ދިވެހިރާއްޖޭގައި ކުރިއަށްދާ ބޮޑެތި ވިޔަފާރިތަކާއި ފޮރިން އިންވެސްޓްމަންޓްތަކާއި ގުޅިގެން އުފެދޭ ދެބަސްވުންތައް އަދުލުވެރިކަމާއެކު އަވަހަށް ހައްލުކުރުމަށްޓަކައި، ބޭރުގެ ތަޖުރިބާކާރު ފަނޑިޔާރުން ހިމެނޭ ހާއްސަ ކޯޓުތަކެއް ގާއިމުކުރުން ރާއްޖެއަށް ކޮންމެހެން ވެސް މުހިންމުކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީޕަލްސް ނެޝަނަލް ފްރަންޓް (ޕީއެންއެފް) އިން ރޭ އައްޑޫ ސިޓީ ފޭދޫގައި ބޭއްވި ޓައުންހޯލް ޖަލްސާގައި ރައީސް ޔާމީން ވިދާޅުވީ، ރާއްޖޭގެ އިގްތިސާދު ފުޅާކުރުމަށްޓަކައި ބޭރުގެ ބޮޑެތި އިންވެސްޓްމަންޓްތައް ގެންނަން ކިތަންމެ ބޭނުންވި ނަމަވެސް، އެކަމަށް އޮތް އެންމެ ބޮޑު ހުރަހަކީ މިހާރު އޮތް އަދުލުގެ ނިޒާމަށް އިންވެސްޓަރުންގެ އިތުބާރު ނެތުންކަމަށެވެ. އެގޮތުން ވިޔަފާރިތަކުގައި ޖެހޭ މައްސަލަތައް ކޯޓުތަކުގައި ތާށިވެ، އެތައް އަހަރެއް ހޭދަވުމަކީ އިންވެސްޓަރުން ރާއްޖެއާމެދު ފަސްޖެހޭ މައިގަނޑު ސަބަބެއްކަމަށް އެމަނިކުފާނު ވިދާޅުވި އެވެ.
މި މައްސަލައަށް ގެނެވޭނެ ހައްލެއްގެ ގޮތުގައި ރައީސް ޔާމީން ވިދާޅުވީ ސިންގަޕޫރު ފަދަ ވިޔަފާރީގެ ގޮތުން ކުރިއަރާފައިވާ ގައުމުތަކުގައި ޕްރެކްޓިސްކޮށް، ދުނިޔޭގެ ފެންވަރުގެ ތަޖުރިބާ ލިބިފައިވާ ފަނޑިޔާރުން ހިމަނައިގެން ހާއްސަ މާކެންޓައިލް ކޯޓުތަކެއް އުފެއްދުމަށެވެ. އަދި މި ވިސްނުމަކީ 2028 ވަނަ އަހަރުގެ ރިޔާސީ އިންތިހާބަށް އެމަނިކުފާނު އެކުލަވާލައްވާ މެނިފެސްޓޯގައި ވެސް ހިމެނޭ މުހިންމު ސިޔާސަތެއްކަމަށް ވިދާޅުވި އެވެ.
ރައީސް ޔާމީން ވިދާޅުވީ، މިފަދަ ހާއްސަ ކޯޓުތަކެއް ގާއިމުކުރެވިއްޖެނަމަ ވިޔަފާރީގެ ކޮންމެ މައްސަލައެއް ވެސް 15 ނުވަތަ 20 ދުވަހުގެ ކުރު މުއްދަތެއްގެ ތެރޭގައި އެއްކޮށް ނިންމައި އިންސާފު ގާއިމުކުރެވޭނެ ކަމަށެވެ. އަދި މިގޮތަށް ގެންނަ ބޭރުގެ ފަނޑިޔާރުންނަކީ ސިޔާސީ ގޮތުންނާއި އެހެނިހެން ގޮތްގޮތުން ވެސް ދައުލަތަށް ނުވަތަ މައްސަލައިގައި ހިމެނޭ އެއްވެސް ހަސްމަކަށް ނުފޫޒު ފޯރުވޭނެ ބައެއް ނޫންކަމަށް ވިދާޅުވި އެވެ.
އެހެންކަމުން، މައްސަލަ ނިމިގެންދާ ފުރިހަމަކަމާއި ނަޒާހަތްތެރިކަމުގެ ސަބަބުން މައްސަލައިން ނާކާމިޔާބުވާ ފަރާތުން ވެސް އިތުރު ކޯޓަކަށް އެ މައްސަލަ ގެންދަން ބޭނުންނުވާނެކަމަށް އެމަނިކުފާނު ވިދާޅުވި އެވެ.
މީގެއިތުރުން، ރާއްޖޭގެ ފަތުރުވެރިކަމުގެ ސިނާއަތަކީ އެތައް ބިލިއަން ޑޮލަރެއްގެ ބޮޑު އިންވެސްޓްމަންޓަކަށް ވާއިރު، އެފަދަ އަގުހުރި ސިނާއަތެއްގެ ރައްކާތެރިކަމަށްޓަކައި މިފަދަ ނިޒާމެއް ގާއިމުކުރުމަކީ ކޮންމެހެން ކުރަންޖެހޭ ކަމެކަމަށް ރައީސް ޔާމީން ވިދާޅުވި އެވެ. ރައީސް ޔާމީން ވިދާޅުވީ ބޭރުގެ ފަނޑިޔާރަކަށް މަހަކު 60،000 ޑޮލަރުގެ ބޮޑު މުސާރައެއް ދޭން ޖެހުނު ކަމުގައި ވިޔަސް، އިގްތިސާދަށް ލިބޭނެ ޔަގީންކަމާއި ފައިދާއަށް ބަލާއިރު އެއީ ރާއްޖެއަށް ތަހައްމަލު ކުރެވޭނެ ހަރަދެއް ކަމަށެވެ.
