ޓިކްޓޮކް ޝިފާ ބުރުގާ އަޅައިފި

ޓިކްޓޮކް ޕްލެޓްފޯމްގައި މަޝްހޫރުކަންހޯދާ، ފިލްމީ ދާއިރާގައި ފިޔަޖަހަމުން އައި މަރިޔަމް ޝިފާ މިރޭ ބުރުގާ އަޅައިފިއެވެ.

އިންސްޓަގްރާމް ޕޯސްޓެއް މެދުވެރިކޮށް ޝިފާ އޭނާ ބުރުގާ އެޅިކަން ހާމަކުރިއިރު ޝިފާގެ ފޭނުންނަށް މިކަންވީ ”ސަޕްރައިޒް“ އަކަށެވެ. ސަބަބަކީ އެކިއެކި ލައިވްތަކުގައިވެސް ބުރުގާ އެޅުމާއިބެހޭގޮތުން ސުވާލުކުރުމުން، އަވަސް މުސްތަގްބަލެއްގައި ބުރުގާ އަޅާފާނެކަމުގެ އިޝާރާތެއް ޝިފާ ދީފައިނުވުމެވެ.

އަލްހަމްދުالله. މިއީ އައު ފެށުމެއް: ޝިފާ

ޝިފާ ބުރުގާ އެޅިކަން އޭނާވަނީ ސަންގަށްވެސް ކަށަވަރުކޮށްދީފައެވެ. ނަމަވެސް އެކަމުގެ އިތުރު ތަފްސީލެއް ނުދެއެވެ.

މީގެކުރިން މޯލްޑިވިއަން އައިޑަލްގައި 17 އަހަރުގައި ޝިފާ ބައިވެރިއިރު، އޭރު ޝިފާ ހުރީ ބުރުގާ އަޅާފައެވެ. އެއަށްފަހު ޓިކްޓޮކް އަދި ފިލްމީ ދާއިރާއަށް ނުކުތްއިރު ޝިފާހުރީ ބުރުގާ ނަގާފައެވެ.

އޭގެ ފަހުން މިރެއާއިހަމައަށް ޝިފާ ފެނިފައިވަނީ ކުރު އެއްޗެހިލައިގެން ސޯޝަލް ޕްލެޓްފޯމްތަކުގައި ވީޑިއޯ ފޮޓޯ އާއްމުކޮށްފައިވާ ފަރާތެއްގޮތުގައެވެ.

ޝިފާ ފާހަގަވެފައިވަނީ ކުޑަދުވަސްކޮޅެއްގައި ފިލްމީ ދާއިރާގައި މަގުބޫލުކަން ހޯދި ތަރިއެއްގެގޮތުގައެވެ. ”ޖެހިލުންކުޑަ“ ”ސީދަލަށް އެއްޗެހި ބުނާ“ ޝިފާއަކީ ބައެއް ފަހަރު ސޯޝަލް މީޑިއާގައި އާއްމުންގެ ”ޓާގެޓަކަށް“ ވެފައިވާ ތަރިއެކެވެ.