2021 ވަނަ އަހަރުގެ ކޮރަޕްޝަން ޕާސެޕްޝަން އިންޑެކްސް (ސީ.ޕީ.އައި) ގެ ނަތީޖާ ޓްރާންސްޕޭރަންސީ އިންޓަނޭޝަނަލް އިން މިއަދު ނެރެފައިވާއިރު ދިވެހިރާއްޖެ މިވަނީ 03 ޕޮއިންޓް ދަށަށް ޖެހި ގައުމު ތަކުގެ ރޭންކިންގްސް އިން 10 ގިންތި ދަށަށް ވެއްޓިފައެވެ. މި އިންޑެކްސްއިން ދައްކާ ގޮތުގައި ދިވެހިރާއްޖެ އަދިވެސް ހިމެނެނީ 50 ޕޮއިންޓްއިން ދަށުން ސްކޯ ކުރާ ތިންބައި ކުޅަ ދެބައި ގައުމުތަކުގެ ތެރޭގައެވެ.
ސީ.ޕީ.އައި އަކީ ދުނިޔޭގެ 180 ގައުމެއްގައި ދައުލަތްތައް ހިންގުމުގައި ކޮރަޕްޝަން އަށަގަނެފައިވާކަމަށް ގަބޫލުކުރެވޭ މިންވަރު ބެލުމަށް ކޮށްފައިވާ ސާރވޭތަކާއި ފަންނީ މާހިރުންގެ ހޯދުންތަކުގެ އަލީގައި އެ ގައުމުތައް ގިންތިކޮށް ޕޮއިންޓްދޭ އިންޑެކްސް އެކެވެ. މި އިންޑެކްސްގައި ބޭނުންކުރަނީ ސުމަކުން ފެށިގެން ސަތޭކައާއި (0 100) ދެމެދުގެ މިންގަނޑެއް ކަމަށް ވާއިރު ސުމެއް ލިބެނީ ވަރަށް ކޮރަޕްޓް ގައުމުތަކަށެވެ. އަދި 100 ލިބެނީ ކޮރަޕްޝަންގެ އަމަލުތައް މަދު، ހިންގުމުގެ ނިޒާމު ސާފު އަދި ހާމަކަން ބޮޑު ގައުމުތަކަށެވެ.
2020 ވަނަ އަހަރުގެ ސީ.ޕީ.އައި އިން ދިވެހިރާއްޖެއަށް ލިބުނީ 180 ގައުމުގެ ތެރެއިން 75 ގިންތި އަދި 43 ޕޮއިންޓް ކަމުގައި ވީނަމަވެސް 2021 ގައި ދިވެހިރާއްޖެއަށް ލިބިފައިވަނީ 85 ވަނަ ގިންތި އަދި 40 ޕޮއިންޓެވެ. މި ނަތީޖާ ނެރުމަށްޓަކައި ރިއާޔަތްކޮށްފައިވަނީ ބައިނަލްއަގްވާމީ 3 މަސްދަރަކަށެވެ. އެއީ ގްލޯބަލް އިންސައިޓް ކަންޓްރީ ރިސްކް ރޭޓިންގްސް، ވެރައިޓީސް އޮފް ޑިމޮކްރަސީ ޕްރޮޖެކްޓް އަދި ވޯލްޑް ބޭންކް ކަންޓްރީ ޕޮލިސީ އެންޑް އިންސްޓިޓިއުޝަނަލް އެސެސްމަންޓް (ސީޕީ.އައިއޭ) އެވެ. ގްލޯބަލް އިންސައިޓް ކަންޓްރީ ރިސްކް ރޭޓިންގްސް އަދި ވެރައިޓީސް އޮފް ޑިމޮކްރަސީ ޕްރޮޖެކްޓް ގެ ޑާޓާ އެއްކޮށްފައިވަނީ ޖެނުއަރީ 2020 އިން ޖެނުއަރީ 2021 އަށެވެ. އަދި ވޯލްޑް ބޭންކް ސީ.ޕީ.އައި.އޭ ގެ ޑާޓާ އެއްކޮށްފައިވަނީ ޖެނުއަރީ 2019 އިން ޖެނުއަރި 2020 އަށެވެ.
