މާލޭގެ މަގުތަކުގައި ފެން ހިންދުމަށް ބޭނުންކުރާ ޕަމްޕުތައް ނުބެލެހެއްޓި އޮޕަރޭޓް ނުކުރެވޭ ނަމަ، ސިޓީ ކައުންސިލާ އެ ޕަމްޕުތައް ހަވާލުކުރުމަށް މާލޭގެ މޭޔަރު ޑރ. މުހައްމަދު މުއިއްޒު އެމްޑަބްލިއުއެސްސީ އަށް ގޮވާލައްވައިފިއެވެ.
މުއިއްޒު ކުރެއްވި ޓްވީޓެއްގައި ވަނީ މާލޭގައި ފެން ހިންދުމަށް ބޭނުންކުރާ ސްޓޯމް ވޯޓާ ޕަމްޕްތައް ރަނގަޅަށް ނުބެލެހެއްޓޭނަމަ އެ ޕަމްޕްތައް ސިޓީ ކައުންސިލާ ހަވާލުކުރުމަށް ގޮވާލާފައެވެ.
ފަންނީ ބޭފުޅުންނާ ހަވާލާދެއްވާ މުއިއްޒު ވިދާޅުވީ ފެން ކުންފުނިން ޕަމްޕްތައް ބަލަހައްޓާ ގޮތުން އެ ޕަމްޕްތަކުގެ ކެޕޭސިޓީއާ އެއްވަރަށް ފެން ހިންދުމުގެ މަސައްކަތް ޕަމްޕްތަކުން ނުކުރެވޭ ކަމަށެވެ.
އިއްޔެ ކުރި ވިއްސާރާގައި މާލެއަށް ބޯކޮށް ވާރޭވެހި މަގުތަކުގައި ފެން ބޮޑުވުމުގެ ސަބަބުން ހިނގާބިނގާވެ އުޅޭ މީހުންނަށާއި، އެއްގަމު އުޅަނދު ފަހަރު ދުއްވާ މީހުންނަށް އެކި ދަތިތަކާ ވަނީ ކުރިމަތިލާން ޖެހިފައެވެ.
