އެންވަޔަރމަންޓް ކްލައިމެޓް ޗޭންޖް އެންޑް ޓެކްނޯލޮޖީ މިނިސްޓަރު އައިމިނަތު ޝައުނާއަށް މިހާރު ދިމާވަމުން އެ ދަނީ ކުރިން މަލީހް މަގާމުގައި ހުރި އިރު އޭނާއަށްވެސް ދިމާވި ހާލަތު ކަމަށް ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލް ވިދާޅުވެއްޖެއެވެ.
މަލީހް މިހެން ވިދާޅުވީ އިންޓަނެޓްގެ އަގު ހެޔޮކުރުމަށް ބާއްވާ ރަސްމިއްޔާތު ދެވަނަ ފަހަރަށް ފަސްވުމާގުޅިގެން ކުރެއްވި ޓްވީޓެއްގައެވެ.
މިއަދު 10 ޖަހާ ބޮޑުވެއްޖެ. ހެޔޮކުރަން ބުނި އަގު އިޢުލާން ނުކުރެވުނު. މިނިސްޓަރ ޝައުނާއަށް ވެސް މިހާރު ދިމާވަމުން އެދަނީ އޭގެ ކުރީގައި އަޅުގަނޑަށް ދިމާވި ހާލަތު. އެއީ ހުރިހާ ކަމެއް ނިމުނީމަވެސް ފައިނަލް ޑެސިޝަން ނަގަންޖެހޭ ފަރަތުން ނަގަން ނުކެރުން. ނަގަން ފަސްޖެހުން. ވަރަށް ދެރަ.
— Mohamed Maleeh Jamal (@maleehjamal) May 25, 2021
މަލީހްގެ ވިދާޅުވެފައިވަނީ، މިއަދު 10:00 ގައި އިއުލާނު ކުރަންބުނި އިންޓަނެޓްގެ ހެޔޮ އަގު އަދިވެސް އިއުލާނު ނުކުރެވޭކަމަށާއި މިނިސްޓަރ ޝައުނާއަށް ވެސް މިހާރު ދިމާވަމުން އެދަނީ އޭގެ ކުރީގައި އޭނާއަށް ދިމާވި ހާލަތުކަން ފާހަގަކޮށް މަލީހް ވިދާޅުވެފައިވަނީ ހުރިހާ ކަމެއް ނިމުމުންވެސް ފައިނަލް ޑިސިޝަން ނަގަންޖެހޭ ފަރާތަށް އެކަން ކުރަން ނުކެރޭ ކަމަށެވެ.
މަލީހު މިނިސްޓަރުގެ މަގާމުން ވަކި ކުރި ސަބަބުތަކުގެ ތެރޭގައި އިންޓަނެޓުގެ އަގު ހެޔޮ ނުކުރުން ހިމެނެ އެވެ. އަދި އެކަމަށް ހަދަން ޖެހޭ ބާއެއް ގަވައިދުތަކުގެ މައްސަލަ ފެންމަތި ކުރި އެވެ.
އެކަމަށް ރައްދު ދީ މަލީހު ވިދާޅުވީ، އިންޓަނެޓުގެ އަގު ހެޔޮ ކުރަން ހުރިހާ މަސައްކަތްތަކެއް ނިންމާ ރައީސް އޮފީހަށް ވެސް ފޮނުވި ކަމަށެވެ.
އިންޓަނެޓްގެ ހެޔޮ އަގުތައް ޓެކްނޮލޮޖީ މިނިސްޓްރީން ފުރަތަމަ އިއުލާނު ކުރާގޮތަށް ހަމަޖެހިފައި އޮތީ އިއްޔެއެވެ. އެހެންނަމަވެސް އެ ރަސްމިއްޔާތު މިއަދު ހެނދުނު 10:00 އަށް ފަސް ކުރުމަށް ފަހު އަނެއްކާވެސް އެ ރަސްމިއްޔާތު މިވަނީ ފަސްކޮށްފައެވެ.
ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، އިންޓަނެޓުގެ އަގުތައް ހެޔޮ ކުރުމާއި ގުޅޭގޮތުން ސަރުކާރުގެ ސިޔާސަތުތައް އަންނަ ބުރާސްފަތި ދުވަހުގެ 10:00 ގައި އިއުލާނު ކުރާނެ ކަމަށެވެ.
