ގެއްލުވާލާފައިވާ ނޫސްވެރިޔާ އަހުމަދު ރިޟްވާންގެ މައްސަލައިގައި މަރު ކޮމިޝަނުން އެކުލަވާލާފައިވާ ތަހުގީގު ރިޕޯޓުތައް ދިރާސާކުރުމުގެ މަސައްކަތް ގާތްގަނޑަކަށް ނިމިފައިވާކަމަށާއި، ކުރިއަށް އޮތް މަހެއްހާ ދުވަހުގެ ތެރޭގައި އެ މަސައްކަތް އެއްކޮށް ނިންމައި ރައީސުލްޖުމްހޫރިއްޔާއަށް ލަފާ އަރުވާނެކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ.
މި ކަންބޮޑުވުންތައް އާއިލާގެ ފަރާތުން ހުށަހެޅީ، މިރޭ ވަޒީރުން ބައިވެރިވެ ކުރިޔަށް ގެންދިޔަ އަހާ ފޯރަމްގަ އެވެ. އެގޮތުން ރިޟްވާންގެ ދައްތަ ފާތުމަތު ޝެހެނާޒް ބުނީ ރައީސް ޑރ. މުހައްމަދު މުއިއްޒާއި އާއިލާގެ ފަރާތުން ބައްދަލު ކުރުމަށް އެކި ފަހަރުމަތީން މަސައްކަތް ކުރި ނަމަވެސް ބައްދަލުވުމެއް ކުރިޔަށް ގެންދެވޭ ގޮތްވެފައި ނުވާކަމަށެވެ. އަދި މި މައްސަލައިގެ ތަހުގީގުތައް ކުރިޔަށް ދާގޮތާއި، ކޮމިޝަނުގެ ރިޕޯޓާއި ގުޅޭގޮތުން މައުލޫމާތުތައް ސާފު ކުރުމަށް ބޭނުވާކަމަށް ބުންޏެވެ.
އެ ކަންބޮޑުވުންތަކަށް އުޝާމް ވިދާޅުވި ގޮތުގައި، ގޮތް ނޭނގޭ މަރުތަކާއި ގެއްލުވާލާފައިވާ މީހުންގެ މައްސަލަތައް ތަހުގީގު ކުރުމަށްޓަކައި ރިޔާސީ ކޮމިޝަނެއް އުފެއްދެވީ ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގެ އެންމެ ފުރަތަމަ ދުވަހުއެވެ. ނަމަވެސް، 2023 ނޮވެމްބަރު 17 ގައި އެ ވެރިކަން ނިމިގެން ދިޔައިރު ވެސް އެ ކޮމިޝަނުގެ މަސައްކަތްތަކަށް ވަކި ގޮތެއް ނުނިމި އޮތްކަމަށް އުޝާމް ވިދާޅުވިއެވެ.
ގާނޫނުއަސާސީގެ ދަށުން ރައީސުލްޖުމްހޫރިއްޔާއަށް ލަފާދިނުމަށް އުފައްދާ ކޮމިޝަންތަކުގެ މަސައްކަތް، އެ ރައީސެއްގެ ދައުރު ނިމުމުގެ ކުރިން ފުރިހަމަކުރަން ޖެހޭނެކަމަށް ގަބޫލުކުރައްވާކަމަށާއި، އެހެންނަމަވެސް މިދިޔަ ސަރުކާރުގައި އެކަން އެގޮތަށް ހިނގާފައި ނުވާކަމަށް އުޝާމް ވިދާޅުވިއެވެ.
