ކޮންމެ ދިވެއްސަކަށް ފައިދާ ބަހާގޮތަށް ސަރުކާރުން 10 ރިސޯޓު ހެދުމަކީ، އަނެއްކާވެސް ރާއްޖޭގެ ޓޫރިޒަމަށް އަންނާނެ ބޮޑު ބަދަލެއްކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ ޗެއަރމަން ހުސައިން އަފީފު ވިދާޅުވެއްޖެއެވެ.
ޤައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ޚާއްސަ ރަސްމިއްޔާތުގައި އަފީފު ވިދާޅުވީ، ސަރުކާރުން އިއުލާންކޮށްފައިވާ ގޮތަށް 10 ރިސޯޓު ހަދައި، އޭގެ ފައިދާ ދިވެހިންނަށް ބެހުމަކީ އެ ދާއިރާއިން ބޮޑު ބަދަލެއް ފެންނާނެ ކަމެއް ކަމަށެވެ.
ސަރުކާރުގެ މި މަޝްރޫއުގައި ބައިވެރިވާން ބޭނުންފުޅުވާ ކަމަށާއި، މިކަން ކާމިޔާބުވާނެ ކަމަށް ވަރަށް ބޮޑަށް އުއްމީދު ކުރައްވާ ކަމަށްވެސް އޭނާ ވިދާޅުވިއެވެ.
މިކަމަކީ އަޅުގަނޑު ވަރަށް އުންމީދު ކުރާ ކަމެއް. މިކަމުގައި ކާމިޔާބަށް އެދެން
ސަރުކާރުގެ ކުންފުންޏަކުން ކުރިއަށް އޮތް ތިން އަހަރުގެ ތެރޭގައި 10 ރަށެއް ރިސޯޓެއްގެ ގޮތުގައި ތަރައްޤީކޮށް، އެއިން ލިބޭ ފައިދާއިން ކޮންމެ ދިވެއްސަކަށް އަހަރަކު 400 ޑޮލަރު ދޭން ފަށާނެކަން ސަރުކާރުން އިއުލާންކުރީ މި އަހަރުގެ ކުރީކޮޅުއެވެ.
