ދިވެހި ސަރުކާރުން ތައާރަފުކޮށްފައިވާ ”މޯލްޑިވްސް ޕާލް ރެޒިޑެންސީ“ ޕްރޮގްރާމާ ގުޅޭ މައުލޫމާތު ސާފުކުރުމަށް އަދާލާތު ޕާޓީގެ އިސްވެރިން އިކޮނޮމިކް މިނިސްޓަރު މުހައްމަދު ސައީދާ ބައްދަލުކުރައްވައިފިއެވެ.
އަދާލަތު ޕާޓީން ބުނެފައިވަނީ، ދިވެހި ސަރުކާރުން ތައާރަފުކޮށްފައިވާ ”މޯލްޑިވްސް ޕާލް ރެޒިޑެންސީ“ ޕްރޮގްރާމާ ގުޅިގެން އަދާލަތު ޕާޓީގެ ފަރާތުން ސާފުކުރަން ބޭނުންވާ މުހިންމު ކަންކަން އޮޅުންފިލުވުމަށްޓަކައި، ޕާޓީގެ ރައީސް އައްޝައިޚް މުޙައްމަދު ޝިފާންގެ އިތުރުން އިސް ލީޑާރޝިޕުން ވަޒީރު މުޙައްމަދު ސައީދާ ބައްދަލުކުރައްވާފައިވާ ކަމަށެވެ.
އެހެންނަމަވެސް، އެ ބައްދަލުވުމުގެ ތަފްސީލުތަކެއް އެ ޕާޓީން ހާމަކޮށްފައިނުވެއެވެ.
ރާއްޖޭގައި ހިންގާ ވަކި ހާއްސަ ރިއަލް އެސްޓޭޓް މަޝްރޫއުތަކުން ޕްރޮޕަޓީއެއް ގަނެގެން ރާއްޖޭގެ ރެޒިޑެންސީ ލިބޭ ގޮތަށް ހާއްސަ ވިސާއެއް ބޭރުގެ ފަރާތްތަކަށް ދޫކުރާ ގޮތަށް ސަރުކާރުން ފެށި އެ މަޝްރޫއު ފަރުމާކުރަން ހަވާލުކުރީ، ޑރ. މުހައްމަދު މުއިއްޒު ސިންގަޕޫރަށް ކުރެއްވި ރަސްމީ ދަތުރުފުޅުގައި ބޭއްވި އިންވެސްޓާ ފޯރަމްގެ ތެރެއިން، ”ހެންލީ އެންޑް ޕާޓްނާސް“ ކުންފުންޏަށެވެ.
”މޯލްޑިވްސް ޕާލް ރެޒިޑެންސީ“ގެ ނަމުގައި ހިންގާ ރެޒިޑެންސް-ބައި-އިންވެސްޓްމެންޓް ޕްރޮގްރާމަކީ ކަޅު ފައިސާ ދޮވުމަށާއި ޓެކްސްއަށް މަކަރު ހެދުމަށް މަގުފަހިވާގޮތަށް، ރާއްޖޭގެ ސިޔާދަތީ ބާރުތަކަށް ނުރައްކާވާ ކަމެއް ކަމަށް ބުނެ މީގެ ކުރިން އެމްޑީޕީގެ ޕީޖީން ވަނީ މަޖިލީހަށް މައްސަލައެއް ވެސް ހުށަހަޅައިފައެވެ. އެ މައްސަލަ މަޖިލީހުން ވަނީ ބޭރުކޮށްލައިފައެވެ.
ޕާލް ރެޒިޑެންސީ މަޝްރޫއުގެ ސަބަބުން ގައުމުގެ ސިޔާދަތަށް ނުރައްކާވާނެ ކަމަށް ބުނެ ފާޑުކިޔުން އަމާޒުވެފައިވާއިރު، ރަސްމާލޭގެ ބޮޑު ބައެއް ޔޫއޭއީގެ އީގަލްސް ހިލްސް ކުންފުންޏަށް ދިނުމަކީ ވެސް ބޭރުގެ ފަރާތްތައް ރާއްޖޭގައި ވަޒަންވެރިވުމަށް ޖާގަ ލިބޭ، ގައުމުގެ ސިޔާދަތަށް ގެއްލުންވާނެ ކަމެއް ކަމަށް ބުނެ ދީނީ އިލްމުވެރިން ވެސް ދަނީ ކަންބޮޑުވުން ފާޅުކުރަމުންނެވެ.
