ދިވެހިރާއްޖޭގެ ޚާއްޞަ އިޤްތިޞާދީ ސަރަހައްދުގައި ޤާނޫނާޚިލާފަށް ހަރަކާތްތެރިވަމުން ދިޔަ ބޭރުގެ މަސްބޯޓެއް އެމްއެންޑީއެފް ކޯސްޓްގާޑް ޝިޕް ޢިމާދުއްދީނުގެ ބެލުމުގެ ދަށަށް ގެނެސްފިއެވެ.
އެމްއެންޑީއެފުން މަޢުލޫމާތު ދެއްވާފައިވާ ގޮތުގައި، 7 މީހުންނާ އެކު ހަރަކާތްތެރިވަމުންދިޔަ މި މަސްބޯޓު ކޯސްޓްގާޑުގެ ބެލުމުގެ ދަށަށް ގެނެސްފައިވަނީ ސެޕްޓެންބަރު 30 ވަނަ ދުވަހުގެ އިރުއޮއްސި 18:34 ހާއިރުއެވެ. މި އުޅަނދު ފެނިފައިވަނީ ހއ. ތުރާކުނުގެ ހުޅަނގުއުތުރުން 46 ނޯޓިކަލް މޭލު ބޭރުންނެވެ.
ކޯސްޓްގާޑުގެ ބެލުމުގެ ދަށަށް ގެނެވުނު މި ބޯޓު މިހާރު ހދ. ކުޅުދުއްފުށްޓަށް ގެންދިއުމުގެ މަސައްކަތް ކުރަމުންދާ ކަމަށް ސިފައިން ވަނީ ހާމަކޮށްފައެވެ. ނަމަވެސް، މި ބޯޓަކީ ކޮން ޤައުމަކަށް ނިސްބަތްވާ އުޅަނދެއްކަން އެމްއެންޑީއެފުން އަދި ހާމަކޮށްފައެއް ނުވެއެވެ.
ރާއްޖޭގެ ކަނޑުގެ ސަރަހައްދަށް ހުއްދަނެތި ބޭރުގެ އުޅަނދުފަހަރު ވަންނަ މައްސަލަތައް ދޭތެރެދޭތެރެއިން ފާހަގަކުރެވޭއިރު، މިއަހަރުގެ އެޕްރީލް މަހުގެ 26 ވަނަ ދުވަހުވެސް އޮމާނުން ފުރައިގެން އިންޑިއާއަށް ދަތުރުކުރި ދެ އުޅަނދެއް އެއްވެސް އިދާރާއެއްގެ ހުއްދައެއް ނެތި ރާއްޖޭގެ ސަރަހައްދަށް ވަދެފައިވާކަން ފާހަގަކޮށްލެވެއެވެ.
