ޤައުމީ އެއާލައިން މޯލްޑިވިއަންގެ އައު ސީޕްލޭން ޓާމިނަލް ރަސްމީކޮށް ހުޅުވައިފިއެވެ.
މި ޓާމިނަލް ރަސްމީކޮށް ހުޅުއްވައިދެއްވީ އެކަމަށްޓަކައި ބޭއްވި ޚާއްޞަ ރަސްމިއްޔާތެއްގައި ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ. މި ރަސްމިއްޔާތުގައި މޯލްޑިވިއަން ހިންގާ އައިލެންޑް އޭވިއޭޝަން ސާވިސަސްގެ މެނޭޖިން ޑިރެކްޓަރު އިބްރާހިމް އިޔާސްއާއި އެ ކުންފުނީގެ އިސްވެރިން ބައިވެރިވެވަޑައިގެންނެވިއެވެ.
މޯލްޑިވިއަންގެ އައު ސީޕްލޭން ޓާމިނަލަކީ މުޅި އިމާރާތް އެއްކޮށް ޒަމާނީ ފެންވަރަށް ބަދަލުކޮށް، ލަގްޒަރީ ފެންވަރުގެ ޚިދުމަތްތަކެއް ލިބޭނޭހެން ތަރައްޤީކޮށްފައިވާ ތަނެކެވެ. އަދި މި ޓާމިނަލް ފަރުމާކޮށްފައިވަނީ ރިސޯޓުތަކާއި އެހެނިހެން ހިއްސާދާރުންނާ ގާތުން މަޝްވަރާކޮށް، ފަތުރުވެރިންނަށް އެންމެ ފުރިހަމަ ތަޖުރިބާއެއް ފޯރުކޮށްދިނުމުގެ މަޤްޞަދުގައި ކަމަށް މޯލްޑިވިއަނުން ވަނީ ބުނެފައެވެ.
މޯލްޑިވިއަނުން ބުނީ މި ޓާމިނަލުގެ އެތެރޭގައި ޖުމުލަ 90 މީހުންނަށް އެއްފަހަރާ ޚިދުމަތްދެވޭނެ ކަމަށާއި، އަދި ޓާމިނަލުގެ ބޭރުގައި އެއްފަހަރާ 40 މީހުންނަށް ޚިދުމަތްދެވޭނެ ކަމަށެވެ.
ދެ ފަންގިފިލާގެ މައްޗަށް އެކުލެވޭ މި ޓާމިނަލުގައި މޯލްޑިވިއަންގެ ސުވެނިއާ އާއި ކާބޯތަކެތި ހުންނަ ކިއޯސްކެއް ވެސް ހުންނާނެ ކަމަށާއި އެއް ފަހަރު ބޭނުންކުރުމަށް ފަހު އުކައިލާ ޕްލާސްޓިކު ރީސައިކަލްކުރެވޭނެ ގޮތް ވެސް ޓާމިނަލުގެ ތެރޭ ހަމަޖެހިފައިވާ ކަމަށް، މޯލްޑިވިއަނުން މައުލޫމާތުދެއެވެ.
އޭގެ އިތުރުން މޯލްޑިވިއަންގެ ”ހުވަނދުމާ“ ލައުންޖު ހިމެނޭހެން މަތީ ފަންގިފިލާގައި ޕްރައިވެޓް ދެ ލައުންޖެއް ހިމެނޭނެ ކަމަށާއި، ކުޑަކުދިން ކުޅޭނެ ޚާއްސަ ސަރަހައްދެއް ވެސް ސީޕްލޭންގެ ތެރޭ ގާއިމުކޮށްފައިވާނެ ކަމަށް، އެ ކުންފުނިން ވަނީ ބުނެފައެވެ.
