އިސްލާމްދީނުގެ ނަމުގައި ޖަލުތަކުގައި މީހުން ޖިހާދައް ނޫނީ އެހެން ކަންކަމަށް ތަމްރީނު ކުރާކަމަށް މަސައްކަތް ކުރާ ކަމަށް ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ވިދާޅުވެއްޖެއެވެ.
އަހުމަދު މުހައްމަދު މިފަދައިން ވިދާޅުވީ “ޕްރިންސިޕަލްސް އެންޑް ކޮންސެޕްޓްސް އޮފް ކައުންޓަރިންގ ވަޔަލަންޓް އެކްސްޓްރީމިސްމް އެންޑް ހައި ސެކިއުރިޓީ ޕްރިޒަން އޮޕަރޭޝަންސް”ގެ ތަމްރީންތައް ފުރިހަމަކުރި އޮފިސަރުންނަށް ސެޓްފިކެޓްދިނުމަށް ބޭއްވި ރަސްމިއްޔާތުގައެވެ. މި ޕްރޮގްރާމަކީ ހަރުކަށި ފިކުރު ޖަލުތަކުގައި ފެތުރުން ހުއްޓުވުމުގެ ބޭނުމުގައި ޕްރިޒަން އޮފިސަރުން ހޭލުންތެރިކުރުވުމަށް ތަމްރީން ދިނުމުގެ ބޭނުމުގައި ކުރިއަށްގެންދިޔަ ޕްރޮގްރާމެކެވެ.
ޤައިދީން ރިހެބިލިޓޭޓްކުރުމުގެ ގޮތުން މާފުށީ ޖަލުގައި ސްޕެޝަލްމެނޭޖްމަންޓް ޔުނިޓް (އެސްއެމްޔޫ) ވަނީ ޤާއިމްކުރެވިފައިވާކަމަށް ކޮމިޝަނަރ ވިދާޅުވިއެވެ. 28 އޮފިސަރުން ބައިވެރިވި މި ޕްރޮގްރާމްގައި ސެޓްފިކެޓް ހަވަލުކޮށްދެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅުއެވެ.
މި ޕްރޮގްރާމްގެ ބައިވެރިންނަށް ކިޔަވައިދެއްވީ އެމެރިކާގެ ޑިޕަރޓްމަންޓް އޮފް ޖަސްޓިސްގެ އިންޓަނޭޝަނަލް ކްރިމިނަލް އިންވެސްޓިގޭޓިވް ޓްރޭނިންގ އެސިސްޓަންސް ޕްރޮގްރާމް (އައިސިޓަޕް) ގެ ކޮންސަލްޓަންޓް މރ. މައިކް ޕަނެކްއެވެ. މައިކް ވިދާޅުވީ ހަރުކަށި ފިކުރުގެ ފަރާތްތައް ރިހެބިލިޓޭޓް ކުރުވުމަކީ މިކަމަށް ލިބޭ ކުރިއެރުމެއް ކަމަށެވެ.