ރާއްޖެއާއި އަވަށްޓެރި އިންޑިއާ ދެމެދު ވެފައިވާ އުތުރު ތިލަފަޅު އެއްބަސްވުމުގެ ދަށުން ދިވެހި ސިފައިންގެ ބާރު އެތަނުގައި ނުހިނގާކަމަށާއި، މިއީ ފުރިހަމައަށް އިންޑިއާގެ އަސްކަރިއްޔާގެ ބާރުގެ ދަށުގައި އޮތް ތަނެއް ކަަމަށް ކުރީގެ ރައީސް، އަދި އިދިކޮޅު ކޮންގްރެސް ކޯލިޝަންގެ ލީޑަރު ޔާމީން އަބްދުލް ގައްޔޫމް ވިދާޅުވެއްޖެއެވެ.
ރާއްޖޭގައި އިންޑިއާ ސިފައިން ތިބުމާއި އަދި ދެ ގައުމުގެ ދެމެދުވެފައިވާ އެއްބަސްވުންތަކުގައި ގައުމީ ސަލާމަތަށް ނުރައްކާވާ ކަންތަކެއް ހިމެނޭކަމަށް ބުނެ ކުރިޔަށް ގެންދާ ”އިންޑިއާ އައުޓް“ ހަރަކާތްތަކުގައި އެންމެ އިސްކޮށް އުޅުއްވަނީ ރައީސް ޔާމީނެވެ. ހާއްސަކޮށް ސުޕްރީމް ކޯޓުން މިނިވަންވެވަޑައިގަތުމަށް ފަހު، ކޮންމެ ހަފްތާއަކު ވެސް ރާއްޖޭގެ ރަށްތަކަށް ވަޑައިގެން އެ ހަރަކާތް ހިންގަވަ އެވެ.
ކޮމަންޑޫ ދާއިރާގެ އިންތިހާބަށް ފަހު، ރ. މީދޫއަށް މިއަދު ވަޑައިގެން ރައީސް ޔާމީން ޖުމްލަކޮށް ވާހަކަ ދެއްކެވީ އުތުރު ތިލަފަޅު މައްސަލައިގަ އެވެ. އެމަނިކުފާނު ވިދާޅުވީ، އުތުރު ތިލަފަޅަކީ އެއްވެސް ގޮތަކަށް ދިވެހި ސިފައިންގެ ބާރު ހިނގާ ތަނެއް ނޫން ކަމަށެވެ. އެތަން އޮންނަނީ އިންޑިއާގެ އަސްކަރިއްޔާގެ ބާރުގެ ދަށުގައިކަމަށް ތުހުމަތު ކުރައްވައި ރައީސް ޔާމީން ވިދާޅުވީ މިއަދު ރާއްޖޭގެ ގިނަ ހިސާބެއްގައި އިންޑިއާއަށް ނިސްބަތް ވާ އޮފިސަރުން ގާއިމްވެ އެބަތިބި ކަމަށެވެ.
”އިންޑިއާ އައުޓް“ ހަރަކާތަކީ އެއްވެސް އަމާޒެއް ނެތް ހަރަކާތެއްގެ ގޮތުގައި ސިފަކޮށް، އައުޓް ކުރަންވީ ކޯޗެއްކަން ނޭނގޭކަމަށް ބުނެ އެމްޑީޕީގެ މެމްބަރުން އަމާޒު ކުރާ ފާޑުކިއުންތަކަށް ރައްދު ދެއްވައި ރައީސް ޔާމީން ވިދާޅުވީ އެބޭފުޅުން އެފަދަ ވާހަކަތައް ދައްކަނީ އިންޑިއާ އައުޓް ހަރަކާތް ބަލަން އުނދަގޫ ވާތީ ކަމަށެވެ.
ރައީސް ޔާމީން ވިދާޅުވީ، ދިވެހި ފަސްގަނޑުން އެންމެ އިންޗިއެއް ވެސް، ބޭރުގެ އަސްކަރިއްޔާއަށް ލިޔުއްވާފައިވާ އެއްވެސް ތަނެއް އޮންނަން ބޭނުން ނުވާ ކަމަށެވެ. ވެރިކަމެއް ގެއްލުވާލައި، ގައުމުގެ މިނިވަންކަން ނިގުޅައިގަންނަން އެންމެ ފުރަތަމަ ވެސް މަސައްކަތް ކުރަނީ އެފަދަ މީހުންކަމަށް ރައީސް ޔާމީން ވިދަޅުވި އެވެ.
އިންޑިއާ އާއި ރާއްޖެއާއި ދެމެދު ވެފައިވާ އެއްބަސްވުންތައް ދިވެހި ރައްޔިތުންނަށް ހާމަކުރުމަށް ގޮވާލައި ރައީސް ޔާމީން ވިދާޅުވީ މިއަދު ފެންނަމުން ދަނީ ކޮންމެ ކަމެއްގައި ވެސް ރާއްޖެއިން އިންޑިއާގެ ދަށުގައި އޮންނަ މަންޒަރު ކަމަށެވެ. މީގެ ކުރިން ރާއްޖެއާއި ގާތް އެތައް ގައުމަކުން އިންޓެލިޖެންސާއި ބެހޭ މައުލޫމާތުތައް ހިއްސާ ކުރަމުން އައި ނަމަވެސް އެކަން ވެސް ބަދަލުކޮށް ހޯދަނީ އިންޑިއާގެ ބަސްކަމަށް ރައީސް ޔާމީން ވިދާޅުވި އެވެ. އެމަނިކުފާނު ވިދާޅުވި ގޮތުގައި އިންޓެލިޖެންސް މައުލޫމާތު ހޯދަނީ، އިންޑިއާއިން ނޫންކަމަށް ބުނެ ސަރުކާރަށް ދެއްކޭނެ ވާހަކައެއް ނެތެވެ.
މި ސަބަބާއި ހުރެ ރައީސް ޔާމީން ވަނީ އެ ގައުމުން ފޯރުކޮށްދޭ އިންޓެލިޖެންސް މައުލޫމާތަކީ އެއީ ސައްހަ މައުލޫމާތަކަށް ވެދާނެތޯ ވެސް ސުވާލު އުފައްދާފަ އެވެ. ކޮމިޝަނާރ އޮފް ޕޮލިސް މުހައްމަދު ހަމީދަށް އަމާޒު ކުރައްވައި ރައީސް ޔާމީން ވިދާޅުވީ އިންޑިއާގެ ބަސް އަހާނަމަ، އިވޭނީ އެގައުމުގެ އަސްކަރިއްޔާ އާއި ދެކޮޅަށް ހަރަކާތެއް ހިންގާ ބަޔަކަށް ފަންޑު ކުރާ ވާހަކަތައް އެކަނި ކަމަށެވެ. މަސްތުވާތަކެތީގެ އޮޕަރޭޝަންތަކަށް ވެސް އިންޑިއާގެ އެހީ ހޯދާތީ ރައީސް ޔާމީން ވަނީ، އެކަމަށް ފާޑުވިދާޅުވެ ރާއްޖެއިން އެކަމަށް މަސައްކަތް ކުރާނަމަ މާ ރަނގަޅު މައުލޫމާތުތައް ހޯދޭނެކަމަށް ވިދާޅުވެފަ އެވެ.
ރައީސް ޔާމީން ވަނީ އިންޑިއާ ސިފައިންނަށް މި ގައުމުގައި ނުތިބެވޭނެކަމަށާއި، ފޭބުން ނޫން ގޮތެއް ނެތްކަމަށް ވެސް ވިދާޅުވެފަ އެވެ.
