ކ. ގުޅީފަޅު ބޭރުގައި އޮތް ބޯޓަކުން ވެއްޓި ބޯފަޅައިގެން ދިޔަ ބިދޭސީއަކު މަރުވެއްޖެ އެވެ.
އެމްއެންޑީއެފް އިން ބުނެފައިވަނީ ގުޅީފަޅުގައި ބަނދަރުކޮށްފައިވާ ބޯޓެއް ކަމަށްވާ ”ވިކްޓޯރިއާ 267“ އިން ބިދޭސީއަކު ވެއްޓި ބޯފަޅައިގެން ގޮސްފައިވާ ކަމުގެ ރިޕޯޓު މިއަދު ހެނދުނު 11:15 ހާއިރު ލިބިފައިވާ ކަމަށެވެ.
އެމީހާއަށް އަވަސް ފަރުވާ ދިނުމަށް އެމްއެންޑީއެފްގެ މާލޭ އޭރިއާ ކޯސްޓްގާޑު ސްކުއޮޑްރޮންގެ އެހީތެރިކަމާއެކު މިއަދު މެންދުރު 12:10 ހާއިރު މާލެ ގެނެސް އައިޖީއެމްއެޗަށް ވަނީ ގެންދެވިފައެވެ.
ފަރުވާދެމުން ދަނިކޮށް އެ މީހާ ނިޔާވެފައި ވާކަން އައިޖީއެމްއެޗުން ވަނީ ކަށަވަރުކޮށްދީފައެވެ.
