ދިވެހިރާއްޖޭގެ ތަރައްގީގެ އައު ބާބެއްގެ ގޮތުގައި ފެށިގެންދާ ރަސްމާލެ މަޝްރޫއަކީ އިގްތިސާދީ އަދި އިޖުތިމާއީ ގޮތުން ގައުމަށް ބޮޑެތި ކުރިއެރުންތަކެއް ގެނެސްދޭނެ މުހިންމު މަޝްރޫއެކެވެ. މި މަޝްރޫއުގެ ދަށުން ބައިނަލްއަގުވާމީ ފެންވަރުގެ އިންވެސްޓްމަންޓްތައް ރާއްޖެއަށް ގެނައުމަށްޓަކައި ދުބާއީގެ މަޝްހޫރު ކުންފުންޏެއް ކަމަށްވާ އީގަލް ހިލްސްއާ އެކު ކުރިއަށްގެންދާ މަސައްކަތްތަކަކީ ގައުމުގެ އިގްތިސާދު ސިންދަފާތުކުރުމަށް އެޅޭ ވަރަށް މުހިންމު ފިޔަވަޅެކެވެ. ނަމަވެސް، މިފަދަ ބިޔަ މަޝްރޫއުތައް ހިންގުމުގައި ދިވެހި ދައުލަތުގެ ސިޔާދަތާއި، ގާނޫނުތަކުގެ ބާރާއި، ދިވެހި ރައްޔިތުންގެ މަސްލަހަތު ހިމާޔަތްކުރުމަކީ އެންމެ ބޮޑު އިސްކަމެއް ދޭންޖެހޭ ކަންކަމެވެ.
ދިވެހި ސަރުކާރުން ބުނާ ގޮތުގައި ރަސްމާލޭގައި އީގަލް ހިލްސް ކުންފުނިން ތަރައްގީކުރާ އެކިއެކި ރިއަލް އެސްޓޭޓް އަދި ވިޔަފާރި ޕްރޮޕަޓީތައް ވިއްކުމުގެ އެންމެހައި ކަންކަން ހަމަޖެހިގެންދާނީ ދިވެހި ސަރުކާރުގެ ފުރިހަމަ ބެލުމުގެ ދަށުންނެވެ. މިގޮތުން، އެ ތަންތަން ވިއްކޭނީ ދިވެހި ސަރުކާރުން ބަލައި، ސްކްރީންކޮށް ހުއްދަ ދޭ ފަރާތްތަކަށް އެކަންޏެވެ. ކަމުގެ ހަގީގަތަކީ މިއީ ކަމަށްވާނަމަ ވަރަށް ވެސް ރަނގަޅެވެ. ރާއްޖޭގެ ސަލާމަތާއި ރައްކާތެރިކަން ކަށަވަރުކުރުމަށާއި، ބޭރުގެ އިންވެސްޓްމަންޓްތައް ރާއްޖޭގެ ގާނޫނީ އިމުގެ ތެރެއިން ހިންގުމަށް އެޅޭ ވަރަށް ހަރުދަނާ ރައްކާތެރިކަމުގެ ފިޔަވަޅެކެވެ.
މި އެއްބަސްވުމުގެ ދަށުން އެއްވެސް ބިމެއްގެ މިލްކުވެރިކަން ބޭރުގެ ފަރާތަކަށް ދާއިމީކޮށް ދޫކުރުމެއް ނުވަތަ ’ފްރީހޯލްޑް‘ އުސޫލުން ދިނުމެއް ނޯންނާނެ ކަމަށް ދިވެހި ސަރުކާރުން ބުނެއެވެ. ދިވެހިރާއްޖޭގެ ބިމަކީ ދިވެހި ރައްޔިތުންގެ ހައްގެއް ކަމުގައިވާތީ، ބިމުގެ ސިޔާދަތީ ބާރު އަބަދުވެސް ދެމިއޮންނާނީ ދިވެހި ދައުލަތުގެ އަތްމަތީގަ އެވެ. ދޫކުރެވޭނީ ހަމައެކަނި ދިގު މުއްދަތުގެ ލީސް އުސޫލުން ކަނޑައެޅޭ ވަކި މުއްދަތަކަށް ކަމަށްވުމުން، ގައުމުގެ މިލްކިއްޔާތު ގެއްލުމުގެ އެއްވެސް ބިރެއް މި މަޝްރޫއަކު ނެތެވެ.
