މަގުމަތީގެ ރައްކާތެރިކަން ކަށަވަރުކުރުމުގެ މަޤްޞަދުގައި އަލަށް އެކުލަވައިލި ”އެއްގަމު ދަތުރުފަތުރުގެ ޤާނޫނު“ އަށް މިއަދުން ފެށިގެން ރަސްމީކޮށް އަމަލުކުރަން ފަށައިފިއެވެ.
މި ޤާނޫނުގެ ދަށުން މަގުމަތީގެ ޤަވާއިދުތަކާ ޚިލާފުވާ ފަރާތްތަކާ މެދު ހަރުކަށި ފިޔަވަޅުތަކާއި ބޮޑެތި ޖޫރިމަނާތަކެއް ވަނީ ކަނޑައަޅާފައެވެ.
އަލަށް އަމަލުކުރަން ފެށި ޤާނޫނުގައިވާ ގޮތުން، ފަރުވާކުޑަކޮށް ނުވަތަ ނުރައްކާތެރިކޮށް އުޅަނދު ދުއްވައިފިނަމަ 25,000 ރުފިޔާއާއި 100,000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ. އަދި މިފަދަ ޢަމަލެއްގެ ސަބަބުން މީހަކަށް އަނިޔާއެއް ވެއްޖެނަމަ ނުވަތަ މީހަކު މަރުވެއްޖެ ހާލަތެއްގައި، އެ މީހެއްގެ މައްޗަށް ޖިނާޢީ ދަޢުވާ އުފުލުމުގެ އިތުރުން އެއްގަމު އުޅަނދު ދުއްވުމުގެ ލައިސަންސް ވެސް ބާތިލުކުރެވޭނެ ކަމަށް ޤާނޫނުގައި ބަޔާންކޮށްފައިވެއެވެ.
މީގެއިތުރުން، ކުޑަކުދިންނަށާއި އެއްގަމު އުޅަނދު ދުއްވުމުގެ ލައިސަންސް ނެތް މީހުންނަށް އުޅަނދު ދުއްވަން ދޭ ފަރާތްތަކަށް ވެސް ހަރުކަށި އަދަބުތަކެއް ވަނީ ކަނޑައަޅާފައެވެ. އެގޮތުން އެފަދަ ފަރާތްތައް 25,000 ރުފިޔާއާއި 50,000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ. ހަމައެއާއެކު ރަޖިސްޓްރީނުކޮށް، ލައިސަންސް ނެތި ނުވަތަ ކަނޑައެޅިފައިވާ ސްޕީޑަށްވުރެ ބާރަށް ދުއްވާ ފަރާތްތަކަށް ބޮޑެތި ޖޫރިމަނާތައް ކުރުމާއި އުޅަނދު ހިފެހެއްޓުމުގެ ބާރުވެސް ޤާނޫނުން ވަނީ ދީފައެވެ.
އެއްގަމު ދަތުރުފަތުރުގެ އާ ޤާނޫނުގެ ދަށުން، އުޅަނދު ވިއްކުމަށްފަހު ވެރިފަރާތް ބަދަލުނުކުރުމާއި، އަހަރީ ފީ ނުދެއްކުމާއި، ދުއްވަމުން ދުންފަތުގެ އިސްތިއުމާލުކުރުން އަދި މޯބައިލް ފޯނު ބޭނުންކުރުން ފަދަ ކަންކަން ކުރާ ފަރާތްތަކަށް 750 ރުފިޔާގެ ޖޫރިމަނާއެއް އަންނާނެއެވެ.
