ރައީސުލްޖުމުހޫރިއްޔާ އިބްރާހިމް މުހައްމަދު ސާލިހަށް މިވަގުތު އަމަލު ކުރެވެން އޮތް އެންމެ ބުއްދިވެރި ގޮތަކީ، މޮރިޝަސް އަށް ފޮނުއްވި ސިޓީ އަނބުރާ ގެންނެވުންކަމަށް މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެއެވެ.
ފޯޅަވަހީގެ ސިޔާދަތީ ބާރު ލިބުން އެންމެ ހައްގުވަނީ ދިވެހިންނަށް ކަމަށް ވިދާޅުވެ، މަޖިލީހުގެ ރައީސް މުހައްމަދު ނަޝީދު ބަޔާނެއް ނެރުއްވާފައިވާކަމަށް އިޝާރާތްކުރައްވާ، ތާރިގު ވިދާޅުވީ، ރާއްޖެ އަދި މޮރިޝަސްގެ ކަނޑުގެ އިމުގެ މައްސަލައިގައި އެޓޯރނީ ޖެނެރަލް އިބްރާހިމް ރިފްއަތު ދެއްކެވި ވާހަކަތައް “ކެންސަލް” ކުރައްވަން އެނާއަށް އެންގެވުންވެސް ބުއްދިވެރިކަމަށް ތާރިގު ވިދާޅުވިއެވެ.
ރައީސް ސޯލިހުއެވެ. އަދިވެސް އެންމެ ބުއްދިވެރިގޮތަކީ މޮރިޝަސް އަށް ފޮނުއްވި ސިޓީ އަނބުރާ ގެންނެވުމެވެ. އަދި ރިފްއަތުއަށް ދަންނަވައިގެން ކޯޓްގައި ކުރިންބުނިއެތި ކެންސަލް ކަމަށް ދެންނެވުމެވެ. އެކަން އެގޮތަށް ކުރެއްވިޔަސް ޤައުމަށް ޤައްދާރުނުވާކަމަށް ނުވާނެއެވެ. pic.twitter.com/JaZI00F0mQ
— Ahmed Thariq (@AhmedThaariq) October 30, 2022
މީގެ އިތުރުން ތާރިގު ވިދާޅުވީ، ރައީސް ސާލިހު ފޮނުއްވި ސިޓީ އަނބުރާ ގެންނަވައި، ރިފްއަތު ދެއްކެވި ވާހަކަތައް ކެންސަލް ކުރައްވަން އެނާ ގާތު ދެންނެވި ނަމަވެސް، ރައީސް ސާލިހު ގައުމަށް “ގައްދާރު” ނުވާކަމަކަށް ނުވާނެކަމަށެވެ.
ތާރިގު ފާޑުކިޔުންތައް ރައީސް ސާލިހުގެ އަދި އޭޖީ ރިފްއަތުއަށް އަމާޒުކުރެއްވިއިރު، ރައީސް ނަޝީދުވަނީ ސަރުކާރުން ގެންގުޅެމުންދާ ވިސްނުމާއި ދެކޮޅަށް އެމަނިކުފާނު ވިސްނަވާކަން ހާމަކުރައްވާފައެވެ. ތާރީހީ ގޮތުން ކަންކަން އޮތް ގޮތް ހާމަކުރައްވާ ރައީސް ނަޝީދު ވިދާޅުވީ، ފޯޅަވަހީގައި ބަނޑަހަ ޖަހައިގެން މަސްވެރިކަންކޮށް އުޅުނީ ދިވެހިން ކަމަށާއި އެހެންކަމުން އެތަނުގެ ސިޔާދަތީ ބާރު ލިބުން އެންމެ ހައްގީ ރާއްޖެއަށް ކަމަށެވެ.