ޅ.ކުރެންދޫ ކައުންސިލްގެ ރައީސްގެ މަގާމު ހުސްވުމުން ބާއްވާ ބައި އިލެކްޝަނުގައި ވާދަކުރައްވާ ޕީޕީއެމްގެ ކެންޑިޑޭޓަށް ތާއީދު ހޯއްދެވުމަށް ކުރީގެ ރައީސް އަބްދުﷲ ޔާމީން މިއަދު އެރަށަށް ވަޑައިގަންނަވާ ގޮތަށް ހަމަޖެހިއްޖެއެވެ.
ޕީޕީއެމްގެ ތަރުޖަމާނު ހީނާ ވަހީދު ވިދާޅުވީ ރައީސް ޔާމީން މިއަދު ކުރެންދޫއަށް ވަޑައިގަންނަވާނެ ކަމަށާއި އަދި ނައިފަރުގައި ބާއްވާ “އިންޑިއާ އައުޓް” ހަރަކާތުގައި ވެސް ބައިވެރިވެވަޑައިގަންނަވާނެ ކަމަށެވެ.
ކުރެންދޫ ކައުންސިލްގެ ރައީސްގެ މަޤާމު ހުސްވެފައި ވަނީ އެ ކައުންސިލްގެ ރައީސް އިބްރާހީމް ސިމާއު މަގާމުން އިސްތިއުފާ ދެއްވުމުންނެވެ. އެމްޑީޕީގެ ފަރާތުން ކުރެންދޫ ކައުންސިލަށް ވާދަކުރައްވަނީ އަލީ ނަަސީމް އެވެ. އަދި ޕީޕިއެމްގެ ފަރާތުން ވާދަކުރައްވަނީ އިސްމާއީލް މަދީހެވެ.
މި ބައި އިލެކްޝަން ބާއްވަން ހަމަޖެހިފައި ވަނީ މި މަހުގެ 26 ވަނަ ދުވަހު އެވެ.
