އިންސާފްގެ ނަމުގައި ސިޔާސީ ބަދަލުހިފުން ނިމުމަކަށް އަންނަންޖެހޭ ކަމަށް ކުރީގެ ނައިބު ރައީސް ޑރ. މުޙައްމަދު ޖަމީލް އަހްމަދު ވިދާޅުވެއްޖެއެވެ.
ތަކުރާރުކޮށް ރައީސް ޔާމީންގެ މައްޗަށް އުފުލާ ދަޢުވާތަކާމެދު ޖަމީލު ވަނީ ކަންބޮޑުވުން ފާޅުކޮށްފައެވެ. އަދި މިފަދަ އަމަލުތަށް ދުނިޔެ ދެކެނީ އުތުރު ކޮރެއާ އާ އެއްގޮތަށް ކަމަށްވެސް ޖަމީލު ވިދާޅުވި އެވެ.
އިންސާފު ގާއިމު ކުރުމުގެ ނަމުގައި ސަރުކާރުން ތިން އަހަރު ވަންދެން ކުރި ހަމައެކަނި ކަމަކީ ކުރީގެ ރައީސް އަބްދުﷲ ޔާމީނަށް ދައުވާ އުފުލުން ކަމަށް ޖަމީލް ވިދާޅުވިއެވެ. އަދި ޖަމީލް މިހެން ވިދާޅުވީ ރައީސް ޔާމީންގެ މައްޗަށް ދައުވާ އުފުލާފައިވާ ފުއްގިރި ދައުވާގެ އަޑުއެހުންތައް ކްރިމިނަލް ކޯޓުގައި ތާވާލު ކުރުމުންނެވެ.
ހަމަ މިއާއިއެކު، ރައީސް ޔާމީންގެ ވަކީލުންގެ ޓީމްގައި ވެސް އިސްކޮށް މަސައްކަތް ކުރައްވާ ޖަމީލް ކުރެއްވި ޓްވީޓްގައި ވިދާޅުވީ ތަކުރާރުކޮށް ރައީސް ޔާމީންގެ މައްޗަށް އުފުލާ ނުޙައްގު ދައުވާތަކާމެދު ކަންބޮޑުވެ ވަޑައިގަންނަވާ ކަމަށެވެ.
ތަކުރާރުކޮށް ރައީސް ޔާމީންގެ މައްޗަށް އުފުލާ ނުޙައްޤު ދަޢުވާތަކާމެދު ކަންބޮޑުވޭ. މިދިޔަ 3 އަހަރު އިންސާފް ޤާއިމްކުރަނީއޭ ބުނެ މިނޫން ކަމެއް ކުރެވިއްޖެތޯ؟ އިންސާފްގެ ނަމުގައި ސިޔާސީ ބަދަލުހިފުން ނިމުމަކަށް އަންނަންޖެހޭ. މިފަދަ ޢަމަލުތައް ދުނިޔެ ދެކެނީ އުތުރު ކޮރެއާއާ އެއްގޮތަށް. pic.twitter.com/QOmaxUGV56
— Mohamed Jameel Ahmed (@MJameelAhmed) January 2, 2022
އެގޮތުން މިއަދު ކްރިމިނަލް ކޯޓުގައި ފެށުމަށް ހަމަޖެހިފައި ވަނީ، ވ.އާރަށް ކުއްޔަށް ދިނުމުގައި ރައީސް ޔާމީން 1 މިލިއަން ޑޮލަރުގެ ރިޝްވަތު ނެގިކަމަށް ބުނެ އުފުލާފައިވާ ދައުވާއެއްގެ ޝަރީއަތެވެ. އަދި އެމައްސަލައިގައި ރިޝްވަތް ގަބޫލު ކުރުމުގެ ދައުވާގެ އިތުރުން މަނީ ލޯންޑްރިންގެ ދައުވާއެއް ވެސް އުފުލާފައެވެ.
މީގެއިތުރުން، ރ. ފުއްގިރި ކުއްޔަށް ދިނުމުގައި ވެސް ރައީސް ޔާމީން 1 މިލިއަން ޑޮލަރުގެ ރިޝްވަތް ނަގައި އަދި ސަން ކޮންސްޓްރަކްޝަން ބޭނުން ކޮށްގެން އެފައިސާ ލޯންޑާ ކުރެއްވި ކަމަށް ބުނެ ވެސް 2 ދައުވާއެއް ވަނީ އުފުލާފައެވެ. އަދި އެދައުވާގެ އަޑުއެހުންތައް ކްރިމިނަލް ކޯޓުގައި މިދިޔަ އަހަރު ވަނީ ފަށާފައެވެ.
ހަމަ މިއާއިއެކު، ރައީސް ޔާމީންގެ މައްޗަށް އުފުލާފައިވާ 4 ދައުވާއެއް ކްރިމިނަލް ކޯޓުގައި އޮތްއިރު އެމަނިކުފާނުގެ މައްޗަށް 2019 ވަނަ އަހަރު ކްރިމިނަލް ކޯޓުން ސާބިތުވި މަނީ ލޯންޑްރިންގެ ދައުވާގެ ހުކުމް މިދިޔަ ނޮވެމްބަރ މަހުގެ 29 ވަނަ ދުވަހު ސުޕްރީމް ކޯޓުން ވަނީ ބާތިލް ކޮށްފައެވެ.