އައްޑޫ ސިޓީ ހުޅުދޫ އަދި މީދޫ ހިމެނޭހެން ފުވައްމުލައް ސިޓީގެ ފެނާއި ނަރުދަމާގެ ޚިދުމަތްތައް އެމްޑަބްލިޔުއެސްސީން ރަސްމީކޮށް ހަވާލުވެ އޮޕަރޭޝަނަލް ހިދުމަތްތައް ފަށައިފިއެވެ.
އެކްސްގައި އެކުންފުނީފެ އެމްޑީ ހުސެއިން ފަހުމީ ހިއްސާކުރެއްވި ޕޯސްޓުގައި ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކޯޕަރޭޓް ދާއިރާ އިޞްލާޙުކުރުމަށް ކަނޑައަޅުއްވާފައިވާ ސިޔާސަތުގެ ދަށުން، އައްޑޫ ސިޓީ އާއި ފުވައްމުލައް ސިޓީގެ ފެނާއި ނަރުދަމާގެ ޚިދުމަތްތައް އެމްޑަބްލިޔުއެސްސީން 1 އޮކްޓޫބަރު 2026 ވީ ބުރާސްފަތި ދުވަހު ރަސްމީކޮށް ހަވާލުވެ އޮޕަރޭޝަނަލް ހިދުމަތްތައް ފަށާފައިވާ ކަމަށެވެ.
ފަހުމީ ވިދާޅުވީ މި ބަދަލާ ގުޅިގެން އެމް.ޑަބްލިޔު.އެސް.ސީ އާއި ފެނަކަ ކޯޕަރޭޝަނާ ދެމެދު ފްރޭމްވޯކް އެއްބަސްވުމެއް އެކުލަވާލައި ސޮއިކުރެވިފައިވާއިރު، އެ ދެ ސިޓީގެ ފެނާއި ނަރުދަމާއާ ގުޅުންހުރި އެންމެހައި އިންފްރާސްޓްރަކްޗަރާއި ވަސީލަތްތައް ބަދަލުކުރުމުގެ މަސައްކަތް މިހާރު ފުރިހަމަ ކުރެވިފައިވާ ކަމަށެވެ.
މި ނިޒާމުތައް އިތުރަށް ހަރުދަނާކޮށް، ރައްޔިތުންނަށް މެދުކެނޑުމެއްނެތި، އިތުބާރުހުރި އަދި ފެންވަރު ރަނގަޅު ޚިދުމަތެއް ކަށަވަރުކޮށްދިނުމުގެ ގޮތުން ހެދިފައިވާ ފަންނީ އެސެސްމަންޓްތަކަށް ބިނާކޮށް، ދެ ސިޓީގެ ޚިދުމަތުގެ ފެންވަރު މަތިކުރުމަށާއި، އޮޕަރޭޝަނަލް ހިންގުން ހަރުދަނާކުރުމުގެ ޢަމަލީ މަސައްކަތްތައް މިހާރު ކުރެވެމުންދާ ކަމަށް ފަހުމީ ވިދާޅުވިއެވެ.
