މޯލްޑިވްސް ހައްޖު ކޯޕަރޭޝަނުން ހުޅުމާލޭގައި ތަރައްގީކުރަމުން އަންނަ ނިއަމް ރެސިޑެންސްގެ އެޕާޓްމަންޓްތައް ވިއްކުމަށް މިހާތަނަށް ހިންގާފައިވާ ހުރިހާ މުއާމަލާތްތަކެއް އެ ކޯޕަރޭޝަނުން ބާތިލްކޮށްފިއެވެ.
ހައްޖު ކޯޕަރޭޝަނުން މި މުއާމަލާތްތައް ބާތިލްކުރަން ނިންމީ ކުންފުންޏަށް އެންމެ ފައިދާވާނެ ގޮތަށް އެޕާޓްމަންޓްތަކުގެ އަގުތައް އަލުން ކަނޑައެޅުމަށްފަހު، އާންމުންނަށް އެ ތަންތަން ވިއްކުމުގެ މަސައްކަތް އަލުން ކުރިއަށް ގެންދިއުމުގެ ބޭނުމުގައެވެ.
ނިއަމް ރެސިޑެންސްގެ އެޕާޓްމަންޓްތައް މީގެ ކުރިން އާންމުކޮށް ހުޅުވާނުލައި، ކުންފުނީގެ މުވައްޒަފުންނަށް ދޫކުރި މައްސަލައިގައި ކޯޕަރޭޝަންގެ ކުރީގެ މެނޭޖިން ޑިރެކްޓަރު މުހައްމަދު ޝަކީލާއި އިސްވެރިންތަކަކަށް ބޮޑެތި ފާޑުކިޔުންތަކެއް ވަނީ އަމާޒުވެފައެވެ. އަދި ފްލެޓް ލިބޭނެ ކަމުގެ އެއްބަސްވުމުގައި ސޮއިކުރެއްވި ފަހުން، އެމްޑީ ޝަކީލާއި ޗީފް އޮޕަރޭޓިން އޮފިސަރު (ސީއޯއޯ) ނަޖީލް ވަނީ ކުންފުނީގެ މަގާމުތަކުން ވަކިވެވަޑައިގެންފައެވެ.
މި އެޕާޓްމަންޓްތައް ވިއްކުމުގެ މުއާމަލާތްތައް ކޯޕަރޭޝަނުން ބާތިލުކުރިއިރު، އެއްބަސްވުންތައް ހެދި ބައެއް މުވައްޒަފުން ވަނީ ބުކިން ފީގެ އިތުރުން މަހުން މަހަށް ދައްކަންޖެހޭ ފައިސާ ވެސް ދައްކާފައެވެ.
