ބްލޮގަރު ޔާމީން ރަޝީދަށް ތޫނު އެއްޗަކުން ހަމަލާދީ މަރާލި މައްސަލަ އަލުން ބަލަން ފެށި ޝަރީއަތުގެ އަޑުއެހުންތައް ކްރިމިނަލް ކޯޓުން އެއްކޮށް ނިންމާލައިފި އެވެ.
ޔާމީން ރަޝީދު މަރާލި މައްސަލާގައި ހަ މީހެއްގެ މައްޗަށް ދައުލަތުން ދައުވާކުރި ނަމަވެސް، ކްރިމިނަލް ކޯޓުން ކުރިން ނިންމާފައިވަނީ ކުށް ސާބިތުވަނީ ދެ މީހުންގެ މައްޗަށް އެކަނި ކަމަށެވެ. އެއީ އިސްމާއިލް ހައިޝަމް ރަޝީދު އާއި އަހުމަދު ޒިހާން އިސްމާއިލް އެވެ. ނަމަވެސް މިދިޔަ ޑިސެމްބަރު މަހު ހައި ކޯޓުން ވަނީ އެ ހުކުމް ބާތިލުކޮށް، އެ ދެ މީހުންގެ ބައިގެ އިތުރުން ކުށް ސާބިތުނުވާ ކަމަށް ނިންމި މުހައްމަދު ދިފްރާން އާއި އިސްމާއިލް ރަޝީދުގެ ބައިވެސް އަލުން ބަލަން އަމުރުކޮށްފައެވެ.
މި މައްސަލަ އަލުން ފެށުމަށް އެންމެ ފުރަތަމަ އަޑުއެހުމެއް ބޭއްވީ މި އަހަރުގެ ކުރީކޮޅު އެވެ. އެއަށް ފަހު މިއަދު ކުރިޔަށް ގެންދިޔަ އަޑުއެހުމާއި އެކު ދެން މި މައްސަލައިގައި ދެން އޮންނާނީ ހުކުމް އިއްވުމުގެ މަޖިލީހެވެ.
މީގެކުރިން މި މައްސަލައިގައި ދައުވާ ލިބުނު ހ. އަންނާރުމާގޭ އިސްމާއިލް ހައިޝަމް ރަޝީދާއި މ. އިރަސްމިކުގޭ އަހުމަދު ޒިހާން އިސްމާއިލް އުމުރަށް ޖަލަށް ލުމަށް ހުކުމްކުރި ނަމަވެސް، ހައިކޯޓުން ވަނީ އެ ހުކުމް ބާތިލްކޮށް އަލުން ބެލުމަށް އަމުރުކޮށްފައެވެ. ހަމައެއާއެކު، ކުރިން ކުށް ސާބިތުނުވި ގދ. ގައްދޫ ސިންދުބާދުގޭ މުހައްމަދު ދިފްރާނާއި މ. ތާއިފް އިސްމާއިލް ރަޝީދުގެ ބައިވެސް އަލުން ބެލުމަށް ހައިކޯޓުން އޮތީ އަންގައިފައެވެ.
މައްސަލައިގައި މިއަދު ކުރިޔަށް ގެންދިޔަ އަޑުއެހުމުގައި އޮތީ ދިފްރާން އަދި އިސްމާއިލް ރަޝީދުގެ މައްޗަށް ދައުލަތުންނާއި ދިފާއުން ފަހު ބަސް އިއްވުމެވެ. ދައުލަތުގެ ވަކީލުން ބުނި ގޮތުގައި، ހާދިސާ ހިނގި ރޭ އިސްމާއިލް ރަޝީދު އެގޭ ކައިރީގައި ސައިކަލުގައި މަޑުކޮށް، ހަމަލާދިން މީހުން ފިލުވުމުގައި އެހީތެރިވެދީފައިވާކަން ހެކިންގެ ބަހުން އެނގެއެވެ. އަދި މަރުގެ ރޭވުމުގައި އޭނާ ބައިވެރިވި ކަމަށާއި، ދިފްރާން ޔާމީނަށް ފާރަލުމުގައި ހަރަކާތްތެރިވި ކަމުގެ ހެކި ހުރި ކަމަށް ވިދާޅުވެ، އެ ދެ މީހުންގެ މައްޗަށް ކުށް ސާބިތުވާ ކަމަށް ކަނޑައަޅައިދިނުމަށް ދައުލަތުން އެދުނެވެ.
ދައުލަތުގެ ވާހަކަތަކާއި ގުޅިގެން، ދިފާއީ ވަކީލު ވިދާޅުވީ ދައުލަތުން ހުށަހެޅި ސިއްރު ހެކިންގެ ހެކިބަހަކީ އިތުބާރު ހިފޭ އެއްޗެއް ނޫންކަމަށާއި، ހެކިން ވާހަކަ ދައްކާފައިވަނީ ހީއެއްގެ މައްޗަށް ކަމަށެވެ.
މީގެއިތުރުން، ފުލުހުން ހުށަހަޅާފައިވާ ވީޑިއޯ ފުޓޭޖްތަކަކީ މީހުން ސާފުކޮށް ވަކިކުރަން ނޭނގޭ ފަދަ ދަށް ފެންވަރުގެ އެއްޗެހިކަމަށާއި، ތަހުގީގުގައި ފަރުވާކުޑަކަން ފެންނަން އޮތުމުން ދެ މީހުންގެ މައްޗަށް ކުށް ސާބިތުނުވާކަމަށް ނިންމައިދިނުމަށް ދިފާއުން އެދުނެވެ.
ހައިޝަމާއި ޒިހާންގެ ބައިގެ އަޑުއެހުންތައް ވެސް މީގެކުރިން ނިމިފައިވާތީ، ޝަރީއަތުގެ މަޖިލިސް ނިންމަވާލައްވަމުން ފަނޑިޔާރުންގެ ބެންޗުން އިއުލާނު ކުރެއްވީ ދެން އޮންނާނީ ހަތަރު މީހުންގެ މައްޗަށް އެކުގައި ހުކުމް އިއްވުން ކަމަށެވެ.
މި މައްސަލަ ބައްލަވަނީ އިސް ގާޒީ އިބްރާހިމް އިހްސާން އާއި ގާޒީ މުހައްމަދު މިސްބާހު އަދި ގާޒީ އަލީ ނަދީމެވެ. ރިޔާސަތު ބަލަހައްޓަވަނީ ގާޒީ އިހުސާނެވެ.