އުޝާމް ވިދާޅުވީ، ރައީސް މުއިއްޒު ވެރިކަމާ ހަވާލުވެވަޑައިގަތުމަށްފަހު ދެއްވި އިރުޝާދާ އެއްގޮތަށް، ކޮމިޝަނަށް ހުށަހެޅިފައި ހުރި މަސައްކަތްތައް ނިންމުމުގެ ފުރުސަތު ދިނުމުގެ ގޮތުން އެ ކޮމިޝަނުގެ މުއްދަތު 2024 ވަނަ އަހަރުގެ މެދުތެރެއާ ހަމައަށް އިތުރުކޮށްދެއްވި ކަމަށެވެ. އަދި އެ މުއްދަތު ހަމަވެ ކޮމިޝަން އުވިގެން ދިޔައިރު، ނިންމާފައިވާ މައްސަލަތަކުގެ ރިޕޯޓުތައް ރައީސުލްޖުމްހޫރިއްޔާއަށް ހުށަހަޅާފައިވާ ކަމަށާއި، އެ ރިޕޯޓުތައް ދިރާސާކުރުމުގެ މަސައްކަތް ރައީސް އޮފީހުން މިހާރު ވަނީ ބަންޑާރަ ނައިބުގެ އޮފީހާ ހަވާލުކުރައްވާފައި ކަމަށެވެ.
މި މަސައްކަތް ކުރިއަށް ގެންދަނީ ބަންޑާރަ ނައިބު އޮފީހުގެ އޮފީހުގެ ހާއްސަ ޓީމަކުންކަން ފާހަގަކުރައްވައި އުޝާމް ވިދާޅުވީ، ރިޟްވާންގެ މައްސަލައިގައި ކޮމިޝަނުން ތައްޔާރުކޮށްފައިވާ ދެތިން ރިޕޯޓު އެބައޮތް ކަމަށެވެ. އަދި އޭގެ ތެރެއިން އާންމުކުރެވެން ހުރީ ކޮން ރިޕޯޓުތަކެއްތޯ ބެލުމުގެ ދިރާސާތައް ކުރަމުންދާކަމަށް އޭނާ ވިދާޅުވިއެވެ. އެގޮތުން ދިމާވާ އެންމެ ބޮޑު ގޮންޖެހުމަކީ، ރިޕޯޓުތައް އެކުލަވާލައި މައުލޫމާތު ދީފައިވާ ގޮތުން ފުލުހުންގެ އިންޓެލިޖެންސްގެ ބައެއް ސިއްރު މައުލޫމާތުތައް އޭގައި ހިމެނިފައިވުންކަމަށާއި، އެހެންކަމުން އެ މައުލޫމާތުތައް ހާމަކުރެވޭނެ މިންވަރެއް ބަލަމުންދާކަމަށް އުޝާމް ވިދާޅުވި އެވެ.
ރިޕޯޓުތައް ދިރާސާކޮށް ކުރިއަށް އޮތް މަހެއްހާ ދުވަހުގެ ތެރޭގައި ރައީސުލްޖުމްހޫރިއްޔާއަށް ގާނޫނީ ލަފާ އަރުވާނެކަމަށާއި، އެ ރިޕޯޓުތައް ރިޟްވާންގެ އާއިލާއާ ހިއްސާކުރުމާ މެދު އެންމެ ފަހުގެ ނިންމެވުން ނިންމަވާނީ ރައީސްކަމަށް ވެސް އުޝާމް ވިދާޅުވިއެވެ.
މީގެއިތުރުން، ރިޟްވާންގެ އާއިލާގެ ފަރާތުން ބައްދަލުވުމަކަށް އެދިފައިވަނިކޮށް މިހާތަނަށް ބައްދަލުނުކުރެވި ލަސްވެފައިވާތީ އެކަމަށް އުޝާމް ވިދާޅުވީ، މި ހަފްތާގެ ތެރޭގައި އާއިލާއާ ބައްދަލުކުރެއްވުމަށް މަސައްކަތް ކުރާނެ ކަމަށެވެ. އަދި އެ ބައްދަލުވުމަށްފަހު، މި މައްސަލައާ ގުޅިގެން ވީ އެންމެ ފުޅާ ދާއިރާއެއްގައި އާއިލާއަށް މައުލޫމާތު ފޯރުކޮށްދިނުމަށް ސަރުކާރުން މަސައްކަތް ކުރައްވާނެ ކަމުގެ ޔަގީންކަން ދޭކަމަށް ވިދާޅުވި އެވެ.
