ސަރުކާރުން އީގަލް ހިލްސްއާއެކު ވެފައިވާ އެއްބަސްވުމާއި މީހުން ދެކޮޅުވާ މައިގަނޑު ސަބަބަކީ އެއްބަސްވުން އަނދިރީގައި ބާއްވައިގެން އުޅޭތީ ކަމަށް ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ ސަނީފް ވިދާޅުވެއްޖެއެވެ.
ސަންގުޓީވީގެ ”ހަބަރަށްފަހު“ ޕްރޮގްރާމްގައި ސަނީފް ވަނީ ރަސްމާލޭގައި ސަރުކާރުން ހިންގުމަށް ޔޫއޭއީގެ ކުންފުންޏާއިއެކު ވެފައިވާ އެއްބަސްވުމާއި ގުޅިގެން ވާހަކަފުޅު ދައްކަވާފައެވެ. އީގަލް ހިލްސްއާއިއެކު ސަރުކާރުން އެއްބަސްވުމެއް ގާއިމްކޮށްފައިވާއިރު މިކަމުގައި ސުވާލު އުފެދޭ އެތައް ކަމެއް ހުރި ކަމަށް ސަނީފް ވިދާޅުވިއެވެ. އޭނާ ވިދާޅުވީ ހަގީގަތަކީ މި މަޝްރޫއުއާއި ބަޔަކު ދެކޮޅުވަނީ ނޫން ކަމަށާއި މިފަދަ ބޮޑެތި މަޝްރޫއުއެއް ކުރިއަށް ދާއިރު ރާއްޖޭގެ ރައްޔިތުން މިކަމާއި މެދު ދެކޭ ގޮތްވެސް ދެކުން މުހިންމު ކަމަށެވެ.
ސަނީފް ވިދާޅުވީ ރައްޔިތުންގެ ހިޔާލުވެސް މުހިންމު ވަނީ މީގެ ކުރިން ތަޖުރިބާކުރެވިފައިވާ ކަންކަމުގެ މައްޗަށް ބިނާކޮށް ކަމަށެވެ. އެގޮތުން މީގެ ކުރިން އިނގިރޭސިންގެ އަތް ދަށަށް ރާއްޖޭގެ ބައެއް ބިންތައް ދިނުމާއި އެފަދަ ކަންކަން ކުރި ނަމަވެސް ރާއްޖޭގައި ބޭރުގެ އަސްކަރީ ބޭސްތައް ހެދުމަށް އެދުމާއި، ޖީއެމްއާރާއި، ފ އަތޮޅުގައި ހިންގަން އުޅުނު މަޝްވަރާތައްވެސް ސަނީފް ފާޙަގަކުރެއްވިއެވެ.
ސަނީފް ވިދާޅުވީ، ދެންހުރި 2 ބްރިޖު، އަދި ހައުސިންގ މަޝްރޫއުއަށް ބަލާނަމަ މިއީ މުޅިން ތަފާތު ކަމެއް ކަމަށެވެ. އެކަން ކުރަނީ ލޯނު ނަގައިގެން އަލުން ދައްކާ އުސޫލުން ކަމަށް ސަނީފް ވިދާޅުވިއެވެ. ސަނީފް ވިދަޅުވީ މިއަދު ސުވާލު އުފެދެނީ އެއްބަސްވުން އާއްމު ނުކުރަތީ ކަމަށާއި، އޭގައި ލިޔެފައި އޮތް އެއްޗެއް ނޭންގޭތީ ކަމަށެވެ.
”ރައްޔިތުންގެ ހުރި ބޮޑެތި ކޮންސާންތަކަކީ ހަގީގަތުގައި ކިތަންމެ ރަނގަޅުކަމެއް ވީނަމަވެސް، އަދި ކިތަންމެ ގޯސްކަމެއް ވިޔަސް އޭގައި ހުރި އެއްޗެހިތަކެއް ސާފު އިބާރާތުން ދައުލަތާއީ އީގަލްސް ހިލްސް ކުންފުންޏާއި އެއްކޮށް ވެފައިވާ އެއްބަސްވުމުގައި އޮތް އެއްޗެއް ނޭންގި އަޅުގަނޑުމެންނަށް މިކަމަށް ވާހަކަ ދައްކަން ވީމާ، އުނދަގޫތަކެއް ވާތީ. ދެ ފަރާތުން ވެސް މިކަމާއި ވާހަކަ ދައްކަން ޖެހެނީ މީގައި އެންމެ އިންސާފުވެރި ގޮތަކަށް ނޫން“
ސަނީފް ވިދާޅުވީ މިއީ އަސްކަރީ ކަންކަމާއި ގުޅޭ އެއްބަސްވުމެއް ނޫން ކަަމަށާއި، އެހެން ނަމަ މި އެއްބަސްވުމުގައި ފޮރުވާނެ އެއްޗެއް އޮވެގެން ނުވާނެ ކަމަށެވެ. އެހެންކަމުން އީގަލް ހިލްސްއާއެކު ވެފައިވަނީ ގައުމީ ސަލާމަތާއި ގުޅޭ އެއްބަސްވުމެއް ނޫންކަން ފާޙަގަކުރައްވާ އޭނާ ވިދާޅުވީ ސަރުކާރުން މިއީ ރާއްޖޭގެ ތަރައްގީއާއި ގުޅޭ ޕްރޮޖެކްޓެއް ކަމަށް ބުނާއިރު، އެއްބަސްވުން ފޮރުވާފައި ބާއްވަން ޖެހޭ އެއްވެސް ސަބަބެއް ނެތް ކަމަށް އޭނާ ވިދާޅުވިއެވެ.
މީގެ އިތުރުން ރައީސް ޑރ. މުހައްމަދު މުއިއްޒު މި އެއްބަސްވުން ހާމަނުކޮށް، މިކަން ހިނގީ ބޮޑަށް ސިއްރިއްޔާތުގައި ހިނގާ ފަދަ ކަމެއްގެ ގޮތުގައި ކަމަށް ސަނީފް ވިދާޅުވިއެވެ. އޭނާ ވިދާޅުވީ ރާއްޖޭގެ އެއްވެސް ބަޔަކަށް މިކަން ކުރަން އުޅޭ ކަމުގެ އެއްވެސް މައުލޫމާތެއް ނުވަތަ ހިލަމެއްވެސް ނުވާ ކަމަށާއި، އެހެން ނަމަވެސް ފޮރިންގ އިންވެސްޓްމެންޓްގެ ގާނޫނު ފަދަ އެކި ގާނޫނުތަކަށް ބަދަލުތައް ގެނެއި ކަމަށެވެ. އޭގެން ހާމަވާ ކަމަކީ އޭރުވެސް މިކަން ސަރުކާރުން ސިއްރިއްޔާތުގައި ކުރުމަށް މަސައްކަތް ކުރަމުން އައި ކަން ކަމަށް ސަނީފް ވިދާޅުވިއެވެ.
