ރާއްޖޭގެ ރިސޯޓުތަކުން ދައުލަތަށް ލިބެން ޖެހޭ ބިމު ކުއްޔާއި، ކުލި ނުދައްކައި އޮތުމުން އަރާ ޖޫރިމަނާ ގޮތުގައި 16.9 ބިލިއަން ރުފިޔާ އަދިވެސް ދައުލަތަށް ނުލިބި އޮތްކަން އޮޑިޓަރ ޖެނެރަލް އާންމުކުރެއްވި މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) ގެ 2020 ވަނަ އަހަރުގެ އޮޑިޓު ރިޕޯޓުން ހާމަވެއްޖެއެވެ.
ރިޕޯޓުގައިވާ ގޮތުގައި 2020 ވަނަ އަހަރުގެ ނިޔަލަށް ދައުލަތަށް އާމްދަނީގެ ގޮތުގައި ލިބެން ޖެހޭ ފައިސާގެ ތެރެއިން 21 ބިލިއަން ރުފިޔާ ނުލިބިވާއިރު، އޭގެ ތެރެއިން 78 އިންސައްތައަށް ވާ 16.9 ބިލިއަން ރުފިޔާއަކީ ފަތުރުވެރިކަމުގެ ބޭނުމަށް ދޫކޮށްފައިވާ ރަށްތަކުން ލިބެންޖެހޭ ކުއްޔާއި ކުލި ނުދައްކައިގެން ޖޫރިމަނާގެ ގޮތުގައި ލިބެންޖެހޭ ފައިސާކަމުގައިވަނީ ފާހަގަކޮށްފައެވެ. މިގޮތުން ކުލީގެ ގޮތުގައި 3.4 ބިލިއަން ރުފިޔާ ނުލިބިވާއިރު، ޖޫރިމަނާގެ ގޮތުގައި 13.4 ބިލިއަން ރުފިޔާ ނުލިބިވާކަމުގައި ރިޕޯޓުގައިވެއެވެ.
މީގެ އިތުރުން ވިޔަފާރީގެ ފައިދާއިން ނެގޭ ޓެކްސްއިން 1.8 ބިލިއަން ރުފިޔާ ލިބިފައިނުވާއިރު މުދަލާއި ހިދުމަތުން ނެގޭ ޓެކްސްއިން 1.6 ބިލިއަން ރުފިޔާ ނުލިބިވާކަމުގައި ރިޕޯޓުގައިވެއެވެ. އަދި ފަތުރުވެރިކަމުގެ ދާއިރާގެ ހިދުމަތްތަކާއި މުދަލުން ނެގޭ ޓެކްސް އިން ހަ ލައްކަ ރުފިޔާގެ އިތުރުން އެހެން ދާއިރާތަކުންވެސް މީރާއަށް ވަނީ ހަ ލައްކަ ރުފިޔާ ނުލިބިކަން ފާހަގަކޮށްފައިވެއެވެ.
މީގެ ކުރިން ފަތުރުވެރިކަމުގެ ބޭނުމަށް ދޫކުރާ ރަށްތަކުން ޖޫރިމަނާ ނަގާ ގަވާއިދުގައި ރިސޯޓުތަކުގެ ފަރާތުން ކުލީގެ ގޮތުގައި ނުދައްކާ ހުންނަ އަދަދުގެ 0.5 އިންސައްތަ ދުވާލެއްގެ މައްޗަށް ޖޫރިމަނާ ވާގޮތަށް އޮތް ނަމަވެސް ސަރުކާރުން ވަނީ އެ ގަވާއިދު އިސްލާހުކޮށް 0.0493 އިންސައްތަ ނަގާ ގޮތަށް ކަނޑައަޅާފައެވެ.
ގަވާއިދުގައި ބުނެފައިވާގޮތުގައި ގަވާއިދު ކަނޑައެޅުމުގެ ކުރީގެ ދުވަސްތަކަށްވެސް ހިގާނީ މި ގަވާއިދެވެ. މި ގަވާއިދާއި ގުޅިގެން ޖޫރިމަނާގެ ގޮތުގައި ލިބެންޖެހޭ 13 ބިލިއަނުން ދައުލަތަށް ލިބިގެންދާނީ މަދު މިންވަރެކެވެ.
ދައުލަތަށް މުޅި އެކު 21 ބިލިއަން ރުފިޔާ ނުލިބި ހުރިއިރު، މިއީ މިއަހަރުގެ ދައުލަތުގެ ބަޖެޓުގެ 61 އިންސައްތައެވެ. އޮޑިޓަރ ޖެނެރަލްގެ ރިޕޯޓުގައި ވަނީ، ނުލިބި ހުރި ފައިސާތައް ހޯދުމަށް އަވަސް ފިޔަވަޅުތައް އެޅުމަށް މީރާ އަށް ލަފާދީފައެވެ.
މީރާއިން ފައިސާ ނުދައްކާ ބައެއް ފަރާތްތަކާއި ދެކޮޅަށް ދައުވާ އުފުލާފައި ވީނަމަވެސް، ކޯޓުތަކުގައި އެ މައްސަލަތައް ހިނގަނީ ވަރަށް ލަހުންކަމުގައި ފާހަގަކޮށްލެވެއެވެ. އަދި ޖޫރިމަނާ ކުރާ ގަވާއިދަށް ގެނައި އިސްލާހާއެކު 2021 ވަނަ އަހަރުގެ ނިޔަލަށް ނުލިބި ހުރި ފައިސާގެ އަދަދު 21 ބިލިއަނުންއެތައް ގުނަ އަކަށް މިހާރު ވާނީ ދަށްވެފައެވެ.
