އާދިއްތަ ދުވަހު ގެޒެޓްކުރި ސިޔާސީ ޕާޓީތަކުގެ ގާނޫނަށް ގެނެވުނު އެއްވަނަ އިސްލާހުގައި، ސިޔާސީ ޕާޓީގެ ގާނޫނާއި އެ ގާނޫނުގެ ދަށުން ހެދިފައިވާ ސިޔާސީ ޕާޓީތަކުގައި ގަވާއިދާ ޙިލާފުވާ ފަރާތްތަކާމެދު ފިޔަވަޅުއެޅުމުގައި އީސީން ބަލަންޖެހޭ ކަންކަމާއި، އެ ކޮމިޝަނުން ފުރިހަމަކުރަންޖެހޭ އިޖުރާއަތްތައް ވަނީ ބަޔާންކޮށްފައެވެ.
އެގޮތުން މި ގަވާއިދާ ހިލާފުވާ ފަރާތްތަކާމެދު ފިޔަވަޅުއެޅުމުގެ ކުރިން ގަވާއިދާ ޙިލާފުވީކަން ކަށަވަރުކުރުމާއި، ކަމާގުޅުންހުރި އެހެނިހެން އިދާރާތަކާއި މުއައްސަސާތަކުން ލިޔެކިޔުން ހޯދުމާއި، ޖަވާބުދާރީވުމުގެ ފުރުސަތު ދިނުމުގެ އިތުރަށް މައްސަލައާ ގުޅުންހުރި ހެކި ހުރިކަން ކަށަވަރަކުރުމަށް އުސޫލުގައި ވެއެވެ. އަދި މި ހުރިހާ ކަމެއްކުރެވެން ވަނީ ރަނގަޅަށް ރެކޯޑްތައް ބެލެހެއްޓިގެން ކަމަށްވެސް ވެއެވެ.
އޭގެއިތުރުން ސިޔާސީ ޕާޓީގެ ގަވާއިދާ ޙިލާފުވެގެން ހުށައެޅޭ މައްސަލަތައް ރައްދުވާ ފަރާތްކަށް ޖަވާބުދާރީވުމަށް ހަތް ދުވަހުގެ މުއްދަތެއް ލިބިދޭއިރު، މައްސަލައާ ގުޅުންހުރި ހުރިހާ ލިޔެކިޔުމެއް އީސީން ފޯރުކޮށްދޭންޖެހެއެވެ. އަދި މައްސަލައިގައި ގޮތެއް ނިންމަން ވާނީ މައްސަލަ ރައްދުވާ ފަރާތުން ދައްކާ ވާހަކަތަކާއި، އެ ފަރާތުން ހުށައަޅާ އެހެނިހެން ހެއްކަށް ރިއާޔަތްކުރުމަށް ފަހުގައެވެ.
ސިޔާސީ ޕާޓީތަކުގެ ގާނޫނާއި ޙިލާފުވާ ފަރާތްތަކާމެދު ފިޔަވަޅުއެޅުމަށް އިލެކްޝަން ކޮމިޝަނަށް ދީފައިވާ ބާރުތަކުގެ ދަށުން ސިޔާސީ ޕާޓީތަކާއި އަމިއްލަ ފަރުދުން ޖޫރިމަނާކުރެވެއެވެ. އެގޮތުން މައްސަލައިގެ ބާވަތަށް ބަލައި، 5،000ރ. އާއި 50،000 ރ. އާ ދޭތެރޭގެ އަދަދަކުން ޖޫރިމަނާކުރުމުގެ ބާރު އެ ކޮމިޝަނަށް ލިބިދެއެވެ. އޭގެއިތުރުން، ސިޔާސީ ޕާޓީއެއް އުވައިލަން ޖެހޭފަދަ އަމަލެއްކޮށްފިނަމަ، އެ މައްސަލަ ހައި ކޯޓަށް ހުށައަޅައިގެން އެކަން ކުރެވޭނެ މަގު އެ ކޮމިޝަނަށް ވަނީ ފަހިކޮށްދީފައެވެ.
advertisment