ރަސްމާލެ ހިއްކުމުގެ މަޝްރޫއުގެ ތެރެއިން ބައެއް 99 އަހަރަށް ދުބާއީގެ އީގަލް ހިލްސް ކުންފުންޏަށް ދިނުމަށް ނިންމާފައިވާ ނިންމުމާމެދު ރައްޔިތުން ދެކޭގޮތް ބެލުމަށްޓަކައި ސަންގުޓީވީގެ ފޭސްބުކް ޕޭޖުގައި ޕޯލެއް ނަގަން ފަށައިފިއެވެ.
ސަންގުޓީވީގެ ފޭސްބުކް ޕޭޖުގައި ކުރިއަށްދާ މި ޕޯލުގައި އަހާފައިވަނީ ރަސްމާލެއިން ބައެއް 99 އަހަރަށް ދުބާއީގެ އީގަލް ހިލްސް ކުންފުންޏަށް ދިނުމަށް ތާއީދުތޯ ނުވަތަ ތާއީދެއް ނުކުރޭތޯ އެވެ.
މި ޕޯލް ކުރިއަށް ގެންދިއުމަށް ހަމަޖެހިފައިވަނީ އޮކްޓޯބަރު މަހުގެ 1 ވަނަ ދުވަހުގެ ރޭގަނޑު 08:00 ގެ ނިޔަލަށެވެ.
ރަސްމާލެ މި އެއްބަސްވުމާ ގުޅިގެން ސިޔާސީ ގޮތުންނާއި އާންމުންގެ މެދުގައި ބޮޑެތި ހިޔާލުތަފާތުވުންތަކެއް ވަނީ އުފެދިފައެވެ. އެގޮތުން މި އެއްބަސްވުން ހާމަކުރުމަށާއި، ރަސްމާލެއިން 500 ހެކްޓަރަށްވުރެ ބޮޑު ބިން ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިނުމަށް ދިވެހި ސަރުކާރުން ވެފައިވާ އެއްބަސްވުމަކީ ގާނޫނުއަސާސީއާ ހިލާފު އެއްބަސްވުމެއް ކަމަށް ކަނޑައަޅައިދިނުމަށް އެދި ރައްޔިތުންގެ މަޖިލީހުގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވަނީ ސުޕްރީމް ކޯޓަށް ދުސްތޫރީ މައްސަލައެއް ވެސް ހުށަހަޅުއްވާފައެވެ.
ޕޯލްގެ ލިންކު: https://www.facebook.com/share/p/1KQuw78Svd/
މީގެއިތުރުން، ބަޖެޓުން ބޭރުން ރަސްމާލެ ހިއްކުމުގެ މަސައްކަތް ކުރިއަށްގެންދިއުމާއި، އެއްވެސް ބިޑް ކުރުމަކާ ނުލައި އީގަލް ހިލްސްއާއެކު އެއްބަސްވުމެއްގައި ސޮއިކޮށްފައިވާތީ، މި މުއާމަލާތުގައި ކޮރަޕްޝަން އެކުލެވޭކަމަށް ތުހުމަތުކޮށް އަލީ ހުސައިން ވަނީ މި މައްސަލަ އެންޓި-ކޮރަޕްޝަން ކޮމިޝަން (އޭސީސީ) އަށް ހުށަހަޅުއްވާފައެވެ.
މިކަމާ ގުޅިގެން އެޓާނީ ޖެނެރަލް އަހުމަދު އުޝާމް ވިދާޅުވީ، ”މޯލްޑިވްސް ވޯޓާފްރޮންޓް އެންޑް މެރީނާ މަޝްރޫއު“ ހިންގަން އީގަލް ހިލްސްއާއެކު މިހާތަނަށް ސޮއިކޮށްފައިވަނީ ހަމައެކަނި ލެޓާ އޮފް އިންޓެންޓް (ކޮމާޝަލް ޓާމްސް އެގްރީމެންޓެއް) ގައި ކަމަށެވެ. އަދި މަޝްރޫއު އަމަލީ ގޮތުން ފެށޭނީ އެ އެގްރީމެންޓުގައިވާ ޓާމްސްތަކުގެ މައްޗަށް ބިނާކޮށް، އިތުރަށް މަޝްވަރާކުރުމަށްފަހު އެކުލަވާލާ ޑެފިނިޓިވް އެއްބަސްވުންތަކެއްގައި ސޮއިކޮށްގެން ކަމަށް ވިދާޅުވިއެވެ.
އުޝާމް އިތުރަށް ފާހަގަކުރެއްވި ގޮތުގައި، ރަސްމާލޭގައި ހިންގަން ރާވާފައިވާ މި މަޝްރޫއު ގަވަން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުންނެވެ. އެހެންކަމުން މަޝްރޫއު ފެށުމުގެ ކުރިން މިކަމާ ގުޅުންހުރި ގާނޫނުތައް ރައްޔިތުންގެ މަޖިލީހުން ފާސްކުރަންޖެހޭނެ ކަމަށްވެސް އޭނާ ވަނީ ވިދާޅުވެފައެވެ.
