ގދ. ތިނަދޫއަށް ސިޓީއެއްގެ ދަރަޖަ ދިނުމުގައި ގާނޫނާ ހިލާފު އަމަލުތަކެއް ހިންގާފައިވާ ކަމަށް ތުހުމަތުކުރެވޭ މައްސަލައިގައި، އެ ސިޓީގެ މޭޔަރު ސައުދު އަލީގެ މައްޗަށް ދައުލަތުން އުފުލާފައިވާ ދައުވާތަކުގެ ޝަރީއަތުގެ އަޑުއެހުން މާދަމާ ބޭއްވުމަށް ކްރިމިނަލް ކޯޓުގައި ތާވަލުކޮށްފިއެވެ.
މި މައްސަލައަކީ ތިނަދޫއަށް ސިޓީއެއްގެ ދަރަޖަ ހޯދުމުގެ ބޭނުމުގައި، އެ ރަށުގެ އާބާދީގެ އަދަދުތަކާ ގުޅޭގޮތުން ދައުލަތުގެ ކަމާބެހޭ މުއައްސަސާތަކަށް ދޮގު އަދި ސައްހަނޫން މައުލޫމާތުތަކެއް ހުށަހަޅާފައިވާކަމަށް ބުނެ ހުށަހެޅިފައިވާ މައްސަލައެކެވެ.
ހާޒިރުވެގެން ކުރިޔަށް ގެންދާ ގޮތަށް ކްރިމިނަލް ކޯޓުގައި މި މައްސަލަ ތާވަލުކޮށްފައި ވަނީ މާދަމާގެ ހެނދުނު 09:00 އަށެވެ.
ސައުދުގެ މައްޗަށް އުފުލާފައިވަނީ އެނގިހުރެ ސައްހަ ނޫން ލިޔުމެއް ދިނުމުގެ ކުށުގެ ދައުވާއާއި، ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާއެވެ. މި ދެ ކުށުގެ އަސާސީ އަދަބު އެއްކޮށްލުމުން އަންނަނީ ޖުމުލަ 2 އަހަރާއި 1 މަސްދުވަހުގެ ޖަލު ހުކުމެކެވެ. އެގޮތުން، އެނގިހުރެ ސައްހަ ނޫން ލިޔުމެއް ދިނުމުގެ ކުށަށް 1 އަހަރާއި 7 މަހާއި 6 ދުވަހުގެ ޖަލު އަދަބެއް ކަނޑައެޅިފައިވާއިރު، ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ އަސާސީ އަދަބަކީ 4 މަހާއި 24 ދުވަހަށް ޖަލަށްލުމެވެ.
ޕީޖީ އޮފީހުން ބުނި ގޮތުގައި، ސައުދުގެ މައްޗަށް ސައްހަ ނޫން ލިޔުމެއް ދިނުމުގެ ދައުވާ އުފުލީ، ތިނަދޫ ކައުންސިލްގެ ރައީސްގެ ހައިސިއްޔަތުން އޭނާ ސޮއިކުރައްވައި ލޯކަލް ގަވަރުމަންޓް އޮތޯރިޓީ (އެލްޖީއޭ) އަށް ފޮނުއްވި ލިޔެކިޔުންތަކުގައި މަރުވެފައިވާ މީހުންނާއި ސައްހަކަން ކަށަވަރުނުވާ މީހުންގެ މައުލޫމާތު ހިމަނާފައި ވާތީއެވެ. އަދި އައިޑީ ކާޑު ނަންބަރާއެކު ސައްހަ ލިސްޓެއް ހުށަހެޅުމަށް އެލްޖީއޭއިން އެންގުމުން، ދެވަނަ ފަހަރަށް ފޮނުވި ލިސްޓުގައި އެހެން ރަށްރަށުގެ ރަޖިސްޓްރީގައި ތިބި މީހުންނާއި، އެއް ބައެއްގެ ނަންތައް ތަކުރާރުކޮށް ހިމަނާފައިވާކަން ވެސް ތަހުގީގަށް ފާހަގަކުރެވިފައިވާކަމަށް ވަނީ ބުނެފަ އެވެ.
މީގެއިތުރުން، ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ އޭނާގެ މައްޗަށް ކޮށްފައިވަނީ، އެލްޖީއޭއަށް ފޮނުވި ލިސްޓުތައް ތަހުގީގަށް ހިއްސާކުރުމަށް ފުލުހުން އެދުމުން އެކަން ނުކޮށްދިނުމުގެ އިތުރުން، ސިޓީގެ ދަރަޖަ ހޯދުމަށް އެއްވެސް ލިސްޓެއް ދައުލަތުގެ އިދާރާއަކަށް ފޮނުވިކަމުގެ ރެކޯޑެއް ނެތްކަމަށް ބުނެ ފުލުހުންނަށް ފެކްސް މެދުވެރިކޮށް ދޮގު މައުލޫމާތު ދެއްވާފައިވާތީ ކަމަށް ޕީޖީ އޮފީހުން ބަޔާންކުރެއެވެ.
އެ މައްސަލާގައި އޭސީސީން ކައުންސިލަށް ވަދެ ލިޔެކިޔުންތައް ވެސް ގެންދިޔައެވެ. ތިނަދުއަށް ސިޓީއެއްގެ ދަރަޖަ ދިނީ 31 އޮގަސްޓް 2023ގަ އެވެ.
ތިނަދޫއަށް ސިޓީއެއްގެ ދަރަޖަ ރަސްމީކޮށް ދީފައިވަނީ 31 އޮގަސްޓް 2023 ގައެވެ. ނަމަވެސް އެ ދަރަޖަ ހޯދުމަށް އާބާދީ ހަމަކުރުމުގެ ގޮތުން ސައްހަ ނޫން މައުލޫމާތު ފޮނުވި ކަމަށް ތުހުމަތުކުރެވުނު މި މައްސަލައިގައި، އެންޓި ކޮރަޕްޝަން ކޮމިޝަން (އޭސީސީ) އިން ވަނީ ތިނަދޫ ކައުންސިލް އިދާރާއަށް ވަދެ ގިނަ ލިޔެކިޔުންތަކެއް ގެންގޮސް، ފުލުހުންނާ ގުޅިގެން މައްސަލައިގެ ތަހުގީގު ހިންގައި ސައުދު ފުލުހަށް ވެސް ހާޒިރުކޮށްފައެވެ.
