އިހްތިރާމް އަދާކުރުމުގެ ގައުމީ މަޝްރޫއުގެ ކަންކަން ވިލަރެސްކޮށް ހިންގުން ހަރުދަނާކުރުމަށްޓަކައި ރައީސުލްޖުމްހޫރިއްޔާގެ ހާއްސަ ވިލަރެސް ކޮމިޓީއެއް އެކުލަވާލައި، އެ ކޮމިޓީގެ ފުރަތަމަ ބައްދަލުވުން ބާއްވައިފިއެވެ.
މި ބައްދަލުވުން ކުރިއަށް ގޮސްފައިވަނީ ފަންނާއި ސަގާފަތާއި ތަރިކައާ ބެހޭ ވުޒާރާގައެވެ.
އިހްތިރާމް އަދާކުރުމުގެ ގައުމީ މަޝްރޫއަކީ ރައީސުލްޖުމްހޫރިއްޔާގެ ރިޔާސީ ވައުދުފުޅެއްގެ އިތުރުން އެމަނިކުފާނު ވަރަށް ހާއްސަ އިސްކަމެއް ދެއްވައިގެން ކުރިއަށްގެންދަވާ ގައުމީ މުހިންމު މަޝްރޫއެކެވެ. ކޮމިޓީގެ އިރުޝާދުގެ ދަށުން ފުރަތަމަ ބައްދަލުވުން ބާއްވާފައިވާއިރު، މި ކެމްޕެއިން ފެށުމަށްޓަކައި ވާންޖެހޭ އެންމެ ފަހުގެ ތައްޔާރީތައް ވުޒާރާގެ ފަރާތުން މިހާރު ދަނީ ވަމުންނެވެ.
މި މަޝްރޫއުގެ ވިލަރެސް ކޮމިޓީ އެކުލެވިގެންވަނީ ސަރުކާރުގެ މުހިންމު ވުޒާރާތަކާއި މީޑިއާގެ އިސް ފަރާތްތައް ހިމެނޭހެން ޖުމްލަ 9 މެންބަރުންގެ މައްޗަށެވެ. އެގޮތުން ކޮމިޓީގައި ހިމެނިވަޑައިގަންނަވަނީ:
- ފަންނާއި ސަގާފަތާއި ތަރިކައާ ބެހޭ ވުޒާރާ: ޑެޕިއުޓީ މިނިސްޓަރ އިބްރާހިމް ސޮބާހް
- ދާޙިލީ ސަލާމަތާއި، މަސައްކަތްތެރިކަމާއި ފަންނިއްޔަތާ ބެހޭ ވުޒާރާ: ޑިރެކްޓަރ ނަސްރީނާ އިދްރީސް
- ދިފާޢީ އަދި ވަޠަނީ ޚިދުމަތާ ބެހޭ ވުޒާރާ: ކެޕްޓަން އަލީ ފަހުމީ
- ތަޢުލީމާއި މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވުޒާރާ: އެޑިއުކޭޝަން ސްޕްރިންޓެންޑެންޓް މުޙައްމަދު ނާތީމް
- މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާ: ޑެޕިއުޓީ މިނިސްޓަރ އަޙްމަދު އައިމަން
- ސިއްޙަތާއި ޢާއިލާއާއި އިޖުތިމާޢީ އެހީއާއި ބެހޭ ވުޒާރާ: ޑެޕިއުޓީ މިނިސްޓަރ މަރްޔަމް ލަހުފާ ޙަލީލް
- އިސްލާމީކަންތައްތަކާއި ބެހޭ ވުޒާރާ: ވާއިޡް އައްޝައިޚް އަޙްމަދު ފަހުމީ ދީދީ
- ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާ: ޑިރެކްޓަރ ޝާދިޔާ އަޙުމަދު
- ޕަބްލިކް ސާވިސް މީޑިއާ (ޕީއެސްއެމް): އެގްޒެކެޓިވް ޑިރެކްޓަރ އިބްރާހިމް އިޤްބާލް
ފުރަތަމަ ބައްދަލުވުމުގައި، އިހްތިރާމް އަދާކުރުމުގެ ގައުމީ މަޝްރޫއު ކުރިއަށްގެންދަން ރޭވިފައިވާ ގޮތްތަކާއި، މި މަޝްރޫއުގައި ކޮމިޓީން އަދާކުރާނެ ދައުރާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާކޮށްފައެވެ. އަދި މަޝްރޫއު އެންމެ ފުރިހަމަ ގޮތުގައި ކުރިއަށް ގެންދިއުމަށް އަޅަންޖެހޭ ފިޔަވަޅުތަކާއި، ކަމާގުޅޭ އިދާރާތައް ގުޅިގެން މަސައްކަތްތައް ރޭވުމާ ގުޅޭގޮތުން ވެސް މެންބަރުންގެ މެދުގައި ހިޔާލު ބަދަލުކުރައްވާފައިވެއެވެ.