ހަމައެހެންމެ ރަސްމާލެއިން ޕްރޮޕަޓީއެއް ގަތުމަކުން ރާއްޖޭގައި ވަޒަންވެރިވުމުގެ ނުވަތަ އެތެރެވުމުގެ އޮޓޮމެޓިކް ހައްގެއް އެއްވެސް ބޭރުގެ ފަރާތަކަށް ނުލިބޭނެ ކަމަށް ވެސް ސަރުކާރުން ބުނެއެވެ. ރާއްޖެއަށް އެތެރެވުމުގެ ވިސާ ދިނުމާއި، ވަޒަންވެރިވުމުގެ ހުއްދަ ދިނުމުގެ ފުރިހަމަ އިޚްތިޔާރު އޮންނަން ޖެހޭނީ ދިވެހި ސަރުކާރާއި ކަމާބެހޭ މުއައްސަސާތަކުގެ އަތްމަތީގަ އެވެ. ދިވެހިރާއްޖޭގެ އިމިގްރޭޝަން ގާނޫނާއި، ޓޫރިޒަމްގެ ގާނޫނުތައް މި މަޝްރޫއުގެ މައްޗަށް އެއްވެސް އިސްތިސްނާއެއް ނެތި ފުރިހަމައަށް ހިނގާނެކަން ޔަގީން ކުރަން ޖެހޭނެއެވެ.
ރަސްމާލެ ތަރައްގީކުރުމުގެ މައިގަނޑު އެއް މަގުސަދަކީ ދިވެހި ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަމަށް ދާއިމީ ހައްލެއް ހޯދައިދިނުމެވެ. އީގަލް ހިލްސްއާ އެކު ކުރިއަށްގެންދާ ވިޔަފާރި މަޝްރޫއުތަކުގެ ސަބަބުން، ދިވެހި ރައްޔިތުންނަށް ދިނުމަށް ކަނޑައަޅާފައިވާ ބޯހިޔާވަހިކަމުގެ އެއްވެސް ފުރުސަތަކަށް ނުވަތަ ބިމަކަށް އުނިކަމެއް އައުމަކީ ގަބޫލު ކުރެވޭނެ ކަމެއް ނޫނެވެ. ސަރުކާރުގެ އަމާޒަކަން ވާން ޖެހޭނީ ދިވެހި ރައްޔިތުންނަށް ލިބެންޖެހޭ ބޯހިޔާވަހިކަމުގެ ހައްގު ފުރިހަމައަށް ކަށަވަރުކޮށްދިނުމާ އެކު، ބައިނަލްއަގުވާމީ ވިޔަފާރިތަކުން އިގްތިސާދީ ފައިދާ ހޯދުމެވެ.
އުންމީދަކީ ރަސްމާލެއަކީ ދިވެހިރާއްޖޭގެ މުސްތަގުބަލު ބަދަލުކޮށްލާނެ ފަދަ ޒަމާނީ އަދި ފުރިހަމަ ތަރައްގީގެ މަރުކަޒަކަށް ވެގެން ދިއުމެވެ. އީގަލް ހިލްސް ފަދަ ދުނިޔޭގެ ފެންވަރުގެ ކުންފުނިތަކާ ގުޅިގެން މިފަދަ މަޝްރޫއުތައް ކުރިއަށްގެންދަންވާނީ ގައުމީ ސަލާމަތާއި ގާނޫނީ ހަމަތަކުގެ އެންމެ މަތީ މިންގަނޑުތައް ހިފަހައްޓައިގެންނެވެ. އެހެންކަމުން މި މަޝްރޫއުގެ ފުރިހަމަ ބާރާއި ކޮންޓްރޯލް ދިވެހި ދައުލަތަށް އޮތުމަކީ ގައުމުގެ މިނިވަންކަމާއި ރައްޔިތުންގެ ލާބައަށް ކޮންމެހެން މުހިންމު ކަމެކެވެ.
