ރަސްމާލެ މަޝްރޫއުގެ ބޮޑު ސަރަހައްދެއް ޔޫއޭއީގެ އީގަލް ހިލްސް ކުންފުންޏަށް ދިނުމަށް ސަރުކާރުން ނިންމި ނިންމުމާ ގުޅޭ ރަސްމީ އެންމެހައި ލިޔެކިޔުންތައް ހާމަކުރުމަށް ގޮވާލައި، ޕީޕަލްސް ނެޝަނަލް ފްރަންޓް (ޕީއެންއެފް) އިން ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ރަސްމީކޮށް ސިޓީއެއް ފޮނުވައިފި އެވެ.
ސަރުކާރަށް ފާޑުކިއުންތައް ވެސް އަމާޒުކޮށްފައިވާ މި ސިޓީގައި ޕީއެންސީން ބުނެފައި ވަނީ، ރަސްމާލޭގެ އެންމެ ވެލިފުކެއް ވެސް ބޭރުގެ އެއްވެސް ފަރާތަކަށް ދޫނުކުރާނެކަމަށް ރައީސް މުއިއްޒު ވައުދުވެ، އެއާއި ހިލާފުވެފައިވާކަމަށެވެ. އެގޮތުން ގާތްގަނޑަކަށް 20 ބިލިއަން އެމެރިކާ ޑޮލަރުގެ އަގުހުރި މި ބިޔަ މަޝްރޫއުގެ ތެރެއިން 500 ހެކްޓަރުގެ ބިން އީގަލް ހިލްސްއަށް ދިނުމަށް އެއްބަސްވެފައިވާއިރު، މި މުއާމަލާތުގެ ހަގީގީ ފައިނޭންސިން އާއި ކެޕިޓަލް އިންވެސްޓްމަންޓްގެ ތަފްސީލުތަކާއި، ބިން ދޫކުރުމުގެ ސީދާ ޝަރުތުތައް ސަރުކާރުން މިއަދާ ހަމައަށް ވެސް ރައްޔިތުންނަށް ސިއްރުކޮށްފައިވާކަމަށް ސިޓީގައި ވަނީ ބުނެފަ އެވެ.
މި މުއާމަލާތާއި ގުޅޭ 15 ކަމެއް ސާފުކޮށްދިނުމަށް އެދި ސިޓީގައި ޕީއެންއެފް ވަނީ ބިން ދޫކުރުމުގައި އާންމުކޮށް ހުޅުވާލައިގެން ވާދަވެރި ބީލަމެއް ކުރިއަށް ގެންދިޔަތޯއާއި، މި މުއާމަލާތް ފެށިގެން އައި ގޮތާއި، ވަޒީރުންގެ މަޖިލީހަށާއި އިކޮނޮމިކް ކައުންސިލަށް ހުށަހަޅައިގެން މަޝްވަރާކުރެވުނުތޯ ސުވާލުކޮށްފަ އެވެ. އަދި އީގަލް ހިލްސްގެ މާލީ އަދި ފަންނީ ޤާބިލުކަން ބެލުމަށްޓަކައި ހަދަންޖެހޭ ޑިއު ޑިލިޖެންސް ފުރިހަމަކޮށްފައިވޭތޯ ވެސް ސާފުކުރަން ވަނީ އެދިފަ އެވެ.
ސިޓީގައި 500 ހެކްޓަރުގެ ބިން އެ ކުންފުންޏަށް ދޫކުރި އަގާއި މުއްދަތުގެ އިތުރުން، އެ މުއްދަތު އިތުރުކުރެވޭނެ އުސޫލުތަކާއި، އެ ބިން އެހެން ފަރާތްތަކަށް މިލްކުކޮށްދިނުމުގެ އިހުތިޔާރު ދީފައިވޭތޯ ސުވާލުކޮށްފައި ވެއެވެ. އަދި މި މަޝްރޫއުއިން ދައުލަތަށް ލިބޭނެ ކަމަށް އަންދާޒާކުރާ އާމްދަނީގެ ތަފްސީލާއި، މިހާތަނަށް އެއްވެސް ފައިސާއެއް ލިބިފައިވާނަމަ އެކަން ހާމަކުރުމަށް ވަނީ އެދިފައެވެ.
ހަމައެއާއެކު، ބޭރުގެ ފަރާތްތަކުން އެތަނުން ތަންތަން ގަންނައިރު އެ ފަރާތްތަކުގެ ހައްގުތައް ރައްކާތެރިކުރެވޭނެ ގޮތްތަކާއި، އެއްބަސްވުމާ ގުޅިގެން އެއްވެސް މައްސަލައެއް ޖެހިއްޖެނަމަ ބެލުމުގެ ޝަރުއީ އިހުތިސާސް ލިބިގެންވަނީ ކޮން ގައުމަކަށްތޯއާއި، ރައްޔިތުންގެ މަޖިލީހުގެ އެއްވެސް ރުހުމެއް ނެތި މިފަދަ ބޮޑު ނިންމުމެއް ނިންމި ސަބަބު ހާމަކުރުމަށް ސިޓީގައި ވަނީ އެދިފަ އެވެ.
ސިޓީގައި ވަނީ، މި މުއާމަލާތުގެ ސަބަބުން ދައުލަތުން އުފުލަންޖެހިދާނެ މާލީ ބުރަތަކާއި، ކޮރަޕްޝަން ހުއްޓުވުމަށް އެޅި ފިޔަވަޅުތަކުގެ އިތުރުން، އެ ބިން ހިއްކުމަށް ދައުލަތުގެ ބަޖެޓުން ކުރި ޖުމްލަ ހަރަދުގެ ތަފްސީލު ސަރުކާރުން ހާމަކުރަންޖެހޭ ކަމަށެވެ.
