ރާއްޖޭގެ ފަތުރުވެރިކަމާއި ކާބޯތަކެތީގެ ސިނާއަތަށް އަމާޒުކޮށް ބާއްވާ އެންމެ ބޮޑު އަދި އެންމެ ދުވަސްވީ އެއް ހަރަކާތް ކަމަށްވާ 20 ވަނަ ހޮޓެލް އޭޝިއާ އެގްޒިބިޝަން އަދި އިންޓަނޭޝަނަލް ކަލިނަރީ ޗެލެންޖް ފަށައިފިއެވެ.
މި އެގްޒިބިޝަން ހުޅުވައިދެއްވީ، ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ.
އެގްޒިބިޝަން ހުޅުއްވައިދެއްވުމަށްފަހު ވަޒީރު އަމީން ވަނީ އެގްޒިބިޝަންގެ ސްޓޯލްތަކަށް ޒިޔާރަތްކުރައްވައި، އައުޓްލެޓްތަކުން ފޯރުކޮށްދޭ ޚިދުމަތްތައް ބައްލަވާލައްވާފައެވެ. އަދި ބޭރުގެ ސަޕްލަޔަރުންނާއި، ހޮޓެލް އޮޕަރޭޓަރުންގެ އިތުރުން ދާއިރާގެ ފަންނީ މީހުންގެ ބައިވެރިވުން މި އެގްޒިބިޝަނުން ވަރަށް ރަނގަޅަށް ފެންނަމުންދާކަމަށާއި މިއީ ފަތުރުވެރިކަމުގެ ސިނާއަތް ކުރިއެރުވުމުގައި މުހިންމު ދައުރެއް އަދާކުރާ އެގްޒިބިޝަނެއްކަމަށް ވަޒީރު ވިދާޅުވިއެވެ.
ސެޕްޓެމްބަރު 28 އިން 30 އަށް ކޮންމެ ދުވަހަކު ހެނދުނު 10 އިން ރޭގަނޑު 7 ޖަހަންދެން މި އެގްޒިބިޝަން ކުރިއަށްދާނެއެވެ. ރާއްޖޭގެ ފަތުރުވެރިކަމުގެ ދާއިރާއަށް ޚާއްސަކޮށްގެން ބާއްވާ މި އެގްޒިބިޝަންގައި މި އަހަރު 45 ޤައުމުން ބައިވެރިވެއެވެ. އަދި 200 ކުންފުނިން މި ފަހަރުގެ އެގްޒިބިޝަންގައި ބައިވެރިވެއެވެ. އޭގެ ތެރޭގައި ރާއްޖެއާއި ރާއްޖެއިން ބޭރުގެ ކުންފުނިތައް ހިމެނެއެވެ. މިފަހަރުގެ އެގްޒިބިޝަންގައި ވެސް، ހޮސްޕިޓަލިޓީ ދާއިރާ އާއި ރިސޯޓް ސަޕްލައި އަދި ކަލިނަރީ ދާއިރާގެ ސްޓޭކް ހޯލްޑަރުން ބައިވެރިވެއެވެ.
ރިސޯޓް އޮޕަރޭޓަރުންނާއި، ވިޔަފާރިވެރިންނާއި، ޝެފުން ފަދަ ފަރާތްތަކުގެ ބައިވެރިވުމާއެކު ކުރިއަށް ގެންދާ މި އެގްޒިބިޝަނަކީ ރާއްޖޭގައި ބާއްވާ އެންމެ ކާމިޔާބު އެއް އެގްޒިބިޝަނެވެ. މި އެގްޒިބިޝަން ބާއްވަމުންދަނީ 2008ވަނަ އަހަރުން ފެށިގެންނެވެ.
