މިނީބަހުގެ ހިދުމަތް އޮމާންކުރަން 500 އަށްވުރެ ގިނަ އުޅަދުގައި ސްޓިކާރ ޖަހައިފިން: ފުލުހުން

ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ގާއިމު ކުރައްވާފައިވާ އާރްޓީއެލް މިނީ ބަހުގެ ހިދުމަތްތައް ދިނުމަށް ހުރަސްއެޅޭ ގޮތަށް ޕާކުކޮށްފައިވާ 500 އަށްވުރެ ގިނަ އުޅަނދަށް ފިޔަވަޅު އަޅައިފިއެވެ.

ފުލުހުންގެ މުއައްސަސާއިން އާންމުކޮށްފައިވާ ގޮތުން އެ މުއައްސަސާއިން މާލޭގެ އެކި ސަރަހައްދުތަކުގައި ޕާކްކޮށްފައިވާ އުޅަނދުތަކާއިމެދު ފިޔަވަޅު އަޅާފައިވަނީ، އާރްޓީއެލް މިނީ ބަހުގެ ހިދުމަތްތައް އޮމާންކަމާއިއެކު ކުރިއަށް ގެންދިއުމަށް މަގުފަހިކޮށްދިނުމުގެ ގޮތުންނެވެ.

އެގޮތުން ފުލުހުން އާންމުކުރި ހިސާބުން ދައްކާގޮތުން، މިނީބަސް ދުއްވާ ރޫޓުތަކުގައި ޕާކް ކުރުން މަނާ ކުރުމާއި ގުޅިގެން ތަންފީޒު ކުރުމަށް ކުރި މަސައްކަތުގެ ތެރެއިން މިހާތަނަށް ޖުމުލަކޮށް 538 އުޅަނދެއްގައި ޕާކިންގް ވައިއޮލޭޝަން ސްޓިކާރ ޖަހާފައިވެއެވެ. އަދި އެއް ކާރު ޓޯކުރުމުގެ އިތުރުން 30 ސައިކަލެއްވެސް ޓޯ ކޮށްފައިވާކަމަށް ފުލުހުން ބުނެފައިވެއެވެ.

މާލޭގައި @RTLnetwork އިން ފޯރުކޮށްދެމުންދާ މިނީ ބަހުގެ ޚިދުމަތް އޮމާންކަމާއެކު ކުރިއަށް ގެންދިއުމަށްޓަކައި ފުލުހުން ކުރަމުންގެންދާ މަސައްކަތުގެ އަދާހަމަ! #އެންމެންގެލާބައަށް މަގުމަތި ބޭނުންކުރުމުގެ ރީތި އާދަތަކަށް ލޯބިކުރަމާ! pic.twitter.com/l623ekc43j

— Maldives Police (@PoliceMv) September 11, 2022

މި ހިސާބުތަކަކީ، ސެޕްޓެމްބަރު މަހުގެ 6 ވަނަ ދުވަހުން 10 ވަނަ ދުވާހާއި ދެމެދު އެ މުއައްސަސާއަށް ކުރެވިފައިވާ މަސައްކަތްތަކެވެ. އަދި ބަސް ދުއްވާ ޓްރެފިކް ބާރު ބޮޑު ރޫޓުތަކުގައި ފުލުހުން ހަރަކާތްތެރިވާނެކަމަށާއި، ބަހަށް ދަތިވާފަދަ ގޮތަކަށް ޕާކުކޮށްފައިވާ އުޅަނދުތަކުގައި ސްޓިކާރ ޖަހައި ޓޯކުރަމުން ގެންދާނެކަމަށްވެސް ބުނެފައިވެއެވެ.

މިނީ ބަހުގެ ހިދުމަތް ދިނުން ފައްޓާފައިވަނީ ސެޕްޓެމްބަރު މަހުގެ 5 ވަނަ ދުވަހުގައެވެ. މިނީ ބަހުގެ ހިދުމަތައް ގިނަ ބައެއްގެ ތަރުހީބުތައް ލިބިފައިވާއިރު، ޓެކްސީ ފަދަ ތަކެތި ދުއްވާ ބައެއް ފަރާތްތަކުންވަނީ ބަސްތައް މާލެ ފަދަ ކުޑަ ރަށަކަށް އެކަށީގެން ނުވާކަމަށް ބުނެ ފާޑުކިޔާފައެވެ.