ހެލްތް މިނިސްޓްރީގެ ހުސްވެފައިވާ ޕާމެނަންޓް ސެކޭޓްރީގެ މަގާމަށް އެ މިނިސްޓްރީގެ ޑެޕިއުޓީ ޑީރެކްޓާރ ޖެނެރަލްގެ މަގާމުގައި ހުރި އައިޝަތު ސާމިއާ އައްޔަންކޮށްފިއެވެ.
ސާމިޔާ އެ މަގާމަށް އައްޔަންކޮށްފައިވަނީ ސިވިލް ސާވިސް ކޮމިޝަނުންނެވެ. އަދި މިނިސްޓްރީގެ ސިވިލް ސާވަންޓުގެ ކަންކަން ބަލަހައްޓާ އެންމެ މަތީ އިސްވެރިއަކަށް ސާމިޔާ އައްޔަންކޮށްފައިވަނީ ކުރިން އެ މަގާމުގައި ހުރި ހަދީޖާ އަބްދުއްސަމަދުގެ ދައުރު ހަމަވާން ފަސް ދުވަހަށް ވެފައިވަނިކޮށް މަގާމުން ވަކި ކުރުމުންނެވެ. ދައުރު ހަމަވާން މަދު ދުވަސްކޮޅަކަށް ވެފައިވަނިކޮށް، ހަދީޖާ އެ މަގާމުން ވަކި ކުރީ މިދިޔަ ފެބްރުއަރީ މަހުގެ 20 ވަނަ ދުވަހުގައެވެ.
މި މަގާމަށް ކުރިމަތިލާން ހުޅުވާލުމުން ސާމިއާގެ އިތުރުން، މިނިސްޓްރީގެ ޑެޕިއުޓީ ޑިރެކްޓާރ ޖެނެރަލް ތަސްލީމާ އުސްމާން ކުރިމަތިލިއެވެ. އަދި އެންމެ މަތީން މާކްސް ލިބިވަޑައިގެންފައިވަނީ ވެސް ތަސްލީމާއަށެވެ. ތަސްލީމާއަށް 89.98 އިންސައްތަ މާސް ލިބުނުއިރު، ސާމިއާއަށް ލިބިފައިވަނީ 73.9 އިންސައްތަ މާކްސްއެވެ.
