ރާއްޖެ އަދި މޮރިޝަސްގެ ކަނޑު ފުށުއަރާ ސަރައްދުގައި ދިވެހިރާއްޖެއިން މަސްވެރިކަން ކުރަމުން އައިސްފައިވާކަމުގެ އެއްވެސް ހެއްކެއް ނެތްކަމަށް ބަނޑާރަނައިބު އިބްރާހިމް ރިފްއަތު ވިދާޅުވެއްޖެއެވެ.
ޗާގޮސް މައްސަލައިގައި މައުލޫމާތުތަކެއް ހިއްސާކުރެއްވުމަށް ރައީސް އޮފީހުގައި ފޮރިން މިނިސްޓަރު އަބްދުﷲ ޝާހިދު އަދި އޭޖީ ރިފްއަތު ކުރިއަށް ގެންދެވި ނޫސްވެރިންގެ ބައްދަލުވުމެއްގައި ރާއްޖޭގެ ދެކުނުގެ މަސްވެރިކަމަށް ލިބިގެންދާ ގެއްލުންތަކާއިމެދު ސުވާލު ކުރުމުން ރިފްއަތުވަނީ ފުށޫ އަރާ ސަރަހައްދުގައި އެއްވެސް ވަރަކަށް މަސްވެރިކަން ކުރާ ކަމުގެ ހެއްކެއް ނެތްކަމަށް ސިފަކުރައްވާފައެވެ.
ރިފްއަތު ވިދާޅުވީ، މަސްވެރިކަމުގެ ހައްގު އޮތް ކަމުގެ މައްޗަށް ބިނާކޮށް، އިން ކަނޑައަޅާ ރޮނގަށް ބަދަލުތަކެއް ގެނެވޭކަމަށެވެ. އެހެން ނަމަވެސް އެފަދަ ހައްގެއް އެ ސަރަހައްދެއްގައި އޮތް ކަމަށް ހެއްކާއި ގަރީނާއިން ސާބިތު ކޮށްދޭންޖެހޭކަމަށް އެނާ ފާހަގަކުރެއްވިއެވެ.
އެނާ ވިދާޅުވީ، ޗާގޮސް އަދި ރާއްޖޭގެ ދެމެދު ފުށޫއަރާ ސަރަހައްދުގައި ދިވެހިން މަސްވެރިކަން ކޮށްފައިވޭތޯ ބެލި އިރު އެފަދަ އެއްވެސް ހެއްކެއް ފެނިފައިނުވާކަމަށެވެ. އަދި ފިޝަރީޒް މިނިސްޓްރީ އާއި ކޯސްޓް ގާޑުންވެސް އެފަދަ މައުލޫމާތެއް ހިއްސާ ކޮށްފައިނުވާކަމަށް އެނާ ވިދާޅުވިއެވެ.
ރިފްއަތު ވިދާޅުވީ ހެއްކެއް ނެތް ކަމެއް އެއްވެސް ކޯޓެއްގައި ސާބިތު ނުކޮށްދެވޭނެކަމަށެވެ. އެނާ ވިދާޅުވީ އިކުއިޑިސްޓަންސްގެ ލައިނަށް ބަދަލުތަކެއް ގެނައުމަށް ބޭނުން ކުރެވޭނެ ހައްގެއް ކަމަށެވެ. އެހެެންނަމަވެސް އެކަން ކުރެވޭނީ އެފަދަ ހައްގެއް އޮތްކަން ސާބިތު ކޮށްދީފައިކަމަށް ރިފްއަތު އިޝާރާތްކުރެއްވިއެވެ.
އެނާ ވިދާޅުވީ، އެފަދަ ހައްގެއް އޮތް ކަމާއި މެދު ދެ ގައުމު ދެމެދު އެއްބަސްވެވެން ޖޭހޭކަމަށެވެ. އަދި ދިވެހިން އެ ސަރަހައްދުގައި މަސްވެރިކަން ކޮށްފައިވާކަމުގެ އެއްވެސް ހެއްކެއް ނެތްކަމަށް އެނާ ތަކުރާރު ކުރެއްވިއެވެ.
މީގެ އިތުރުން ރިފްއަތު ވިދާޅުވީ ދިވެހިން ޗާގޮސްއަށް ގޮސްފައި ހުރިކަމުގެ މައުލޫމާތު ދީ އިއުތިރާފް ވެފައިނުވާކަމަށެވެ.
