ވާޖިބު އަދާކުރަމުން ދަނިކޮށް މަރުވާ ފުލުހުންގެ އާއިލާތަކަށް ވެސް ފުލުހުންގެ ޚިދުމަތުން ބޭސްފަރުވާ ކޮށްދޭ ގޮތަށް ގަވާއިދަށް އިސްލާހު ގެނެސްފިއެވެ.
މި ގެނެވުނު އިސްލާހުގެ ދަށުން، ވާޖިބު އަދާކުރަނިކޮށް ނިޔާވާ ފުލުހުންގެ ޖަނާޒާ، އެގްޒެކެޓިވް މެނޭޖްމަންޓު ބޯޑުން ނިންމާ ގޮތެއްގެ މަތިން ރަސްމިއްޔާތެއްގެ ގޮތުގައި ބޭއްވޭ ގޮތަށް ވެސް މިހާރު ވަނީ ހަމަޖައްސާފައެވެ.
ގަވާއިދުގައި ބުނެފައިވާ ގޮތުގައި ވާޖިބް އަދާ ކުރަނިކޮށް މަރުވާފުލުހުންގެ އާއިލާއަށް ބޭސްފަރުވާ ދޭން ނިންމަންވާނީ ފުލުހުންގެ އޮފިސަރު ނިޔާވި ހާލަތާއި ދިމާވި ހާދިސާގައިކަން ހިނގި ގޮތާއި މުވައްޒަފު އަދާކުރި ދައުރަށް ބަލައި އެގްޒެކެޓިވް މެނޭޖްމަންޓު ބޯޑަށް ހުށަހަޅައި އެ ބޯޑުން ނިންމާ ގޮތުގެ މަތިން ކަމަށްއެ އިސްލާހުގައިވެއެވެ.
ތަފާސްހިސާބުތަކުން ދައްކާ ގޮތުގައި 2019 އިން 2024 އަށް ފުލުހުންނާއި ސިފައިންގެ އިތުރުން އެ ފަރާތްތަކުގެ އާއިލާތަކުގެ ބޭސްފަރުވާއަށް 1.2 ބިލިއަނަށް ވުރެ ގިނަ ރުފިޔާ ވަނީ ޚަރަދުވެފައެވެ.
ބޭސްފަރުވާއަށް ކުރާ މިފަދަ ބޮޑެތި ޚަރަދުތައް ކޮންޓްރޯލް ކުރުމަށްޓަކައި، މިހާރު ޢަމަލުކުރަމުންދާ ސްކީމް މުރާޖައާކުރުމަށް އޮޑިޓް އޮފީހުން ވަނީ މީގެ ކުރިން ލަފާދީފައެވެ.
