މި އަހަރުގެ މިހާތަނަށް މުދަލު ޒަކާތުގެ ގޮތުގައި ބަލައިގަތް އަދަދު، 2025ވަނަ އަހަރުގެ މި މުއްދަތުގައި ލިބުނު ޖުމުލަ އަދަދަށް ވުރެ އިތުރުވެއްޖެއެވެ.
މޯލްޑިވްސް ޒަކާތު ހައުސްއިން އާމްމުކުރި ތަފާސްހިސާބުތަކުން ދައްކާގޮތުން، 2026ވަނަ އަހަރުގެ ސެޕްޓެމްބަރު މަހުގެ ނިޔަލަށް 109.26 މިލިއަން ދިވެހި ރުފިޔާ ވަނީ ބަލައިގަނެފައެވެ.
އެގޮތުން، 1 ޖަނަވަރީ 2026އިން ފެށިގެން 30 ސެޕްޓެމްބަރު 2026ގެ ނިޔަލަށް މުދަލު ޒަކާތުގެ ގޮތުގައި ޖުމްލަ 109,262,025.69 (ސަތޭކަ ނުވަ މިލިއަން ދެ ލައްކަ ފަސްދޮޅަށް ދެ ހާސް ރުފިޔާ ފަސްދޮޅަށް ނުވަ ލާރި) ލިބިފައިވާކަމަށް މޯލްޑިވްސް ޒަކާތު ހައުސްއިން އާންމުކުރި މައުލޫމާތުން އިނގެއެވެ. އަދި މިއީ 2025 ވަނަ އަހަރު އެއްކޮށް ލިބުނު 106,456,071.00 (ސަތޭކަ ހަ މިލިއަން ހަތަރު ލައްކަ ފަންސާސް ހަ މިލިއަން ހަތްދިހަ އެއް ރުފިޔާ) އަށްވުރެ 2,805,954.69 (ދެ މިލިއަން އަށް ލައްކަ ފަސް ހާސް ނުވަ ސަތޭކަ ފަންސާސް ހަތަރު ރުފިޔާ ފަސްދޮޅަށް ނުވަ ލާރި) އިތުރު އަދަދެކެވެ.
މިއަހަރުގެ މިހާތަނަށް މުދަލު ޒަކާތުގެ ގޮތުގައި ލިބުނު އަދަދަކީ 2025 ވަނަ އަހަރު ބަލައިގަތް ޖުމުލަ އަދަދާ އަޅާބަލާ އިރު ގާތްގަނޑަކަށް %2.64ގެ ކުރިއެރުމެއްކަމަށް ޒަކާތު ހައުސްއިން ބުނެއެވެ.
މި އަހަރުގެ ސެޕްޓެމްބަރު 30ގެ ނިޔަލަށް ދިވެހި ރުފިޔާއިން ޖުމްލަ 108,739,116.62 (ސަތޭކަ އަށް މިލިއަން ހަތް ލައްކަ ތިރީސް ނުވަ ހާސް ސަތޭކަ ސޯޅަ ރުފިޔާ ފަސްދޮޅަށް ދެ ރުފިޔާ) ލިބިފައިވާއިރު، 34,021.41 ޔޫ.އެސް ޑޮލަރު ވެސް ވަނީ ލިބިފައެވެ.
މިދިޔަ އަހަރުގެ ޖުމުލަ އަދަދު ފަހަނަޅައި ގޮސްފައި މިވަނީ މި އަހަރު ނިމެން އަދި ތިން މަސްދުވަސް ބާކީ އޮއްވައިކަން ފާހަގަކޮށްފައެވެ. އެހެންކަމުން އޮކްޓޯބަރު މަހުން ފެށިގެން ޑިސެމްބަރު މަހުގެ ނިޔަލަށް ލިބޭ ފައިސާ އަދި މިއަހަރުގެ ޖުމުލަ އަދަދަށް އިތުރުވާނެކަމަށް ބެލެވޭކަމަށް މޯލްޑިވްސް ޒަކާތު ހައުސްއިން ބުނެއެވެ.
