“މިއީ ނޫސްވެރިންގެ ހަޔާތުގައި ކަޅު ދުވަހެއް”

މިއަދަކީ ނޫސްވެރިކަމުގެ ހަޔާތުގައި ކަޅު ދުވަހެއް ކަމުގައި މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވެއްޖެއެވެ.

މަސްދަރު ހާމަކުރަން މަޖުބޫރު ކުރުވާ ބިލު ކަމުގައިވާ ހެއްކާއި ބެހޭ ބިލު ރައީސް އިބްރާހިމް މުހައްމަދު ސާލިހު މިއަދު ތަސްދީގުކުރުމާއި ގުޅިގެން އާދަމް ޝަރީފް ކުރެއްވި ޓްވީޓެއްގައި ވިދާޅުވެފައިވަނީ  ރާއްޖޭގެ ނޫސްވެރިކަމުގެ ހަޔާތުގައި ކަޅު ސޮފްހާ އެއް މިއަދު ލިޔެވިގެން ހިނގައްޖެ ކަމަށާއި ހެއްކާބެހޭ ބިލު މަސްދަރު ހާމަކުރާގޮތަށް ތަސްދީގު ކުރުމަކީ ޑިމޮކްރައީސގެ ހަޔާތުގައި ސަރުކާރުން 70 އަހަރުތަކަށް ރާއްޖެ ސޮއްސާލުން ކަމުގައެވެ.

އެކަމުގެ ސަބަބުން އިއާދަ ނުކުރެވޭ ވަރުގެ ގެއްލުމެއް ދިވެހި ނޫސްވެރިކަމަށް ކުރިމަތިވެގެންދާނެ ކަމުގައި އާދަމް ޝަރީފް ވިދާޅުވިއެވެ.  މަސްދަރު ހާމަ ކުރުމަށް އޮތް މާއްދާ އިސްލާހު ކުރުމުގެ ސަބަބުން ގައުމީ ސަލާމަތަށް ނުރައްކަލެއް ކަމަށް ސަރުކާރުން ކަނޑައަޅާ ކޮންމެ ކަމަކާ ގުޅޭގޮތުން މަސްދަރު ހާމަ ކުރުމަށް ނުވަތަ ބުނުމަށް މަޖުބޫރު ކުރުވުމުގެ ބާރު ސަރުކާރަށް ލިބި ނޫސްވެރިކަމުގެ މިނިވަންކަން މިވަނީ ގެއްލިފައެވެ.

Miadhakee Raajjeyge noosverikamuge hayaathugai kalhu sofhaaeh liyeveyne dhuvaheh! Hekkaabehey bill masdharu haama kuraagothah thasdheequ kurumakee democracyge hayaathugai sarukaarun 70ge aharuthakah Raajje sossaalun! Iaadha nukureveyne gellun libeyne! https://t.co/BoqCgGQogS

— Adam Shareef Umar (@Adamshareefz) July 18, 2022

ހެއްކާއިބެހޭ ގާނޫނަކީ މަދަނީ މައްސަލަތަކާއި ޖިނާއީ މައްސަލަތަކުގައި ހެކިބަސް ނެގުމާއި ހެކި ހުށައެޅުމާއި ހެކި ބަލައިގަތުމާއި ހެކި ވަޒަންކުރުމުގައި ތަބާވާންޖެހޭ އުސޫލުތަކާއި ކަމެއް ސާބިތުކުރުމަށް ހެކި ބޭނުންވާ ނިސްބަތާއި އެނޫންވެސް ހެއްކާބެހޭ އާއްމު އުސޫލުތައް ކަނޑައެޅުމުގެ ގާނޫނެވެ.

މި ގާނޫނުގެ މަގްސަދު ތަކުގެ ތެރޭގައި ގާނޫނު އަސާސީގެ 42 ވަނަ މާއްދާއިން ކަށަވަރުކޮށްދީފައިވާ އިންސާފުން ޝަރީއަތްކުރެވުމުގެ ހައްގު އެގޮތުގައި ކަށަވަރުކޮށްދިނުމަށް ބޭނުންވާ އަސާސީ އެއް އުސޫލު ކަމުގައިވާ ހެކީގެ އުސޫލު ތަފްސީލުކޮށް ގާނޫނުގައި ބަޔާންކޮށް ކަނޑައަޅައިދިނުން ހިމެނެއެވެ.

މިބިލު  ވަނީ ރައީސް ތަސްދީގު ކުރުމާއިގުޅިގެން ދިވެހި ސަރުކާރުގެ ގެޒެޓްގައި ޝާއިޢުކޮށްފައެވެ.