ޔުނައިޓެޑް އެރަބް އެމިރޭޓްސް (ޔޫއޭއީ)ގެ އީގަލް ހިލްސްއާ ގުޅިގެން ރަސްމާލޭގައި ތަރައްގީކުރާ ”މޯލްޑިވްސް ވޯޓަރފްރަންޓް އެންޑް މެރީނާ“ މަޝްރޫޢުގެ 10 އަހަރުގެ ތަރައްޤީގެ މުއްދަތުގައި ދައުލަތަށް 11 ބިލިއަން އެމެރިކާ ޑޮލަރަށް ވުރެ ބޮޑު އާމްދަނީއެއް ލިބޭނެ ކަމަށް ލަފާކުރެވޭ ކަމަށް ފިނޭންސް މިނިސްޓަރ ޙަސަން ޒަރީރު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި މިނިސްޓަރ ޒަރީރު ވިދާޅުވީ، އެ މަޝްރޫއުން އެވެރެޖްކޮށް އަހަރަކު ގާތްގަނޑަކަށް 1.1 ބިލިއަން ޑޮލަރުގެ އާމްދަނީއެއް ދައުލަތަށް ވަންނާނެ ކަމަށެވެ. މިއީ ރާއްޖޭގައި ހިންގާ 179 ރިސޯޓާއި 16 ހޮޓަލާއި 920 ގެސްޓްހައުސް އަދި 165 ސަފާރީ އުޅަނދުން ލިބޭ ޖުމްލަ އާމްދަނީ ފަހަނައަޅައިދާ ވަރުގެ ބޮޑު ޢަދަދެއް ކަމަށާއި، މިއިން ރަމްޒުކޮށްދެނީ ދައުލަތުގެ މާލިއްޔާތު ވަރުގަދަކުރުމަށާއި ރާއްޖޭގެ ދުރުރާސްތާ ތަރައްގީއަށް އެހީތެރިވުމުގައި މި މަޝްރޫއުގެ ގާބިލުކަން ކަމަށްވެސް އޭނާ ފާހަގަކުރެއްވިއެވެ.
ރަސްމާލެ އެއްބަސްވުމުގެ ދަށުން ދައުލަތަށް އާމްދަނީ ލިބެން ކަނޑައެޅިފައި ވަނީ އާންމު އުސޫލުން ނެގޭ ޓީޖީއެސްޓީގެ އިތުރުން، މާސްޓާ ޑިވެލޮޕަރުގެ ފުރަތަމަ ވިއްކުންތަކާއި ކުއްޔަށްދިނުންތަކުން ލިބޭ އާމްދަނީގެ 10 އިންސައްތައިން ކަމަށް މިނިސްޓަރ ވިދާޅުވިއެވެ. އަދި ފުރަތަމަ ގަންނަ ފަރާތްތަކުންނާއި އޭގެފަހުން އެހެން ފަރާތްތަކަށް މިލްކުވެރިކަން ބަދަލުކުރާއިރު މުދަލުގެ އަގުގެ ހަތަރު އިންސައްތައިގެ ފީއެއްގެ ގޮތުގައި ވެސް ދައުލަތަށް ނަގާނެ ކަމަށް ޒަރީރު ވިދާޅުވިއެވެ.
މި އެއްބަސްވުމުގެ ދަށުން އެއްވެސް ޓެކްސް އިނާޔަތެއް ނުވަތަ ޑިއުޓީ އިސްތިސްނާއެއް ދީފައެއް ނުވާނެ ކަމަށާއި އަދި މި މަޝްރޫއަށް ސަރުކާރުން އެއްވެސް ލޯނެއް ނުނަގާނެ ކަމަށްވެސް މިނިސްޓަރ ވިދާޅުވިއެވެ. އެހެންކަމުން ދައުލަތަށް މާލީ އިލްތިޒާމްތަކެއް އުފެދުމެއް ނެތި، ދައުލަތުގެ އާމްދަނީއަށް މި މަޝްރޫއުން ފައިދާ ކުރާނެކަން ކަށަވަރުވާ ކަމަށް އޭނާ ވިދާޅުވިއެވެ.
ރަސްމާލެ އެއްބަސްވުމުގެ ދަށުން، މުދާ ވިއްކައިގެން ލިބޭ އެންމެހައި ފައިސާއެއް ބަހައްޓާނީ ރާއްޖޭގައި ގާއިމުކުރެވޭ އެސްކްރޯ އެކައުންޓެއްގައި ކަމަށާއި، އެ ފައިސާ ދޫކުރުން ބިނާވެގެންވަނީ އެއްބަސްވުމުގައިވާ ގޮތުގެ މަތިން ކަމަށް ޒަރީރު ވިދާޅުވިއެވެ. މީގެ އިތުރުން މަޝްރޫއުގެ އެންމެހައި ފައިސާގެ މުއާމަލާތްތައް ހިންގަންޖެހޭނީ ދިވެހިރާއްޖޭގެ ބޭންކުތައް މެދުވެރިކޮށެވެ.
ގާތްގަނޑަކަށް 10 އަހަރުގެ ތެރޭގައި މަޝްރޫއު ފުރިހަމަވުމުން، އަހަރަކު އެއް މިލިއަނަށްވުރެ ގިނަ ފަތުރުވެރިން ޒިޔާރަތްކުރާނެ ކަމަށް ލަފާކުރެވޭއިރު، ރާއްޖޭގެ އިގްތިސާދަށް ފަތުރުވެރިކަމުގެ އާމްދަނީގެ ގޮތުގައި އަހަރަކު ގާތްގަނޑަކަށް ދެ ބިލިއަން އެމެރިކާ ޑޮލަރު ވަންނާނެ ކަމަށް ބެލެވެއެވެ. އަބޫދާބީގެ އީގަލް ހިލްސްއިން ރާއްޖޭގައި 20 ބިލިއަން ޑޮލަރުގެ މި މަޝްރޫއު ހިންގުމަށް ސަރުކާރާއެކު ސޮއިކުރީ ސެޕްޓެމްބަރ މަހުގެ 21 ގައެވެ. މިއީ ރާއްޖެއަށް ބޭރުގެ ފަރާތަކުން ކުރާ އެންމެ ބޮޑު އިންވެސްޓްމެންޓެވެ.