ދިވެހިރާއްޖޭގެ ހިންގުމުގެ ނިޒާމަށް ކުރިއެރުން އައިސްފައިވީނަމަވެސް ކޮރަޕްޝަނާއި ދެކޮޅަށް މަސައްކަތްކުރުމަށް ހެދިފައިވާ ގާނޫނުތަކަށް އަމަލުކުރުމުގައްޔާއި ތަންފީޒުކުރުމުގައި ދިވެހިރާއްޖެ އަދިވެސް ފަހަތައް ޖެހޭކަމަށް 2021 ގެ ތަފާސް ހިސާބުތަކުން ދައްކައެވެ. ހަމަ އެހެންމެ، ދިވެހިރާއްޖޭގައި މައްސަލަތައް ތަހުގީގުކޮށް، ދައުވާކޮށް، އަދި ތަންފީޒުކުރުން ބަލިކަށިވުމުގެ ސަބަބުން ސިޔާސީ ފަރާތްތަކާއި ދައުލަތުގެ މުވައްޒަފުން ޒިންމާދާރު ނުކުރެވެއެވެ. އަދި ސީ.ޕި.އައި އިންޑެކްސްގެ މެދު ދަރަޖައިގެ ރޭންކެއް ރާއްޖެއަށް ލިބުން ރަމްޒުކޮށްދެނީ، ގްރޭންޑް ކޮރަޕްޝަންފަދަ ކޮރަޕްޝަންގެ ބޮޑެތި އަމަލުތައް އޮތްކަމެވެ. އަދި ސަރުކާރުގެ މަތީ މަގާމުތަކުގައި ތިބޭ މުއްސަދި މަދު ބަޔަކު ގިނަ ބައެއްގެ ހައްގުތައް ނަގާލާއި އަމިއްލަ މަންފާ ހޯދަމުންދާކަމެވެ. ވީމާ، ވަގުތީ ހައްލެއް ހޯދުމުގެ ބަދަލުގައި މި މައްސަލަތަކައް އެކަށީގެންވާ ހައްލެއް ހޯދަންޖެހޭކަން ވަރަށް ސާފެވެ.
2021 ގެ ސީ.ޕީ.އައި ޝިއާރުން އެނގޭގޮތުގައި އިންސާނީ ހައްޤުތަކަށް އަރައިގަތުމަށް ކޮރަޕްޝަން މަގުފަހިކޮށްދެއެވެ. ހަމަ އެހެންމެ ކޮރަޕްޝަނުގެ ސަބަބުން ދައުލަތުން އިންސާނީ ހައްގުތަކަށް އިހްތިރާމްކޮށް ރައްކާތެރިކުރަންޖެހޭ މިންވަރަށް އެކަން ނުކުރެވެއެވެ. މީގެ ސަބަބުން އިންސާނީ ހައްގުތަކަށް އަރައިގަންނަ ފަރާތްތައް ޒިންމާދާރުވުމުން ބަރީއަވުމަށްވެސް މަގުފައިކޮށްދެއެ އިންސާނީ ހައްގުތަކަށް އަރައިގަންނަ ފަރާތްތަކަކީ ކޮރަޕްޝަނާއި ދެކޮޅަށް ކުރާ މަސައްކަތައް ހުރި ބޮޑު ހުރަހަކަށް ވާއިރު، ސަރުކާރު ޒިންމާދާރު ކުރުމަށް ރައްޔިތުންނަށް ހުރި ހުރަހަކަށްވެސް ވެއެވެ. ޒިންމާދާރުކުރުވުމާއި ހާމަކަން ބޮޑު ނިޒާމެއް ގާއިމްކުރުމަށާއި ކޮރަޕްޝަން ނައްތާލާ ކޮރަްޕޓް ފަރާތްތައް ހިމާޔަތްކޮށް ބާރުވެރިކުރާ ވިހަ ނިޒާމް ނައްތާލުމަށް ސިޔާސީ އެއްބާރުލުން ވަރަށްވެސް މުހިންމެވެ.
މީގެ އިތުރުން، އެންޓި ކޮރަޕްޝަން ކޮމިޝަނުގެ ހުރިހާ މެންބަރުން އިސްތިއުފާ ދިނުމުގެ ސަބަބުން، ކޮރަޕްޝަނާ ދެކޮޅަށް ކުރާ މަސައްކަތުގައި ހުސްކަމެއް މިވަގުތު އުފެދިފައިވާތީ، އެކަމަށް ޓްރާންސްޕޭރަންސީ މޯލްޑިވްސްގެ ވަރަށް ބޮޑު ކަންބޮޑުވަމެވެ.
