ އެއްފަސްކުރުމުގެ ސިޔާސަތުގެ ދަށުން ކުރިއަށްގެންދާ މި މަޝްރޫއުގައި، ހިރިމަރަދޫގެ ކޮންމެ ގެއަކަށް ހަނިމާދޫން ގެއެއް ދިނުމާއި، ބަދަލުގެ ގޮތުގައި ފައިސާ ދިނުން ހިމެނެއެވެ. މި މަސައްކަތް ހަވާލުކޮށްފައިވަނީ އެޗްޑީސީއާއެވެ.
ހިރިމަރަދޫ އަކީ އެއްވެސް ކައުންސިލެއްވެސް އޮންނަ ރަށަކަށް ނުވާއިރު، އެ ރަށުގައި އަދިވެސް މީހުން ދިރިއުޅެއެވެ. އަދި ހިރިމަރަދޫގެ ރައްޔިތުންނަށް ހަނިމާދޫއިން ހަމަޖައްސައިފައިވާ ބިމުގައި ބޯހިޔާވަހިކަމުގެ އަމަލީ މަސައްކަތް ކުރިއަށް ނުދާ ކަަމަށް ބުނެ ހިރިމަރަދޫގެ ރައްޔިތުން ވަނީ ކަންބޮވުން ފާޅުކޮށްފައެވެ.
ހދ. ހިރިމަރަދޫގެ ރައްޔިތުންނަށް ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުމަށް ބޭނުންވާ އަސްލު ބަޖެޓު ސަރުކާރުން ދީފައިނުވާކަމަށް ހަނިމާދޫ ކައުންސިލްގެ ރައީސް އަލީ އިބްރާހިމް ވަނީ މީގެ ކުރިން ވިދާޅުވެފައެވެ. ހިރިމަރަދޫ ރައްޔިތުން ހަނިމާދޫއަށް ބަދަލުވުމުގެ މަރުހަލާ ކުރިއަށްދާއިރު، އިދާރީ ހިންގުމަށާއި ރައްޔިތުންގެ ޚިދުމަތްތަކަށް ބޮޑެތި ގޮންޖެހުންތަކެއް ކުރިމަތިވެފައިވާކަން ވެސް އޭނާ ވަނީ ފާހަގަކުރައްވާފައެވެ.
ހިރިމަރަދޫގެ އާބާދީގައި 589 މީހުން ތިބި ނަމަވެސް، މިހާރު ރަށުގައި ދިރިއުޅެނީ ގާތްގަނޑަކަށް 200 އެއްހާ މީހުންނެވެ.
