އަމިއްލަ ފަރާތްތަކަށް ބިން މިލްކު ކުރެވޭގޮތް ހެއްދެވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ކަމަށާއި މިހާރުވެސް އަމަލުކުރަމުން ދަނީ ގާނޫނުތަކާއި އެއްގޮތަށް ކަމަށް ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެއެވެ.
ފަލާހު އެކްސްގައި ހިއްސާ ކުރެއްވި ޕޯސްޓެއްގައި ވަނީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އެމަނިކުފާނު ރާއްޖޭގެ ބިން ބޭރުގެ ފަރާތްތަކަށް މިލްކު ކުރެވޭ ގޮތަށް ގާނޫނަށް ގެނެއި ބަދަލު ތަސްދީގު ކުރައްވައި ދެއްކެވި ވާހަކަފުޅު ހިއްސާ ކުރައްވާފައެވެ. އެގޮތުން އެމަނިކުފާނު އޭރު ވިދާޅުވީ އެ އިސްލާހާއެކު ކުރިމަގުގައި ރައްޔިތުންނަށް ވަރަށް އުފާވެރި ދުވަސްތަކެއް ލިބިގެންދާނެ ކަމަށް އުއްމީދުކުރައްވާ ކަމަށެވެ.
ގާނޫނުއަސާސީއަށް ގެނެއި އިސްލާހަކީ އަމިއްލަ ފަރާތްތަކަށް ބިން މިލްކުކުރެވުމުގެ އިސްލަހެއް ކަމަށާއި، މިއީ ދުނިޔޭގެ އެހެން ގައުމުތަކުގައި ކުރާ ކަމެއް ކަމަށް ޔާމީން އޭރު ވިދާޅުވިއެވެ. ބިމެއް އަމިއްލަކުރުމުގެ ބޭނުމަކީ އެ ބިމަށް ލިބެންޖެހޭ ފުރިހަމަ އަގު ލިބިގެން ދިޔުން ކަމަށް ފާހަގަކުރައްވާ ޔާމީން އޭރު ވިދާޅުވީ ދިގު މުައްދަތަށް ބިން ދިނުމަކުން ހާރިޖީ ސިޔާސަތައް ބަދަލެއް ނާންނާނެ ކަމަށެވެ.
މިކަމާއި ގުޅިގެން ފަލާހު ލިޔުއްވާފައިވަނީ ކުރީގެ ރައީސް ޔާމީނު ވެރިކަން ކުރިއިރު އެކަމަކީ ގާނޫނުއަސާސީއާއި ގާނޫނުތަކުން ހުއްދަ ކަމެއް ކަމަށެވެ. ފަލާހު ވިދާޅުވީ މިއަދުވެސް އަމަލުކުރަމުންދަނީ އެ ގާނޫނުތަކަށް ކަމަށެވެ.
”މިއަދު މިޤަޢުމަށް މިއަދުގެ ރައީސް މުޢިއްޒު މިޤަޢުމުގެ އިސްތިޤުލާލަށް އުނިކަމެއް ނުގެނެސް އެއްވެސް ރައްޔިތެއްގެ ހައްޤެއް ނުގެއްލި ދަޢުލަތަށް ކުޑަވެސް ގެއްލުމެއް ނާންނާނެގޮތަށް މިގެންނަމުންދާ ތަރައްޤީއާއި އިންވެސްޓްމެންޓްތަށް ހުއްޓުވަން ތިކުރާ މަސައްކަތުން އަންގައިދެނީ ޔާމީނުގެ ހިތުގައި ރައީސްމު މުޢިއްޒުގެ މައްޗަށް އޮތް ހަސަދަވެރިކަން“
ފަލާހު ވިދާޅުވީ މިކަމުން އެނގިގެން ދަނީ ރައީސް ޔާމީން މި ގައުމަށް އެއްވެސް ހެވެއް ނޭދޭކަން ކަމަށެވެ.
ކޮންމެ ރައްޔިތަކު ޔާމީނާއި އަދި އެފަދައިން ޤަޢުމަށް ނިކަމެތިކަން ދޭން މަސައްކަތްކުރާ ހުރިހާ ”ޚާއިނުންނަށް“ ނޫނެކޭ ބުންނަން ޖެހޭ ކަމަށް ފަލާހު ވިދާޅުވިއެވެ.
