މިނީބަހުގެ ޚިދުމަތް ފެށުމަށް ބަސްދުއްވާ މަގުތަކުގެ ޕާކިން ޒޯން ހުސްކުރަން ފަށައިފި

މާލޭގައި މިނީބަހުގެ ޚިދުމަތް ފެއްޓުމަށްޓަކާ ބަސްދުއްވާ މަގުތަކުގެ ޕާކިން ޒޯން ހުސްކުރުމުގެ މަސައްކަތް މާލޭ ސިޓީ ކައުންސިލުން ފަށައިފިއެވެ.

މާލޭ ސިޓީ ކައުންސިލުން މިއަދު ކުރި ޓްވީޓެއްގައި ބުނެގައި ވަނީ މާލޭގައި މިނީބަހުގެ ހިދުމަތް ފެށުމަށްޓަކައި ބަސްދުއްވާ މަގުތަކުގެ ޕާކިން ހުސްކުރުމުގެ މަސައްކަތުގެ ތެރެއިން ފުރަތަމަ ޕާކިންގް ޒޯން ހެދުމުގެ މަސައްކަތް މިހާރު ފަށާފައިވާ ކަމަށެވެ.

މާލޭގައި މިނީބަހުގެ ޚިދުމަތް ފެށުމަށްޓަކާ ބަސްދުއްވާ މަގުތަކުގެ ޕާރކިންގު ހުސްކުރުމުގެ މަސައްކަތުގެ ތެރެއިން ފުރަތަމަ ޕާރކިންގް ޒޯން ހެދުމުގެ މަސައްކަތް ފެށުން. pic.twitter.com/3JJ5sfwasM

— Male' City Council (@MaleCitymv) August 4, 2022

ސަރުކާރުގެ ފަރާތުން މިނީ ބަހުގެ ހިދުމަތް ދިނުމަށް ހަމަޖައްސާފައިވާ ކުންފުނި އެމްޓީސީސީއިން އެދުނީ، ބަހުގެ ހިދުމަތް ފެށުމަށް މާލޭ ބޮޑު ހަތަރު މަގެއްގެ ޕާކިން ޒޯންތައް ނަގައި އެ މަގުތަކުގެ ދެ ފަރާތުގައި ޕާކް ނުކުރެވޭ ގޮތަށް ހަދައި ދިނުމަށެވެ.

އެއީ މަޖީދީ މަގާއި، އަމީނީ މަގާއި ފަރީދީ މަގުގެ އިތުރުން އޯކިޑްމަގެވެ.

މާލޭގައި މިނީ ބަހުގެ ހިދުމަތް ފެށުމަކީ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ފުރަަތަމަ 100 ދުވަހުގެ ވައުދެކެވެ. އެ ހިދުމަތް މި އަހަރު ފެށުމަށް ދައުލަތުގެ ބަޖެޓުގައި 16 މިލިއަން ރުފިޔާ ހިމަނާފައިވެއެވެ.