ދިވެހިރާއްޖެއަށް އައި ނޭޕާލްގެ ދެ މީހެއްގެ ހަށިގަނޑުގެ ތެރޭގައި ރައްކާކޮށްގެން މަސްތުވާތަކެތި އެތެރެކުރަން އުޅެނިކޮށް އަތުލައިގަނެ، އެ މީހުންގެ ބަންދަށް ކްރިމިނަލް ކޯޓުން 30 ދުވަސް ޖަހައިފި އެވެ.
މި މައްސަލައިގައި މި 25 ވަނަ ދުވަހު ވެލާނާ އިންޓަނޭޝަނަލް އެއާޕޯޓުން ފުލުހުންގެ ބެލުމުގެ ދަށަށް ގެންދިޔައީ، ނޭޕާލަށް ނިސްބަތްވާ އުމުރުން 40 އަހަރުގެ އީތުރާނީ ގަލެ އަދި 47 އަހަރުގެ ނިއްކަ ތަމަންގް އެވެ.
ކްރިމިނަލް ކޯޓުގެ ވެބްސައިޓުގައިވާ ބަންދު އަމުރުން އެނގޭ ގޮތުގައި، މި ދެ މީހުން ބަލައި ފާސްކުރީ އެއާޕޯޓަށް އައި ވަގުތު އެމީހުންގެ ހަރަކާތްތައް ހުރި ގޮތުން ކަސްޓަމްސްގެ އޮފިސަރުންނަށް ޝައްކުވެގެންނެވެ. އަދި އެއަށް ފަހު ދެ މީހުންގެ ކަންކަން، އިތުރަށް ބެލުމަށްޓަކައި ހެދި ސްކޭންގެ ނަތީޖާއިން އޭނާގެ ހަށިގަނޑުގެ އެތެރޭގައި ”ފޮރިން ބޮޑީސް“ ހުރިކަމަށާއި، އެއީ މަސްތުވާތަކެތިކަމަށް ބެލެވޭ ކަމަށް ޑޮކްޓަރު ވަނީ ލަފާދީފައެވެ.
ފުލުހުން ބުނި ގޮތުގައި، ހޮސްޕިޓަލުގައި ބައިތިއްބައިގެން އެ ދެ މީހުން ބޮޑުކަމުދިއުމުގެ ތެރެއިން މިހާތަނަށް ޖުމްލަ 142 ބުލެޓް ވަނީ ފެނިފަ އެވެ. އަދި އަތުލައިގަނެވުނު މަސްތުވާތަކެތީގެ ޖުމްލަ ބަރުދަނުގައި ގާތްގަނޑަކަށް 1.5 ކިލޯ ހުރިކަމަށް ފުލުހުން ބުނެއެވެ.
ކޯޓު އަމުރުގައި އިތުރަށް ބަޔާންކޮށްފައިވާ ގޮތުގައި، ކޯޓަށް ހާޒިރުކުރުމާ ހަމައަށް އެއިން ކޮންމެ މީހެއްގެ ހަށިގަނޑުން 650 ގްރާމްގެ މަގުން، 53 ބުލެޓް ވަނީ ނެގިފައެވެ.
ކްރިމިނަލް ކޯޓުގައި ބޭއްވި ބަންދު މުއްދަތު މަޖިލީހުގައި މި ދެ މީހުންނާ މުއާމަލާތް ކޮށްފައިވަނީ ތަރުޖަމާނެއްގެ އެހީގައެވެ.
