ރާއްޖެއަށް މިހާތަނަށް ގެންނަ އެންމެ ބޮޑު އިންވެސްޓުމެންޓާއެކު ރަސްމާލޭގައި ތަރައްގީކުރާ ވޯޓާ ފްރަންޓު އަދި މެރީނާ ތަރައްގީކުރާ އީގަލް ހިލްސް ކުންފުންޏަށް ދިވެހިންގެ އިތުބާރު އެބައޮތް ކަމަށް އެ ކުންފުނީގެ ވެރިޔާ މުހައްމަދު އަލައްބާރު ވިދާޅުވެއްޖެ އެވެ.
ރަސްމާލެއަށް އެ ކުންފުނިން ގެންނަން ނިންމާފައިވާ ތަރައްގީގެ ކުލަވަރުތައް ފެންނަ ވީޑިއޯއެއް އިންސްޓަގްރާމުގައި ހިއްސާކުރައްވަމުން، ދުބާއީ މޯލް އަދި ބުރުޖު ހަލީފާ ބިނާކުރި އިމާރު ޕްރޮޕަޓީސްގެ ވެސް ވެރިޔާ އަލައްބާރު ވިދާޅުވީ ރަސްމާލެއަށް 12 ބިލިއަން ޑޮލަރުގެ ބޮޑު އިންވެސްޓުމެންޓެއް ކުރުމަކީ ލިބޭ ބޮޑު ފަހުރެއް ކަމަށެވެ. އަދި މި މަޝްރޫއާ އެކު ދިވެހިންގެ ފުރިހަމަ އިތުބާރު އެ ކުންފުންޏަށް އޮތްކަން އޭނާ ފާހަގަކުރެއްވި އެވެ.
އަލައްބާރު ވަނީ އެ ސަރަހައްދު ތަރައްގީކޮށް ނިމޭއިރު ހުންނާނެ ގޮތުގެ ތަސައްވަރު ހާމަކުރައްވައި، މަސައްކަތުގައި ކާމިޔާބީއަށް އެދިވަޑައިގެން ދުއާކުރައްވާފަ އެވެ. ”މާތްﷲ މިކަމުގައި އަޅުގަނޑުމެންނަށް ތައުފީގު ދެއްވާށި،“ އަލައްބާރު ވިދާޅުވި އެވެ.
ރާއްޖޭގެ ގުދުރަތީ ރީތިކަމަށް ތައުރީފު ކުރައްވަމުން އަލައްބާރު ވިދާޅުވީ ދުނިޔޭގައި އޮތީ އެންމެ ދިވެހިރާއްޖެ ކަމަށާއި އެންމެން ވެސް ރާއްޖެއަށް ޒިޔާރަތްކުރަން ބޭނުންވާ ކަމަށެވެ. ”ރާއްޖެ އަކީ މި ދުނިޔެމަތީ އޮތް އެންމެ ހިތްގައިމު މަންޒިލް. އެންމެ ފުރިހަމަ ޗުއްޓީއެއް ހޭދަކުރުމުގެ ފުރުސަތު ލިބޭތަން،“ އޭނާ ވިދާޅުވި އެވެ. އަދި މި ހުރިހާ ހިތްގައިމުކަމަކާއެކު ރާއްޖޭގައި ދިރިނޫޅެންވީ ސަބަބަކާ މެދު ވެސް އޭނާ ސުވާލު އުފެއްދެވި އެވެ.
