ސިއްހީ ހާލުކޮޅު ދެރަވެ ޕީޕީއެމްގެ ނައިބު ރައީސް އަދި ކުރީގެ ހައުސިން މިނިސްޓަރު ޑރ.މުހައްމަދު މުއިއްޒު ހޮސްޕިޓަލުގައި އެޑްމިޓްކޮށްފިއެވެ.
ޕީޕީއެމުން ބުނީ މުއިއްޒު އައިޖީއެމްއެޗް ހޮސްޕިޓަލުގައި އެޑްމިޓްކޮށްފައިވަނީ އިއްޔެގެ ވަގުތެއްގައި ކަމަށެވެ. ނަމަވެސް އެޑްމިޓް ކުރީ ކޮން ސަބަބަކާއި ގުޅިގެން ކަމެއް ޕީޕީއެމުން ހާމައެއް ނުކުރެއެވެ.
އަދި މުއިއްޒުގެ ހާލުކޮޅު މިހާރު މަޑުމަޑުން ރަނގަޅުވަމުން އަންނަ ކަމަށް އާއިލާއާ ހަވާލާދީ ޕީޕީއެމުން މައުލޫމަތުދެއެވެ.
މުއިއްޒު ބަލިވެގެން ހޮސްޕިޓަލްގައި އެޑްމިޓްކޮށްފައިވާއިރު، ނޫމަޑި މައްސަލައިގައި ދޮގު ބަޔާން ދިނުމުން އޭނާއާއި ދެކޮޅަށް ވަނީ ދައުވާ އުފުލާފައެވެ.
އެކަމާ ގުޅޭގޮތުން ޕްރޮސެކިއުޓަރ ޖެނެރަލް އޮފީސް (ޕީޖީ އޮފީސް) އިން ބުނީ، 25 ޖޫން 2019 ދުވަހު ނޫމަޑި ރިސޯޓްސް އެންޑް ރެސިޑެންސަން އޭޖީ ނަމަކަށް ކިޔާ ކުންފުންޏަކުން (ނޫމަޑި) އިން ދިވެހި ސަރުކާރާ ދެކޮޅަށް ނެދަލޭންޑްސްގެ ދަހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަންއަށް ހުށަހަޅާފައިވާ މައްސަލާގައި އެކުންފުނީގެ ހެކިވެރިއަކަށްވެ، ޑރ މުއިއްޒު ދޮގު ހެކިބަސް ދެއްވާފައިވާ ކަމަށެވެ.
