ދިވެހިންގެ އުފެއްދުންތެރިކަމުގެ މައުރަޒު 2026 ރަސްމީކޮށް އިފްތިތާޙުކޮށްފިއެވެ. މި މައުރަޒު އިފްތިތާޙު ކުރުމުގެ ގޮތުން ”ރެޑީ ސެޓް މަޢުރަޒު 26“ ގެ ނަމުގައި ޚާއްސަ ހަރަކާތެއް ވަނީ ކުރިއަށް ގެންގޮސްފައެވެ.
އިޤުތިސާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވުޒާރާއާއި، ބިޒްނަސް ސެންޓަރ ކޯޕަރޭޝަން (ބީސީސީ) ގުޅިގެން ކުރިއަށް ގެންދިޔަ މި ހަރަކާތް ބާއްވާފައިވަނީ ހުޅުމާލެ ފޭސް 1 ގެ ދިރާގު ފަހަތުގައި އޮންނަ ބީޗް ސަރަހައްދުގައި، ހަވީރު 4:00 އިން ފެށިގެން ރޭގަނޑު 11:00 އަށެވެ. މި ހަރަކާތުގެ ތެރޭގައި މައުރަޒުގެ ރިވީލިންގ ވީޑިއޯއެއް ދައްކާލާފައިވާއިރު، މި ވީޑިއޯގައި މިއަހަރުގެ އެކްސްޕޯ އާންމުންނަށް ފެންނާނެ ގޮތުގެ ނަމޫނާއެއް ވަނީ ހާމަކޮށްފައެވެ.
މި ހަރަކާތުގެ ތެރެއިން މައުރަޒުގެ ސްޕޮންސަރުންނާއި ޕާޓްނަރުންނާއެކު ސޮއިކޮށް، އެ ފަރާތްތައް ރަސްމީކޮށް ވަނީ އިއުލާނުކޮށްފައެވެ. މީގެއިތުރުން ހަވީރުގެ ވަގުތުގައި އާއިލާތަކަށާއި ކުޑަކުދިންނަށް ޚާއްސަ ކޮށްގެން މޫދު ކުޅިވަރުތަކާއި ބައުންސީ ކާސަލް ފަދަ ހަރަކާތްތައް ކުރިއަށް ގެންދިޔައިރު، ރޭގަނޑު ވަނީ ލައިވް މިއުޒިކާއި ބޮޑުބެރުގެ ފޯރިގަދަ ހުށަހެޅުންތައް ގެނެސްދީފައެވެ.
މައުރަޒުގެ ތެރެއިން ކުރިއަށްދާ ބޮޑުބެރު މުބާރާތާއި ސަގާފީ ވާދަ މުބާރާތުގައި ބައިވެރިވާ ޓީމުތަކާއި ކުޅިވަރު މުބާރާތްތައް ވެސް މި ހަފްލާގައި ވަނީ އިއުލާން ކޮށްފައެވެ.
ސަގާފީ ވާދަ މުބާރާތުގައި ވާދަކުރާ ޓީމުތަކަކީ: އެވޭލާ ބައި އިންކްލިކްސް، އެކްސްޓްރީމް ލެވެލް، ހިޔަލަ، ޕަރޕަލް ވިންގްސް، މާބައިދޫ ކައުންސިލް، ބ. ހިތާދޫ ޔޫތު ވިންގް ޖަމްޢިއްޔާ، އޮމަލަ، ޓީމް މަލަކާ އަދި އެމް.އެން.ޔޫ. ޑާންސް ގްރޫޕެވެ.
ބޮޑުބެރު މުބާރާތުގައި ވާދަކުރާ ޓީމުތަކަކީ: އެކަތި ބޮޑުބެރު، ސާދަ ތިރީސް އަށެއް، އެންދެރި ބޮޑުބެރު ގްރޫޕް، ރިދަމް ބޮޑުބެރު، ހޭވައްލާ ބޮޑުބެރު، ހޭވާލި ބޮޑުބެރު، މަންނަ ބޮޑުބެރު، ޗާލޭ ބޮޑުބެރު، އެމް.އެން.ޔޫ. ބޮޑުބެރު އަދި މަންނަޔަންސް ބޮޑުބެރެވެ.
މީގެއިތުރުން މައުރަޒާއެކު ކުރިއަށްގެންދާ ކުޅިވަރު މުބާރާތްތަކުގައި ނެޓްބޯލް އެސޯސިއޭޝަން، ކެރަމް އެސޯސިއޭޝަން، ބާސްކެޓްބޯލް އެސޯސިއޭޝަން، ބެޑްމިންޓަން އެސޯސިއޭޝަން އަދި ބަށި އެސޯސިއޭޝަން އޮފް މޯލްޑިވްސް އިން ބައިވެރިވާނެއެވެ.
”ދިވެހީންގެ އުފެއްދުންތެރިކަމުގެ މައުރަޒު 2026“ ބޭއްވުމަށް ހަމަޖެހިފައިވަނީ، މި އޮކްޓޯބަރު މަހުގެ 25 އިން ނޮވެމްބަރު މަހުގެ 2 ވަނަ ދުވަހުގެ ނިޔަލަށް ހުޅުމާލެ ސެންޓްރަލް ޕާކުގައެވެ. މި މައުރަޒުގައި 16 ދާއިރާއަކުން 73 ގިންތިއެއްގެ އުފެއްދުންތަކާއި ޚިދުމަތްތައް ދައްކާލުމަށް ހަމަޖެހިފައިވާއިރު، މައުރަޒުގެ ވާދަކުރުމުގެ ބައިގައި 6،000 އަށްވުރެ ގިނަ ދިވެހި އުފެއްދުން ރަޖިސްޓަރީ ކޮށްފައިވެއެވެ. އަދި މި މައުރަޒުގައި 1000 އަށްވުރެ ގިނަ އުފެއްދުންތެރިންގެ އުފެއްދުންތައް ފެނިގެންދާނެއެވެ.
