ފަތުރުވެރިކަމުގެ ބޭނުންތަކަށް ރަށްތައް 99 އަހަރުގެ ދިގު މުއްދަތަކަށް ކުއްޔަށް ދޫކުރެވޭ ގޮތަށް ގާނޫނަށް ބަދަލު ގެނައީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ.
ރަސްމާލޭގައި ކުރިއަށްގެންދިއުމަށް ރާވާފައިވާ ”މޯލްޑިވްސް ވޯޓާ ފްރަންޓް އެންޑް މެރީނާ ޕްރޮޖެކްޓް“ ގެ ދަށުން ޔުނައިޓެޑް އަރަބް އެމިރޭޓްސް (ޔޫއޭއީ) ގެ މަޝްހޫރު ކުންފުންޏެއްކަމަށްވާ އީގަލް ހިލްސްއަށް 500 ހެކްޓަރުގެ ބިން 99 އަހަރަށް ދޫކުރުމަށް ސަރުކާރުން ވަނީ ނިންމާފައެވެ. މި އެއްބަސްވުންތަކަށް ދެން އަންނަ އެއްވެސް ސަރުކާރަކުން އަމަލު ކުރަން ނުޖެހޭކަމަށް ފާޑުކިއުން އަމާޒު ކުރައްވައި ރައީސް ޔާމީން ވަނީ އުޝާމް އަދި ހައުސިން، ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބާއި ގާނޫނު އަރާ ހަމަކުރާނެކަމަށް ވިދާޅުވެފަ އެވެ.
އެއްބަސްވުމާއި ގުޅުވައި ރައީސް ޔާމީން ދައްކަވާ ވާހަކަތަކަށް ރައްދު ދެއްވައި ”އެކްސް“ ގައި ކުރެއްވި ޕޯސްޓެއްގައި އުޝާމް ވިދާޅުވީ 99 އަހަރުގެ ދިގު މުއްދަތަކަށް ބިން ދޫކުރެވޭ ގޮތަށް އެންމެ ފުރަތަމަ ފަހި ކުރީ ރައީސް ޔާމީން ކަމަށެވެ. އޭރު އެމަނިކުފާނުގެ ވެރިކަމުގައި ޓޫރިޒަމްގެ ގާނޫނަށް އިސްލާހު ގެނެސް 99 އަހަރަށް ރަށްތައް ކުއްޔަށް ދެވޭ ގޮތަށް ބަދަލު ގެންނެވިކަމަށް އުޝާމް ވިދާޅުވި އެވެ.
ރައީސް ޔާމީން މިއަދު ހަނދުމަފުޅުނެތީ ކަމަށް ވެދާނެ. އެހެންނަމަވެސް ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ރައީސް ޔާމީންގެ ވެރިކަމުގައި.. ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ޤާނޫނެއް އެކުލަވާލެވުނީ 1999 ވަނަ އަހަރު. އޭރު ޤާނޫނުގެ ދަށުން ޓޫރިސްޓް ރިޒޯޓުތައް ކުއްޔަށް ދެމުން އައިސްފައިވަނީ ގިނަވެގެން 25 އަހަރު ދުވަހުގެ މުއްދަތަށް. ޤާނޫނަށް ގެނެވުނު އިސްލާހަކުން އެމުއްދަތު 50 އަހަރަށް އިތުރުކޮށްފައިވަނީ 2010 ވަނަ އަހަރު ރައީސް ނަޝީދުގެ ވެރިކަމުގަ. އަދި އެއަށްފަހު މިމުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ރައީސް ޔާމީންގެ ވެރިކަމުގައި.
އުޝާމް ވިދަޅުވީ ޓޫރިޒަމްގެ ގާނޫނު އެންމެ ފުރަތަމަ 1999 ގައި އެކުލަވާލިއިރު ކުއްޔަށް ދެވޭނެ އެންމެ ދިގު މުއްދަތަކީ 25 އަހަރުކަމަށް ވަނިކޮށް، 50 އަހަރަށް ބަދަލު ކުރީ ރައީސް މުހައްމަދު ނަޝީދު ކަމަށެވެ. އެއަށް ފަހު 2015 ގައި އެ މުއްދަތު 99 އަހަރަށް ރައީސް ޔާމީން އިސްލާހު ގެންނެވިކަން އެމަނިކުފާނުގެ ހަނދާނުގައި ނެތީތޯ އުޝާމް ސުވާލު ކުރެއްވި އެވެ.
މީގެ އިތުރުން އުޝާމް ވިދާޅުވީ، ރައީސް ޔާމީންގެ ވެރިކަމުގައި ޓޫރިޒަމް ގާނޫނުގެ 8 ވަނަ މާއްދާއަށް ގެނައި އިސްލާހުގެ ދަށުން، 99 އަހަރު ހަމަވުމަށްފަހު ރިސޯޓު ސަރުކާރަށް ނަގާއިރު އެތަނުގައި ކޮށްފައިވާ އިންވެސްޓްމަންޓުގެ އަގުން ބަލަށް ކެނޑުމަށްފަހު ބާކީވާ އަގު ދައުލަތުން އިންވެސްޓަރަށް ދައްކަން މަޖުބޫރުވާ ކަމަށެވެ. ނަމަވެސް މިހާރު ރަސްމާލޭގައި ހިންގަން ރާވާފައިވާ މަޝްރޫއަކީ އެ އުސޫލުން ހިނގާނެ ކަމެއް ނޫން ކަމަށާއި، މި މަޝްރޫއު ހިންގާނީ މިހާރު ސަރުކާރުން އެކުލަވާލަމުންދާ ރިއަލް އެސްޓޭޓްގެ އައު ގާނޫނުގެ ދަށުންކަމަށް އުޝާމް ވިދާޅުވިއެވެ.
އުޝާމް ވިދާޅުވީ ވިދާޅުވީ، އީގަލް ހިލްސް ކުންފުންޏާއެކު މިހާތަނަށް ވެފައިވަނީ ހަމައެކަނި ލެޓަރ އޮފް އިންޓެންޓް ނުވަތަ ކޮމާޝަލް ޓާމްސް އެއްބަސްވުމެއް ކަމަށެވެ. އަދި މަޝްރޫއުގެ އަމަލީ މަސައްކަތް ފެށުމުގެ ކުރިން، ދެފަރާތުގެ ދެމެދުގައި އިތުރަށް މަޝްވަރާކޮށް ޑެފިނިޓިވް އެގްރީމެންޓްތަކުގައި ސޮއިކުރަންޖެހޭނެކަމަށާއި، މިކަމަށް ބޭނުންވާ ގާނޫނީ އޮނިގަނޑު ރައްޔިތުންގެ މަޖިލީހުން ފާސްކުރަންޖެހޭނެކަމަށް ވެސް އޭނާ ވިދާޅުވިއެވެ.
