ރަސްމާލެ މަޝްރޫޢުގެ ދަށުން ހިންގާ ހުރިހާ ކަމެއްވެސް ކުރިއަށް ގެންދާނީ ރާއްޖޭގެ ގާނުނުތަކާއި ގަވައިދުތައް އެއްގޮތްވާ ގޮތުގެ މަތިން ކަމަށާއި، މި މަޝްރޫއުގެ އަމަލީ މަސައްކަތްތަކަށް މަގުފަހިކުރުމަށްޓަކައި ރިއަލް އެސްޓޭޓްގެ ހާއްސަ ގާނޫނެއް އެކުލަވާލުމުގެ މަސައްކަތް ސަރުކާރުން ކުރަމުންދާކަމަށް ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.
ވަޒީރުންގެ ”އަހާ ފޯރަމް“ ގައި އުޝާމް ވިދާޅުވީ، ރަސްމާލެ މަޝްރޫއުއާއި ގުޅިގެން މިހާތަނަށް ސަރުކާރުން ސޮއިކޮށްފައިވަނީ “ލެޓަރ އޮފް އިންޓެންޓް”އެއްގައި ކަމަށެވެ. މިއީ ވިޔަފާރީގެ އަސާސީ ޝަރުތުތަކެއްގެ މައްޗަށް އެކުލަވާލެވުނު ލިޔުމެއްކަމަށާއި، މި ލިޔުމުގައި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއިން ސޮއިކޮށްފައިވަނީ ބަންޑާރަ ނައިބުގެ އޮފީހުގެ ގާނޫނީ ލަފާ ހޯދުމަށްފަހު ކަމަށް އުޝާމް ފާހަގަކުރެއްވިއެވެ.
މީގެ އިތުރުން، މި ޕްރޮސެސްގެ ދަށުން ދެން އޮތީ ވިޔަފާރީގެ އުސޫލުތަކަށް މަޝްވަރާކުރުމަށްފަހު މާސްޓަރ ޑިވެލޮޕްމަންޓް އެގްރީމެންޓް އެކުލަވާލުންކަމަށާއި، އެ އެއްބަސްވުމުގައި ސޮއިކުރާނީ ރައްޔިތުންގެ މަޖިލީހުން ފާސްކުރަންޖެހޭ ގާނޫނުތައް ފާސްކުރުމަށްފަހުކަމަށް އުޝާމް ވިދާޅުވިއެވެ.
މި ގާނޫނަކީ ހަމައެކަނި ވަކި މަޝްރޫއަކަށް ހާއްސަ ގާނޫނެއް ނޫން ކަމަށާއި، މި ގާނޫނުގެ ދަށުން ރާއްޖޭގެ ހުރިހާ ސަރަޙައްދެއްގައި ވެސް ރާއްޖެއާއި ރާއްޖެއިން ބޭރުގެ ކުންފުނިތަކަށް މިފަދަ މަޝްރޫއުތައް ހިންގުމުގެ ފުރުސަތު ފަހިވެގެންދާނެކަމަށް އުޝާމް ވިދާޅުވިއެވެ.
